Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Kostelik:
Franse kaas op George
Roomkaas, mascarpone, crème fraîche ?.?.?. lekker bly lekker

Ek was die afgelope week so lus vir ’n New York-styl gebakte kaaskoek en moes net my voorskoot aantrek om een aanmekaar te slaan. Gelukkig het een van Kiri-roomkaas se resepte in my inboks gelê en soos hulle sê: Die res is geskiedenis. My banting ook! Dié klassieke en weelderige kaaskoek is maklik om te maak en met die stroperige appelkose in roosmarynstroop bring dit iets nuuts na die koekbordjie.

Kiri nou in George gemaak

Die gewilde Franse kaasprodukte Kiri-roomkaas en The Laughing Cow word nou in George op die Tuinroete gemaak. Hierdie twee vlagskipprodukte in die stal van die Bel-groep, ’n Franse suiwelmaatskappy wat reeds in 1865 gestig is, moes tot nou toe ingevoer word. Plaaslike vervaardiging van Kiri sal aanvanklik fokus op die 200 g- ovaal houers, ’n verpakkingsgrootte wat ideaal is vir bak en kook.

Roomkaas vs. mascarpone vs. crème fraîche

Roomkaas is ’n sagte, gladde vars kaas wat van vars room en melk gemaak word. Melksuur-bakterie word bygevoeg wat die pH verlaag en die wrongel van die wei laat skei. Nadat die wei gedreineer is, word die wrongel verhit en ’n stabiliseerder bygevoeg. Siedaar, roomkaas.

Mascarpone is ’n Italiaanse tipe roomkaas. Roomkaas en mascarpone se eerste stap stem taamlik ooreen, deurdat dit gemaak word van melk en room met ’n suur by; die groot verskil is dat roomkaas se vetinhoud laer is, wat die smaak en tekstuur anders maak. Waar mascarpone baie ryk, amper botterig is, is roomkaas met sy laer vetinhoud steeds romerig en glad, maar met ’n effense surigheid wat deur die vetterigheid sny. Dit maak roomkaas baie geskik vir sout sowel as soet geregte, en natuurlik ikoniese gebak soos gebakte kaaskoek.

Crème fraîche is Franse aangesuurde room en het ’n hoër suurinhoud.

Hoe om roomkaas te stoor

As jy dit in die yskas hou nadat dit oopgemaak is, sal dit sowat 10 tot 12 dae hou. Roomkaas moet liefs nie bevries word nie, want dit maak die tekstuur krummelrig; wat kan werk vir gebak, maar nie vir smere of doopsous nie.

Hoe om te weet of die kaaskoek klaar gebak is

Terug by die kaaskoek. Wanneer dit klaar gebak is, moet die buitenste randjie van die kaaskoek effe opgepof en geset lyk, maar die binneste sirkel moet nog effe dril (soos gestolde jellie).

Hoe om te weet of dit nie genoeg gebak het nie

Bak verder indien die buitenste rand nog dril of as die binnekant meer vloei as dril, asof dit nog vloeibaar is onder die oppervlak. Bak verder en kyk weer elke vyf minute.

Hoe gemaak as dit te lank gebak het

As dit opgepof lyk in die middel van die koek, of kraak, skakel die oond dadelik af en los die oonddeur effe oop. Laat heeltemal afkoel. Moenie dat die krakies jou afskrik nie – dit gaan steeds goed smaak.

Kaaskoek se kors

Kaaskoek het ’n lekker stewige krummelkors nodig wat nie sommer sal sag raak onder die nat vulsel nie. Bring vernuwing met ’n kombinasiekors van jou gunsteling-koekies soos semelbeskuitjies (digestive), brosbrood (shortbread), gemmerkoekies of hou by die goeie ou tennisbeskuitjie.

Groete uit my kombuis,

Anél

anelpot@telkomsa.net

  • Volg Kiri-kaas by: #ForAllForGood #BelSouthernAfrica #kiricreamcheesesa #thelaughingcow

Gebakte kaaskoek

    Kaaskoek soos die New Yorkers daarvan hou, bedien met Turkse appelkose. Foto: Anél Potgieter

    (Met Turkse appelkose in roosmarynstroop)

    Kors:

    200 g tennisbeskuitjies, gekrummel

    15 ml suiker

    knippie sout

    65 ml (60 g) gesmelte botter

    Vulsel:

    3 x 200 g houers Kiri-roomkaas, teen kamertemperatuur

    220 ml (180 g) suiker

    knippie sout

    7 ml vanielje-ekstrak of 50 ml suurlemoensap

    3 groot eiers

    120 ml suurroom

    120 ml room

    Voorverhit oond tot 175 °C. Smeer die kante van ’n klampkoekpan van 20 cm in deursnee en 7 cm diep met gesmelte botter. Hou ’n groot, diep oondpan reg vir die waterbad.

    Kors: Meng die beskuitjiekrummels, suiker en sout in ’n groot mengbak en roer die gesmelte botter by. Druk die krummelmengsel met jou vingers vas op die bodem van die koekpan, met net ’n effense opdraandetjie om die binneste rand. Bak die kors vir tien minute, verwyder uit die oond en laat afkoel voordat die oondpan toegedraai word in foelie. Draai die buitekant van die koekpan toe met drie lae sterk foelie: Plaas die koekpan in die middel van die foelie en vou die kante versigtig op rondom die koekpan. Krimp die foelie versigtig oor die boonste rand van die pan. Verminder die oondtemperatuur tot 160 °C.

    Vulsel: Plaas die roomkaas in ’n voedselverwerker se mengbak. Meng met ’n spaanhegstuk op mediumspoed vir drie minute tot lig en donsig. Voeg die helfte van die suiker by en meng vir twee minute, skraap die binnekant en voeg die res van die suiker by en meng vir nog twee minute. Voeg die sout en vanielje of suurlemoensap by en meng deur. Voeg die eiers een vir een by en meng vir ’n minuut ná elke toevoeging. Skraap die binnekant, voeg die suurroom en room by en meng tot gekombineer. Giet die mengsel oor die krummelkors in die koekpan en maak die bokant gelyk met ’n spaan. Plaas die koekpan in ’n diep oondpan en plaas op die laagste rak in die oond. Giet kookwater versigtig in die oondpan totdat die koekpan halflyf onder water is.

    Bak: Bak vir 90 minute teen 160 °C. Sien notas elders op die blad om te weet wanneer die kaaskoek reg is. Skakel die oond af en laat die koek afkoel in die oond met die oonddeur effe oop. Hierdie stadige afkoelproses keer dat die kaaskoek kraak. Haal uit en bedek die bokant van die kaaskoek met foelie, laat verder heeltemal afkoel vir vier uur of oornag voordat dit na die yskas gaan.

    Turkse appelkose in roosmarynstroop: Plaas 180 g sagte Turkse appelkose, 180 ml heuning en 3 roosmaryntakkies in 750 ml water in ’n mediumgroot kastrol, bring tot kookpunt oor matige hitte en prut vir tien minute. Verwyder die appelkose met ’n gaatjieslepel en kook die stroop met die roosmaryn totdat dit verdik, sowat 25 minute. Verwyder die roosmaryn. Giet die stroop oor die appelkose en laat afkoel. Plaas in ’n glashouer en bedien met die kaaskoek.

    Meer oor:  Kos  |  Resepte  |  Kaaskoek  |  Kostelik  |  Resensie
    MyStem: Het jy meer op die hart?

    Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

    Ons kommentaarbeleid

    Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

    Stemme

    Hallo, jy moet ingeteken wees of registreer om artikels te lees.