Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Kostelik:
Happies vir ’n heerlike Oujaar

Op die drumpeltjie van die Nuwejaar kyk ek na my Ier, my twee hondekinders, ma Babs, my broers en hul kinders, my vriende, die see, jul pragtige briewe wat ek weekliks ontvang, my gesondheid, my werk wat my tone laat krul van die lekkerte en besef ek dit maak nie saak hoe annus horribilis jou jaar was nie, daar is altyd stof tot dankbaarheid.

Ja, dit was ’n rowwe jaar vir baie en vir ons land, maar ek is opgewonde om 2020 met ywer te omhels. Maar voor ons dit doen, moet ons beplan om 2019 met fanfare en ’n heerlike Oujaarsaandpartytjie te groet. Ná Kersfees beloof ek my handjies die saligheid en ek het by Nina Timm, bekroonde blogger (My Easy Cooking) en kookboekskrywer, gaan aanklop vir idees.

Nina Timm se snoephappiesNina, wat ook kookklasse aanbied, stel die volgende verskeidenheid snoephappies voor: kaas-en-biltong-balletjies, crostini met gerookte salm en ertjie-pesto, geklopte bloukaassmeer, gatskop-samoesas en geroosterde druiwe met bokmelkkaas.

En van my kant af, baie dankie dat julle my rubriek die afgelope ses en ’n half jaar lees en soveel terugvoering gee.

Ek waardeer elke e-pos en geselsie oor die foon. Voorspoedige 2020 vir julle almal – mag jou jaar net vol liefde, geluk en pragtige herinneringe wees.

Groete uit my kombuis

Anél

anelpot@telkomsa.net

Geroosterde druiwe met bokmelkkaas

Foto’s: nina timm

Bedien 6-8

1-2 groot trosse rooi druiwe

125 ml okkerneute

klein bietjie heuning

100 g bokmelkkaas (Fairview is bekend vir hul heerlike bokmelkkaas)

1 baguette

vars tiemie

sout

Voorverhit die oond tot 200 °C. Plaas die druiwe op ’n bakplaat wat met kleefwerende middel gespuit is. Rooster die druiwe vir omtrent 20 minute.

Sommige korrels moet oopbars en ander al bietjie stroperig wees. Haal uit die oond en bedruip met bietjie heuning.

Plaas die snytjies brood en okkerneute op ’n bakplaat en rooster tot die brood goudbruin is. Bedruip die okkerneute ook met bietjie heuning en geur met klein bietjie sout. Smeer bokmelkkaas op elke broodjie en sit geroosterde druiwe en okkerneute op net voor opdiening.

Gatskop-samoesas

500 g varkmaalvleis

2 eetlepels olyfolie

2 groot sprietuie, fyngekap

2-3 rooi rissies

3 teelepels gerasperde vars gemmer

2 knoffelhuisies, gerasper

2 eetlepels tamatiepasta

1 teelepel suiker

gerasperde skil en sap van een lemmetjie

2 eetlepels sojasous

3 eetlepels gekapte vars koljander

24 samoesavelle

Sriracha-sous vir opdien (koop dit by ’n goeie kruidenierswinkel)

Verhit die olie in ’n pan. Voeg die uie, gemmer, knoffel en rissie by en braai oor lae hitte.

Voeg die varkmaalvleis by en gebruik ’n vurk om die vleis op te breek sodat jy ’n krummel­rige tekstuur het.

Voeg die suiker, tamatiepasta en sojasous by en kook vir 10 minute.

Verkoel en voeg dan die gekapte koljander by. Maak die samoesas en braai in warm olie tot gaar.

Bedien met Sriracha-sous. Die samoesas kan voor die tyd gemaak word. Vries op ’n bakplaat en braai wanneer nodig. 

Dit kan uit die vrieskas gebraai word.

Geklopte bloukaassmeer

Geklopte bloukaassmeer
Geklopte bloukaassmeer

Maak omtrent 500 g

2 x 100 g bloukaas (Fairview het ’n heerlike sterk bloukaas)

200 g roomkaas

skil en sap van een lemmetjie

growwe swart peper na smaak

Plaas al die bestanddele in ’n voedselverwerker en prosesseer tot ’n gladde smeer. Skep in glasfles en verkoel tot nodig. Dis heerlik op kraakbeskuitjies met skyfies rooiui, babakruie en komkommer.

 

Kaas-en-biltong-balletjies

Maak 20

1 x 100 g bokmelkkaas (Ek verkies Fairview se kaas)

1 x 100 g fetakaas

50 g kasjoeneute

’n handjievol vars pietersielie

250 ml fyn biltong

Plaas die kase, neute en kruie in ’n voedselverwerker en prosesseer tot ’n gladde smeer. Rol balletjies en rol dan die balletjies in die fyn biltong. Hou in yskas tot benodig. Bedien saam met drankies.

Gestopte vye

Gestopte vye
Gestopte vye

Maak 6

6 vye - ek verkies die groen vye met sagte skil

20 g parmesaankaas

30 g amandels, fyngekap

2 takkies vars tiemie

6 stukkies pancetta of spek

bietjie heuning

balsamiese reduksie vir bediening

babakruie

Voorverhit oond tot 180 °C. Maak ’n kruissnit in elke vy, maar moenie deursny nie. Plaas kaas, neute, tiemie en lemoenskil in ’n bakkie en meng.

Skep ’n bietjie van die vulsel in elke vy. Rol die pancetta om elke vy en steek vas met ’n tandestokkie.

Plaas vye op ’n bakplaat en bak tot die pancetta brosbruin is.

Bedien met die balsamiese reduksie en vars babakruie.

Crostini met gerookte salm en ertjie-pesto

Crostini met gerookte salm en ertjie-pesto
Crostini met gerookte salm en ertjie-pesto

Maak +- 40

Ertjie-pesto

250 g bevrore ertjies

4 eetlepels gerasperde parmesaan

gerasperde skil en sap van een suurlemoen

sout en growwe peper na smaak

2 eetlepels olyfolie

Crostini

2 baguettes

2 x 250 g roomkaas

500 g gerookte salm (koop plaaslike salm van Three Streams)

vars kruie vir bediening

sout en peper

Ertjie-pesto: Vul ’n klein potjie met water en bring tot kookpunt. Blansjeer die ertjies in die kookwater vir 5 minute.

Gooi ertjies in sif en spoel onder koue water. Plaas ertjies, parmesaan, sap en suurlemoenskil in ’n voedselverwerker en pols tot growwerige tekstuur. Voeg olyfolie by en geur met sout en peper. Die pesto kan vooraf gemaak word en in die yskas gehou word tot benodig.

Crostini: Sny brode in snytjies van 1 cm. Rooster die broodjies op ’n riffelpan of in die oond. Smeer elke broodjie met roomkaas. Skep ’n bietjie ertjiepesto op elke broodjie en sit laastens die salm op. Garneer met vars kruie.

 

Volg Nina só: Besoek: www.my-easy-cooking.com | Kookklasse: Besoek die webblad vir datums en temas. | Facebook: My Easy Cooking | Twitter: @ninatimm | Instagram: @easycooking

 

Meer oor:  Resepte  |  Anél Potgieter  |  Resep  |  Kostelik
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.