Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Wetenskap
SA se nanosatelliet vaar goed
’n Foto wat Suid-Afrika se eerste nanosatelliet, TshepisoSAT, geneem het met die suidpunt van die land net-net sigbaar. Die kamera kan nie beheer word nie en foto’s wat geneem word, is heel toevalling. Foto: KSUT | F’SATI

TshepisoSAT, die land se eerste nanosatelliet, het al ’n jaar in die ruimte oorleef.

Dié satelliet, wat net 1,2 kg weeg, is in November verlede jaar in Yasny, Rusland, gelanseer en is in ’n wentelbaan 600 km bo die aarde.

Dit is gebou deur studente en dosente van die Kaapse Skiereiland Universiteit vir Tegnologie (KSUT) se Frans-Suid-Afrikaanse Instituut vir Tegnologie (F’sati), en word ook daarvandaan beheer.

Prof. Robert van Zyl, direkteur van die satellietprogram by KSUT, het gesê die satelliet het al 250 miljoen km afgelê van ’n reis van 6 miljard km.

Net die helfte van nanosatelliete, ook bekend as CubeSats, oorleef die eerste jaar in die ruimte. TshepisoSAT het ’n hele paar erge sonstorms oorleef, en twee Russiese satelliete wat nie meer funksioneel is nie het baie naby aan hom verbygekom.

Die satelliet moet 24 uur per dag gemonitor word van die grondstasie op die universiteit se kampus in Bellville. Dit is ook waar die data wat hy terugstuur, ontleed word.

TshepisoSAT wentel 15 keer per dag om die aarde.

Die span werk reeds aan ’n tweede nanosatelliet, wat tans nog net bekend staan as ZACUBE-2 en drie keer groter as TshepisoSAT is.

Hy sal gebruik word vir ruimteweerobservasies, asook meer gevorderde aardobservasies. Hulle hoop om hom in 2016 te lanseer.

Stemme

Hallo, jy moet ingeteken wees of registreer om artikels te lees.