Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Wetenskap
SA TEGNOLOGIE
Klein satelliet ‘billik én slimmer’
Kan 100 kleure sien
’n Voorstelling van die Phoenix-satelliet in die ruimte. Dié satelliet sal in Suid-Afrika ontwikkel en dan verkoop word. Voorstelling: Verskaf
Dr. Sias Mostert, uitvoerende hoof van Space Commercial Services Aerospace Group. Foto: Verskaf

’n Maatskappy in Somerset-Wes ontwikkel ’n kompakte satelliet wat te koop aangebied sal word.

Dr. Sias Mostert, uitvoerende hoof van Space Commercial Services Aerospace Group (SCSAG), het aan Die Burger gesê hulle het aanvanklik begin om maatskappye en lande met die aanwending van satelliete te help.

“Dit is een ding om ’n satelliet te bou en op te stuur, maar om hom te bedryf en die beste uit hom te kry, is ’n uitdaging. Hoe gebruik ’n mens ’n klein satelliet tot die beste van sy vermoë?

“Dit is waarmee ons kliënte help, maar aan die einde van 2009 het ons ook die ingenieurswese begin uitbrei om saam met vennote satelliete te ontwikkel,” het hy gesê. Die aanwending en beter toepassing van kleiner satelliete word gedoen deur hulle in ’n konstellasie “saam te laat werk”. Só word ’n satelliet se werksvermoë baie beter as in gevalle waar hy op sy eie sou “werk”.

Dié kliënte is meestal in Suid-Afrika en die res van Afrika gesetel, terwyl die ontwerp en bou van nuwe satelliete internasionaal plaasvind. Een só ’n projek is die Phoenix-satelliet, wat net 24 kg weeg, maar dieselfde werk kan doen as ’n satelliet van 250 kg. Dit is danksy beter tegnologie en die grootste voordeel hiervan is laer koste.

“Om ’n satelliet te ontwerp, te bou, te lanseer en die grondstasie in te rig, kos sowat R100 miljoen,” het Mostert gesê.

Die Phoenix het ’n kamera aan boord wat 100 in stede van net vyf of ses kleure kan afneem. Dié hiperspektrale kamera kan beelde opbreek om fyn besonderhede op aarde te sien.

Dit sal ook ’n gevorderde radarstelsel aan boord hê wat dag en nag, en wanneer daar wolkbedekking op aarde is, waarnemings van die aardoppervlak kan maak. Dit het voorts die vermoë om veranderings van so min as ’n paar millimeter met verloop van tyd op te spoor.

Deur die ontwikkeling van nuwetegnologie-satelliete wat ál kleiner word, kan selfs die mees afgeleë nedersettings in Afrika nou koordloos in kontak met die wêreld geplaas word.

Klein waarnemingsatelliete kan vir die bestuur van natuurlike hulpbronne, landbougewasse en die monitering van natuurrampe soos vloede, storms en groot brande gebruik word.

Klein veranderings aan infrastruktuur soos paaie, spoorweë, lughawens, brûe, pyplyne, damme en antennas wat voortdurend aan die elemente blootgestel is, kan ook gesien word.

Stemme

Hallo, jy moet ingeteken wees of registreer om artikels te lees.