Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Anél Potgieter: Proe bietjie Libanees
Tydens ’n besoek aan Libanon het Sophia meer geleer oor die koskultuur van haar pa se geboorteland.

Dit was ’n heerlike verrassing om die briljante resepteboek Going Home deur Sophia Lindop tydens inperking te ontvang.

Resepteboeke is daar baie van, maar goeie resepteboeke is so skaars soos hoendertande. Al stel elkeen wat leef en beef deesdae resepteboeke saam, is die meeste van hulle regtig power.

Sophia Lindop

Maar Going Home is uitsonderlik. Lindop neem jou op ’n diep persoonlike reis na Libanon. Dis ’n land met ’n ryk koskultuur wat sy op ’n historiese en kontemporêre manier aanbied.

Sy dra die boek op aan haar Libanese pa, Richard Phillippe Joseph (1939-2018). Sy het in Douglas in die Noord-Kaap grootgeword en van kleins af met trots gesê dat sy Libanees is. Tog was haar enigste ware verbintenis met die land deur kos. Daarom het sy middae ná skool en naweke in die kombuise van haar familie deurgebring waar sy in die geure van hul kospotte haar identiteit gevind het. ’n Belofte aan haar pa op sy sterfbed het haar die eerste keer na die land van haar herkoms geneem.

Handsakbrood

Die pragtige handsakbrood (ka’ak) het onmiddellik my oog gevang. Sophia vertel: “Ka’ak is die Arabiese woord vir ‘koek’. In Libanon is ka’ak spesifiek brood wat soos ’n handsak of beursie lyk en met sesamsaad bedek is.

“Straatverkopers beweeg deur die stede om ka’ak as ’n peuselhappie aan die plaaslike inwoners te verkoop. Sommige verkopers sal die brood oopsny en dit met za’atar, ’n mengsel van kruie en speserye, of ’n plaaslike kaas vul.

Libanon se strate is volgepak van kleurvolle kos. Foto: Verskaf

“Ka’ak is bros aan die buitekant, lig aan die binnekant en werklik eenvoudig om te maak. Ek hou daarvan om dit voor te sit met ’n sagte, wit kaas wat met heuning bedruip is of dit oop te sny en za’atar oor te strooi.”

Going Home is ’n uitsonderlike verhaal van iemand se soeke na identiteit en ek kan dit sterk aanbeveel.

Gaan sit aan by Sophia se tafel en ervaar die lewe in al sy Libanese kleur en geur.

Hoendersop met freekeh en lensies

Lewer 6-8 porsies

120 ml olyfolie

1 mediumgrootte bruin ui, geskil en grof gekap

250 g knopiesampioene, gesny

3 wortels, geskil en in blokkies gesny

75 g seldery, gesny

1½ liter hoenderaftreksel

850 g hoenderstukke, vel verwyder

seesout

varsgemaalde swartpeper

1 t harissa-speserye of -pasta

1 blik (400 g) lensies, gedreineer en afgespoel

1 k freekeh

Verhit die olie in ’n kastrol en braai die uie en sampioene tot effe bruin. Voeg die wortels en seldery by en kook vir ’n verdere 5 minute.

Verhit die hoenderaftreksel. Voeg die hoenderstukke by die mengsel in die kastrol en giet die warm aftreksel oor. Kook 1 uur op medium-lae hitte. Haal die hoenderstukke uit en verwyder die vleis van die bene.

Kap die hoendervleis grofweg en plaas terug in die aftreksel. Gooi die bene weg.

Geur met sout en peper en voeg die harissa by.

Voeg die lensies en freekeh by en kook nog 1 uur teen lae hitte.

Sit voor.

Foto’s: Hein van Tonder

Ka’ak (Handsakbrood)

Lewer 4

¾ koppie warm melk

2 eetlepels suiker

10 g aktiewe droë gis

2 koppies koekmeel

1 koppie volkoringmeel

1 teelepel sout

1 eetlepel olyfolie

lou water, genoeg om ’n sagte deeg te maak

melk, om oor te verf

sesamsaad, om oor te strooi

Verhit die melk effens, voeg dan die suiker en gis by. Meng goed en sit 10 minute eenkant om te gis tot skuimerig. As jy ’n menger gebruik, plaas die koek- en volkoringmeel, sout, olyfolie en gismengsel in die mengbak. Gebruik die deeghaak en meng tot ’n deeg. Voeg ’n bietjie louwarm water by, indien nodig. Die deeg moet sag maar nie klewerig wees nie.

As jy nie ’n menger met ’n deeghaak het nie, is dit maklik om dit met die hand te doen. Haal die deeg uit die mengbak en knie ongeveer 10 min. op ’n oppervlak wat liggies met meel bestrooi is. Plaas in ’n bak wat liggies gesmeer is.

Bedek en laat rys tot dubbel in grootte. Wanneer die deeg verdubbel het, knie 1 min. om ’n bal te vorm.

Plaas terug in die gesmeerde bak dat dit weer kan rys totdat die grootte verdubbel het. Verhit die oond tot 180 °C. Nadat die deeg die tweede keer gerys het, verdeel dit in vier gelyke dele en plaas op ’n oppervlak wat liggies met meel bestrooi is.

Voer ’n bakplaat met bakpapier uit. Werk met een deegbal op ’n slag en rol dit uit in ’n langwerpige vorm, soos ’n traandruppel, van net meer as 1 cm dik. Gebruik ’n ronde koekiedrukker om ’n ring van die smal deeggedeelte uit te druk. Plaas op die bakplaat en herhaal totdat al vier klaar is.

Verf met melk en strooi sesamsaad oor. Druk die sesamsaad liggies in die deeg in. Bak die brode een vir een vir 10-12 min. tot goudbruin.

Roteer die pan ná 8 min. sodat die brood egalig verbruin.

Going Home kos R450 en word uitgegee deur Annake Mu¨ller Publishing. Foto’s deur Hein van Tonder. Rapport se lesers kan die boek direk by Annake bestel – vir R400 – deur e-pos te stuur na annakem@ mweb.co.za.

Waar kry ek dit?

Harissa-speserye of -pasta is by goeie kruidenierswinkels beskikbaar. Za’atar kry jy by Woolworths. Freekeh word gemaak van durum-koring en jy kan dit by spesialiteitswinkels koop. As jy dit nie in die hande kan kry nie, vervang dit met koring of gort.

Meer oor:  Anél Potgieter  |  Libanese Kos  |  Kostelik  |  Resepte
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.