Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Kostelik: Jean Louis se patathoender
Margit en die sjef Jean Louis met hul topverkopers patathoender en pap-en-vleis. Foto’s: Anél Potgieter

Teater vervul my binneste, maak my gelukkig en verkwik my siel. En as teater saam met kos kom, wel, dan is ek so verdiep in die lekkerte dat jy my maar tot in epidermiese proporsies kan Whats­App of Facebook, maar jy gaan niks van my hoor nie.

Ongelukkig is die meeste kos in restaurantteaters bleek en smaakloos. Dit is óf ’n loperige flou kerrie óf afgewaterde buffet en dan moet jy in ’n lang tou staan soos op stemdag. Ek verloor sommer my lus vir die hele spulletjie voor die vertoning begin. Maar dis nie die geval by Die Boer in Durbanville nie. Hier kry jy toprestaurantkos teen goeie pryse en vanaf Snotkop tot Pieter-Dirk Uys wat jou vermaak. Wat wil jy nou meer hê?

Die Boer

Die Boer is die breinkind van Margit Meyer-Rödenbeck (onse land se nimlike Dowwe Dolla) en haar man, Jurgen Human. “Ons wou ’n teater skep waarheen óns wou gaan. ’n Plek waar jy goeie teater, goeie kos en goeie wyn saam met jou vriende kan geniet. Dit help mos nou nie die teaterstuk is goed maar die kos is **** nie. En hier is ons vandag, 12 jaar later,” vertel die passievolle, talentvolle en pragtige vrou sonder haar kenmerkende rooi lollipop in die hand.

Die Boer se kos

Sy skryf Die Boer se sukses nie net toe aan die briljante talent wat daar optree nie, maar ook aan die sjef Jean Louis Geldenhuys, wat nou al tien jaar daar werk. Jean Louis se spyskaart is seisoenaal en hy maak net van produkte van die beste gehalte gebruik. “Ons topverkopers is die patat­hoender, pap-en-vleis en die beetslaai. Ons porsies is groot en regtig waarde vir geld,” sê Jean Louis.

Ek moet erken die patathoender is van die boonste rakke; dit begin met ’n lagie romerige parmesaanrisotto, ’n stukkie ­soetpatat, gebraaide hoender en dan my gunsteling- Griekse kaas, halloumi. Wat die seisoenale beetslaai besonders maak, is die pikante soetrissiesous wat sy kop so hier en daar op die bord uitsteek.

So, haal jou lollipop uit jou mond, sit die TV af en gaan eet en kuier by die talentvolle mense van Die Boer. Maar jy móét bespreek – hierdie juweel is erg gewild ­onder die Kapenaars.

Groete uit my kombuis,

Anél

lifeisazoobsicuit.com | anelpot@telkomsa.net

Jean Louis se patathoender 

Genoeg vir 4

Risotto

30 ml olyfolie

½ middelslag-ui, fyngekap

250 ml arborio-rys

125 ml witwyn

1 liter hoenderaftreksel

100 ml parmesaankaas, fyn gerasper

250 ml room

Soetpatat

3 mooi groot patats, geskil en in skywe ­gesny

100 g botter

250 ml suiker

1 kaneelstokkie

Soetrissiebotter

125 g botter

100 ml soetrissiesous (sien resep by ­beetslaai)

sout en peper

Halloumi

4 skywe halloumi

meel

olyfolie

Hoender

8 klein hoenderborsfilette

olie

sout en peper

braaisous van jou keuse

Só maak ’n mens

Risotto

Verhit olyfolie en braai die ui tot sag en deurskynend. Voeg die rys by en roer goed deur. Voeg die wyn by en laat afkook. Hou aan met roer. Gebruik ’n groot sop-opskeplepel om die aftreksel lepel vir lepel by te voeg. Maak seker dat die vloeistof basies weggekook het voordat jy die volgende ­lepel byvoeg. Hou aan roer en gaan so voort totdat die rys al dente (net gaar) is. Roer die parmesaankaas by en verwyder van die hitte. Hou warm.

Soetpatat

Plaas al die bestanddele in ’n pot met ’n deksel op. Kook op matige hitte tot patat net sag begin raak. Hou dop en voeg ’n bietjie water by indien nodig. Haal deksel af en kook verder tot stroperig en gaar. Hou warm.

Soetrissiebotter

Smelt die botter en rissiesous saam. Hou warm.

Halloumi

Rol die halloumi in die meel en braai in olie tot goudbruin aan albei kante.

Hoender

Geur die hoender met sout en peper en braai in pan. Verf die hele tyd met braaisous.

Bediening

Roer bietjie room deur die risotto. Dit moet die vorm kan behou as dit met ’n lepel geskep word – so voeg bietjies-bietjies by, want jy mag dalk nie al die room benodig nie. Skep ’n groot lepel risotto in die middel van die bord. Sit sowat 3-4 skywe patat bo-op die risotto, gevolg deur een hoenderborsie. Plaas nou die halloumi bo-op die hoender. Plaas weer ’n stukkie hoender bo-op. Sit voor met ’n suurlemoenwiggie en soetrissiebotter langsaan.

Beetslaai met soetrissiesous

Genoeg vir 4

Soetrissiesous

1 rooi soetrissie

olyfolie

sout en peper

60 ml fyn maaskaas

125 ml koppie melk

30 ml heuning

5 ml witwynasyn

Slaai

500 g beet

sout en peper

50 ml bruinsuiker

45 olyfolie

125 g bokmelkkaas, in skywe gesny

roketblare

16 kersietamaties, gehalveer

16 skyfies komkommer

20 dun skyfies parmesaan (sny met groenteskiller)

olyfolie

Só maak ’n mens

Voorverhit oond tot 200 °C. Plaas soetrissie op oondvaste bord en steek ’n paar gate in met ’n skerp mes. Vryf met olyfolie en geur met sout en peper. Bak 20-25 minute tot vel begin verkleur en soetrissie sag is. Plaas dadelik in ’n bak en bedek met kleefplastiek. Rus vir 10 minute, trek dan die vel af en verwyder die pitte. Laat afkoel. Plaas saam met die maaskaas, melk, heuning en asyn in ’n voedselverwerker en verwerk tot fyn. Geur met sout en peper. Kook die beet tot net sag. Terwyl die beet nog warm is, vryf die skille af onder lopende koue water. Sny in wiggies. Plaas beet op ’n bakplaat en sprinkel met ’n bietjie sout, peper en die bruinsuiker. Meng olyfolie deur en bak vir 8-10 min teen 200 °C. Laat afkoel. Rangskik die beet, bokmelkkaas, roket, kersietamaties, komkommer en parmesaankaas op vier borde of op een groot bord. Stip die soetrissiesous oor die slaai en rond af met ’n bietjie olyfolie.

Meer oor:  Anél Potgieter  |  Sondagmaal  |  Resepte
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

NETWERK24 Stemme

Hallo, jy moet ingeteken wees of registreer om artikels te lees.