Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Wêreld
Woede oor massa-onthoofding van Christene
Dit reën bomme in IS-wraakaanvalle
Mans in oranje oorpakke, Egiptiese Koptiese Christene wat deur die Islamitiese Staat gevange gehou is, kniel eergister voor gewapende mans op ’n strand naby Tripoli in Libië. Die IS het Sondag ’n video-opname uitgereik waarin die ont
Egiptiese Koptiese Christene rou by die Maagd Maria- kerk in die dorp El-Aoer, 220 km suid van Kaïro, oor 21 van hul mansgeloofsgenote wat in die Sentraal-Libiese stad Sirte deur militante van Islamitiese Staat (IS) ontvoer is. &rs

Egipte se lugmag het Maandag  teikens van die Islamitiese Staat (IS) binne Libië gebombardeer, ’n dag nadat dié groep ’n video vrygestel het waarin die onthoofding van 21 Egiptenare gesien kan word.

Dit was die eerste keer dat Egipte lugaanvalle teen dié groep in Libië bevestig het en dui daarop dat pres. Abdel Fattah al-Sisi gereed is om die stryd teen Islamitiese militante buite die grense van Egipte voort te sit.

Egipte het gesê die aanvalle teen ligdag, waaraan die Libiese lugmag ook deelgeneem het, het IS-kampe, opleidingsterreine en wapenopslagplekke in ­Libië getref.

’n Libiese lugmagbevelvoerder, Saqer al-Joroushi, het gesê tussen 40 en 50 militante is in die aanval dood. Hy het gesê verdere aanvalle sou gister en vandag saam met Egipte uitgevoer word.

Die 21 Egiptiese Koptiese Christene, wat in Libië was op soek na werk, is na ’n strand gemarsjeer, gedwing om te kniel en toe onthoof.

Die video-opname van die daad is uitgesaai op ’n webwerf wat die IS ondersteun.

Voor die moorde uitgevoer is, het een van die militante met ’n mes in sy hand gesê: “Veiligheid vir jul kruisvaarders is iets waarop julle net kan hoop.”

Pous Tawadros ll, leier van Egipte se Koptiese Christene, was een van die openbare figure wat pres. Sisi ondersteun het toe hy as hoof van die weermag die Islamitiese pres. Mohammed Moersi in 2013 ná protesoptogte uit die kussings gelig het.

Die onthoofdings kan druk op Sisi plaas om te wys dat hy in beheer van Egipte se veiligheidsituasie is, selfs al het hy reeds vordering gemaak teen Islamitiese militante in die Sinai.

Sisi, wat ’n beroep gedoen het op ’n wêreldwye poging om militante te elimineer, beskou militante groepe in Libië as ’n reuse-bedreiging vir Egipte se veiligheid.

Kommer dat die krisis in Libië oor grense heen kan spoel, het Egipte genoodsaak om sy militêre gereedheid op te skerp.

Frankryk het aangekondig dat Egipte 24 Rafale-vegvliegtuie, ’n fregat en ander toerusting sal aankoop ingevolge ’n ooreenkoms wat gister in Kaïro onderteken sou word.

Pres. François Hollande van Frankryk het gister gesê hy en Sisi wil hê dat die Veiligheidsraad van die Verenigde Nasies Libië moet bespreek en nuwe maatreëls teen die IS instel.

Egipte, die Arabiese wêreld se digsbevolkte nasie, het nog nie regstreeks deelgeneem aan aanvalle teen IS-vestings in Irak en Sirië onder leiding van die VSA nie.

Volgens sekerheidsamptenare het militante in Libië kontak gemaak met ’n groep in Egipte se Sinaï-streek wat trou aan die IS gesweer het. 

– Reuters

■ Biskop Antonius Markos van die St. Mark Kopties-Ortodokse-katedraal en -sentrum in Johannesburg het aan Alet Janse van Rensburg gesê vir Koptiese Christene reg oor die wêreld is dié soort vervolging niks vreemds nie.

“Sedert die ontstaan van die Koptiese Kerk 2 000 jaar gelede word ons deur terroriste geteiken,” het hy gesê. 

“Ons bly egter getrou en die 21 mans wat die naweek moes sterf, het die hemel as martelaars ingegaan. Op daardie aaklige video kan jy sien hoe hulle tot aan die einde geprewel het, ‘My Here, Jesus’. Dit is ’n getuienis van hul liefde en toewyding aan God.”

Daar is sowat 800 Koptiese Christene in Suid-Afrika. Met hul Vastyd wat gister begin het, sal hulle die volgende 40 dae in die besonder vir die afgestorwe mans en vervolgde Christene bid en vas, het Markos gesê.

Stemme

Hallo, jy moet ingeteken wees of registreer om artikels te lees.