Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Anél Potgieter: Local bly lekker in die Kaap
Louis Zenhäusern is die sjef en eienaar van Bistrot Louis.

Een van my gunsteling-kosprogramme is In die sop op kykNET waar die sjef Bertus Basson sy ervaring deel om sukkelende eetplekke met potensiaal weer op hul voete te help. Om nie net te oorleef nie, maar om ook te floreer. Só ’n eetplek was Arugula in Kaapstad wat na dese Bistrot Louis heet.

Bistrot Louis in Welgemoed, Kaapstad

Bistrot Louis is ’n buurtrestaurant in ’n winkelsentrum in Welgemoed, Kaapstad. Die ligging bied ’n panoramiese uitsig oor die boomryke heuwels van die gevestigde woonbuurt en blou berge in die verte.

Die sjef-eienaar Louis Zenhäusern het grootgeword in Panorama, ’n klipgooi van sy restaurant af – waar sy ouers steeds woon. Hy het as jong sjef by Arugula gewerk en ná ’n paar draaie by ander restaurante, het hy twee jaar gelede die restaurant gekoop. Hy is nou gewis ’n local wat kosmaak vir die locals.

Hy het hard gewerk om die restaurant se standaarde te verhoog. “Ek wou uit die staanspoor iets vir mense in die buurt bied, sodat hulle nie hoef stad toe of na die wynlande te ry nie vir lekker kos in ’n atmosfeer wat verfyn, maar ook ontspanne en verwelkomend is.”

’n Paar maande nadat hy oorgeneem het, het Covid-19toegeslaan. Dinge het donker gelyk, wat dit moeilik gemaak het om kreatief vorentoe te kyk, nuwe geregte te ontwikkel of te belê in die dekor.

Voor: Arugula.
Ná: Bistrot Louis. Foto’s: Ian du Toit
In die Sop-span help Louis

Binne 72 uur het Bertus en die interieurkenner, Misi Overturf, saam met Louis ’n eetplek geskep met ’n nuwe naam, kontemporêre, warm voorkoms en vaartbelynde kombuis. Jy kan gaan smul aan Franse uiesop, regte Franse steak en handgesnyde frites, vark-en-salie-frikkadelletjies met gnocchi, bief-kortrib met kapokaartappels en beignets.

Bistrot Louis is nou weer ’n geliefde eetplek en local is lekkerder as ooit.

Groete uit my kombuis

Anél

anelpot@gmail.com

Biefkortrib met kapokaartappels en seisoengroente.
Vark-en-salie-frikkadelletjies met gnocchi

By Bistrot Louis word hierdie salie-gegeurde frikkadelletjies met klassieke aartappel-gnocchi in ’n ryk tamatiesous bedien. Die resep maak genoeg gnocchi sodat jy dit wat oorbly, kan vries.

Bedien 8 porsies

  • 1 kg vark-maalvleis
  • 1 ui, dungesny
  • 2 snye witbrood in melk geweek
  • 10 ml sout
  • 5 ml neutmuskaat
  • 5 ml paprika
  • 5 ml fyn koljander
  • 125 ml vars salieblare, opgekap
  • ’n handvol gekapte pietersielie
  • ’n bietjie botter en olie vir braai

Meng die bestanddele saam, behalwe die olie. Verdeel die mengsel in ewe groot balletjies en hou in die yskas terwyl jy die gnocchi maak. Verhit die olie in ’n pan en braai die balletjies oor matige hitte bruin, maar steeds sappig.

Gnocchi

  • 900 g kapokaartappel, deur ’n sif gedruk
  • 450 g koekmeel en ekstra meel vir oorsif
  • 15 ml sout
  • 3 ml neutmuskaat
  • 2 eiergele
  • 125 ml gerasperde parmesaankaas
  • gekapte pietersielie vir garnering

Voeg al die bestanddele in ’n mengbak, behalwe die ekstra koekmeel en gekapte kruie. Meng deur met die hand tot dit bymekaar kom, maar moenie dit oorwerk nie. Skep die aartappelmengsel in ’n spuitsak.

Bestrooi die werkvlak goed met meel. Spuit die aartappeldeeg in lang, dik stroke en sny dit op in happie-grootte blokkies.

Kook die gnocchi in gesoute kookwater vir sowat 75 sekondes. Sodra dit begin dryf, is dit gaar. Skep uit in ’n bak yswater om die kookproses te stop. Dreineer en hou eenkant.

Om te keer dat die gaar gnocchi aanmekaar kleef, kan dit ’n bietjie olie oorkry of in ’n enkellaag op ’n skinkbord uitgepak en met kleefplastiek bedek word.

Tamatiesous

  • 1 groot ui, fyngekap
  • 2 knoffelhuisies, fyngekap
  • 30 ml olie
  • 4 x 410 g blikkies heel geskilde tamaties
  • 70 g tamatiepasta
  • sout en peper

Soteer die uie en knoffel in die olie oor matige hitte tot deurskynend. Voeg die tamatiepasta by en kook deur.

Voeg die blikkies tamatie by en druk stukkend met ’n houtlepel terwyl dit kook.

Prut tot dit met die helfte afgekook het. Geur met sout en peper.

Voor opdiening: Verhit die gnocchi, frikkadelle en tamatiesous saam in ’n pan en skep ruim porsies in diep borde.

Strooi gekapte pietersielie oor.

Vark-en-salie-frikadelletjies met gnocchi.
Beignets

Beignets is ’n soort poffertjie wat gemaak word met choux-deeg, dieselfde deeg wat vir roompoffertjies of eclairs gebruik word. Die deeg word in diepvet gebraai en bedek met versiersuiker. Die soet happie het ’n bros buitekant met ’n wolksagte binneste.

  • 250 ml water
  • 250 ml melk
  • 200 g botter
  • 300 g koekmeel
  • 5-6 eiers
  • versiersuiker vir oorsif

Kook die water, melk en botter saam. Roer die meel by en kook dit vir sowat 3 minute. Plaas die deeg in die bak van ’n menger en meng die deeg met die spaan-aanhegsel tot dit koud is. Klits die eiers een vir een by tot die deeg elasties en glad is.

Skep die deeg in ’n spuitsak en laat dit afkoel. Verhit die olie. Gebruik ’n skêr om stukkies deeg af te knip (so 6 cm lank) soos jy dit uit die spuitsak spuit. Braai dit vinnig terwyl jy dit aanhou omdraai met ’n gaatjieslepel. Die beignets moet baie vinnig na die oppervlakte te dryf, anders is die olie nie warm genoeg nie. Skep uit met ’n gaatjieslepel, dreineer ’n paar sekondes op kombuispapier en sif versiersuiker oor. Bedien warm.

Albei is wisselterme wat algemeen in Frankryk gebruik word en verwys gewoonlik na ’n kleiner, informele en onpretensieuse restaurant met redelike pryse.


Meer oor:  Anel Potgieter
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.