Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Anél Potgieter: Eet luuks

Beesvleis Wellington spreek van ’n luukse ete. Foto: iStock
Niks sê “luuks” soos ’n lekker sappige skaapboud en ’n bief Wellington nie.

Man, daardie dik rooskleurige lam wat gevul word met sampioene en okkerneute of die filet wat toegevou word om ’n lagie aardse sam­pioen-duxelle, toegedraai in soutige parmaham en dan die bros-bruin skilferkorsdeeg aan die buitekant – dít is mos nou groot bederf.

Een happie van hierdie sappige vleis saam met ’n lekseltjie rooiwyn, maak my Ier se bene lam en ek is vir weke in sy goeie boekies.

Lam-roulade met béarnaisesous en gremolata-aartappels

Ek het verlede week groot gegaan vir my Ricky-baby en onse tannie Dee en het hulle bederf met ’n lam-roulade met Béar­naisesous en gremolata-aartappels. Dit is ’n mondvol, maar ’n lekker mondvol.

Béarnaisesous kan intimiderend wees, maar ek het sommer ’n kortpad gevat deur die witwynasyn, eiergele, room, suurlemoensap en ui saam te klits voordat jy dit by die gesmelte botter meng. Die groot geheim is om dit aanhoudend te klits sodat die eiers nie skif nie. Dan geur jy dit met magiese dragon en ek gooi altyd ’n bietjie pietersielie en mosterd by.

Gremolata-aartappels is ’n heerlike en geurige somergereg en kan warm of koud bedien word.

Beesvleis Wellington

Beesvleis Wellington is ’n gereg wat met genoeg tyd, liefde en ’n goeie bottel rooiwyn aangepak moet word. Span jou geliefde in om te help en saam-saam kan julle aan die Wellington én die bottel wyn werk. As julle alles nie haarfyn beplan en met presisie uitvoer nie, mors jy net ’n peperduur stuk vleis op . . . so gee dit jou alles!

Groete uit my kombuis

Anél

lifeisazoobsicuit.com | anelpot@telkomsa.net

Beesvleis Wellington

(Resep Anél Potgieter)

Genoeg vir 4

30 ml botter

300 g sampioene, fyngekap

1 knoffelhuisie, fyngekap

blaartjies van 1 tiemietakkie

750 g beesfilet

olyfolie

30 ml mosterd van jou keuse

8 snye parmaham

500 g skilferkorsdeeg

meel

2 eiergele, geklits

sout

swartpeper

Maldon-sout

So maak mens

Braai die sampioene, knoffel en tiemie in die botter tot gaar en heeltemal droog. Geur met ’n bietjie sout en swartpeper. Laat afkoel. Voorverhit die oond tot 200 °C. Maak ’n kleefvrye pan baie warm. Smeer die filet met ’n bietjie olyfolie en geur met sout en peper. Braai al die kante tot bruin en geseël – omtrent 30 sekondes aan elke kant. Laat dit goed afkoel. Verf mosterd met ’n kwassie oor die hele stuk vleis. Rol die deeg effens dunner uit op ’n meelbestrooide oppervlak. Plaas die parmaham in die middel oor die deeg. Versprei die sampioenmengsel oor die parmaham en plaas die filet bo-op. Verf die kante van die deeg met water en vou toe. Verseël en sny die oortollige deeg af. Plaas die Wellington met die voukant na onder op ’n bakplaat. Verf liggies met die geklitste eiergeel en sprinkel met Maldon-sout. Bak vir 20 minute teen 200 °C. Draai die temperatuur af na 180 °C en bak vir ’n verdere 15 minute tot goudbruin.

Haal uit die oond en laat dit rus vir 10-15 minute voordat jy dit sny.

Lam-roulade.
Lam-roulade

Genoeg vir 6-8

Lam-roulade

1 ontbeende lamsboud

2 e olyfolie

sout en peper

Vulsel

1 k sampioene, fyngekap en in ’n pan gebraai

¼ k okkerneute, fyngekap

¼ k korrelmosterd

2 knoffelhuisies, gerasper

So maak mens

Voorverhit die oond tot 150 °C. Meng al die vulselbestanddele saam. Vlek die lamsboud oop met ’n skerp mes. Geur goed met sout en peper en olyfolie. Versprei die vulsel eweredig oor die vleis. Rol die vleis stewig op en bind vas met kombuistou. Plaas die boud in ’n gesmeerde oondpan. Geur weer goed met sout en swartpeper. Bak oop vir een en ’n half tot twee uur vir mediumgaar vleis. Bedek met foelie en laat rus vir minstens 30 minute. Sit voor met béarnaisesous.

Béarnaisesous

¼ k botter

1 e ui, fyngerasper

1 1/2 e witwynasyn

2 groot eiergele, geklits

2 e room

1 ½ t suurlemoensap

1 t droë dragon (tarragon)

1 t vars pietersielie, gekap

¼ t sout

’n knypie droë mosterd

’n knypie rooipeper

So maak mens

Smelt die botter in ’n dubbelkoker oor medium-hitte. Klits die witwynasyn, eiergele, room, suurlemoensap en ui saam en meng stadig by die botter in terwyl jy aanhoudend roer. Ek gebruik ’n balonklitser. Geur met dragon, pietersielie, sout, mosterdpoeier en rooipeper en roer goed. Roer aanhoudend totdat die sous verdik het. Sit eenkant en bedek dit met kleefplastiek om te voorkom dat ’n velletjie bo-op vorm.

Gremolata-aartappels

1 kg baba-aartappels

2 e olyfolie

2 e botter, gesmelt

sout en peper na smaak

Vir gremolata

1 bossie pietersielie, gekap

1 knoffelhuisie, gerasper

gerasperde skil van 2 suurlemoene

sap van een suurlemoen

So maak mens

Voorverhit die oond tot 190 °C.

Aartappels: Meng al die aartappel-bestanddele saam en bak in oond vir 20-25 minute of tot gaar.

Gremolata: Meng alles saam.

Bediening: Roer die gremolata deur die warm aartappels en bedien dadelik.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.