Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Anél Potgieter: Seekos bly maar ’n fees vir smul

Die uitsig van Den Anker laat dié eetplek se kos nóg lekkerder smaak. Foto’s: Anél Potgieter
Of jy ’n koskenner of iemand is wat net van lekker en goeie kos hou, is Den Anker (V&A Waterfront) en The Foodbarn (Noordhoek) in die Kaap net die eetplekke vir jou.

Ons het onlangs weer by albei gaan smul en ek is van voor af verlief op hul heerlike seekosgeregte.

Den Anker

Terwyl die prentjiemooi Tafelberg vir ons gelê en loer het, het ons weggelê aan diepgebraaide, goudbruin bitterballen met ’n sagte strepie mosterd en gestoomde mossels met ’n witwyn-roomsous.

Den Anker se mossels is beslis die beste wat ek al in ’n restaurant geëet het, perfek gaar gestoom, plomp en sappig.

Saam met bros aartappelskyfies en tuisgemaakte mayonnaise was ek in die koshemel. Die Sondag toe ons daar was het hulle ’n spesiale aanbieding gehad en ons het R100 vir twee porsies bitterballen en R225 vir twee hoofgeregporsies Weskus-mossels betaal.

Foodbarn se bouillabaisse.
The Foodbarn

Wanneer my Ier my wil bederf, neem hy my na Noordhoek om die sjef Franck Dangereux se bouillabaisse (Franse seekossop) met vis, mossels, garnale, saffraan en daardie heerlike rouille te eet. Rouille is ’n tipe knoffelmayonnaise wat ook rooi soetrissie bykry. Franck se bouillabaisse vertoon soos ’n eksotiese kunswerk op die tafel en bied onvergeetlike seekossmake. The Foodbarn is amper ’n dagreis van my huis, maar daardie bouillabaisse saam met ’n glas yskoue chenin blanc is elke kilometer se ry die moeite werd.

Anél se liplekker seekossop

Moenie dat die lang lys bestanddele van die resep jou afsit nie – die meeste het jy in jou kas. Dit is geurig en is goeie kompetisie vir Franck se bouillabaisse.

Ek bedien dit met ’n Franse baguette en ’n tikseltjie gremolata.

Groete uit my kombuis

Anél

anelpot@gmail.com

Seekossop

Resep: Anél Potgieter

Vir die visaftreksel

  • 350-500 g stokvis, in stukke gesny (hier gebruik ek sommer die vel aan)
  • 1 liter water
  • 1 selderystok, gekap
  • 1 ui, in die helfte gesny
  • 1 wortel, gekap
  • 5 swartpeperkorrels
  • 2 knoffelhuisies, gerasper
  • 1 klein bossie pietersielie

Seekos

  • 24-30 mossels in die halwe skulpe (gevries)
  • 12-15 garnale (bevrore, ek hou die koppe aan)
  • 400 g koningklip (of enige ander ferm vis), in groot blokke gesny

Ander bestanddele

  • 30 g botter
  • 45 ml meel
  • 10 ml masala of kerriepoeier na smaak
  • 30 ml tamatiepasta
  • 1 ½ hoenderaftreksel-blokkie, gekrummel
  • 2 groot ryp tamaties, geskil en in baie klein blokkies gekap
  • sap van ½ suurlemoen

Vir die gremolata

  • 30 ml pietersielie, gekap
  • 1 knoffelhuisie, gerasper
  • gerasperde skil van een suurlemoen
  • 1 groot skeut suurlemoensap
  • 30 ml olyfolie

Kook die aftrekselbestanddele in ’n pot vir so 20 minute. Gooi die bevrore mossels in ’n vergiettes en dompel dan (in die vergiettes) in die warm aftreksel vir 2 minute en haal weer uit. Dit ontvries en hul heerlike sappe verryk die visaftreksel. Doen dieselfde met die garnale, maar haal eers ná 4 minute uit. Gooi die aftreksel nou deur ’n sif. Hou die vis vir ’n toebroodjie of maak baie fyn en gooi dit terug by die aftreksel.

Smelt die botter in ’n groot pot. Voeg die meel by om ’n roux te maak. Roer vir 1 minuut. Voeg dan die tamatiepasta en masala of kerriepoeier by. Roer goed.

Gooi die warm aftreksel soplepel vir soplepel by terwyl jy aanhoudend klits met ’n ballonklitser om klonte te voorkom. Sodra al die aftreksel bygevoeg is, bring dit tot kookpunt en laat prut vir n paar minute.

Skep die rou vis versigtig by en prut gaar vir so 3 minute. Voeg die garnale, mossels, tamatie en suurlemoensap by en prut vir 7-10 minute.

Meng al die gremolata-bestanddele saam en bedien ’n skeppie bo-op ’n warm bakkie sop.

Den Anker se heerlike bitterballen.
Bitterballen

Resep: Anél Potgieter

Genoeg vir 4

  • 400 g varkworsievleis (of gaar gammon of ham fyngesny, gaar bruingebraaide maalvleis)
  • 30 ml olyfolie
  • 1 knoffelhuisie, gerasper
  • blaartjies van een vars tiemietakkie
  • 75 g botter
  • 85 g meel
  • 225 ml volroommelk, warm gemaak
  • knippie neutmuskaat
  • sap van ’n halwe klein suurlemoen
  • 1,25 ml sout
  • 1,25 ml swart peper
  • 2 eiers, geklits
  • 125 g broodkrummels
  • olie vir diepbraai
  • Dijon-mosterd

Braai die gemaalde varkworsievleis in die olie vir 7 minute of tot goudbruin.

Gebruik die agterkant van ’n vurk en maak die vleis daarmee los. Voeg die knoffel en tiemie by en braai vir nog ’n minuut of twee. Verwyder van die hitte en laat afkoel.

Plaas die botter in ’n kastrol en smelt oor lae hitte. Verwyder van hitte en voeg die meel by. Roer baie goed totdat dit ’n gladde pasta vorm. Plaas roux terug op stoofplaat en voeg die warm melk stadig by terwyl jy heeltyd roer met ’n ballonklitser om klonte te voorkom. Hou aan roer totdat die sous verdik het.

Roer nou die neut en suurlemoensap by. Proe en geur met sout en peper.

Voeg die varkworsievleis by, meng goed en laat heeltemal afkoel.

Verdeel nou die mengsel in gholfbalgrootte balletjies. Rol balletjies een vir een eers in die eier en dan in die krummels tot elke balletjie goed bedek is met die krummels. Diepbraai in olie teen 180 °C tot goudbruin. Dreineer op kombuispapier. Bedien dadelik saam met Dijon-mosterd.

Meer oor:  Seekos  |  Anel Potgieter
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.