Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Kos en Wyn
Kostelik:
Lekker vingers aflek...

’n Mens kan skaapstertjiesnét met jou hande eet

Ek kry nou die dag dié briefie van Johann Joubert van Kaapstad:

More Anél,

Baie dankie vir jou rubriek in Rapport, asook die manier hoe jy dit aanbied. Puik! Ek mis dit nooit en los dit tot laaste. My hele lewe lank los ek altyd die beste vir laaste, net soos ek met my kos ook maak. Die lekkerste word laaste geëet.

Ek wil net graag by jou vasstel wat die beste manier is om skaapstertjies voor te berei. Om een of ander rede het ek nie hiermee grootgeword in die huis nie. Alhoewel ek op die platteland grootgeword het, ons baie skape geslag en die afval gaargemaak het, ensovoorts.

Ek het maar so “gegoogle” en kook dit eers vir so ’n uur in water. Dan braai ek dit op die kole of bak dit in die oond met ’n marineersousie. Ek vermoed daar moet beter maniere wees om so ’n stukkie koningskos voor te berei.

Groete en sterkte met die rubriek en jou loopbaan vorentoe.

Dankie, Johann – en jitte, jy laat my nou vér terugdink en verlang, want ek het met skaapstertjies in die Vrystaat grootgeword en dit is die eerste ding wat ek altyd gedeps het wanneer daar ’n skaapboud met ’n stertjie op die eetkamertafel beland het.

As kind het ek en my maatjies die stertjies met wol en al in die vuur gegooi. Vir hoe lank kan ek nie onthou nie. Wanneer die wol swart en hard gebrand het, is dit met vel en al afgetrek en dan het ons die stertjies net daar in die veld met sout en peper geëet.

Deesdae is skaapstertjies so skaars soos hoendertande en almal het te grênd geraak om hul mond aan dié lekkerny te sit. Dit is gerus iets wat die Banting-verslaafdes weer kan begin trendy maak, want, kyk, dit is nie iets wat op ’n gewone Mej. Suid-Afrika se verslankingsdieet gaan verskyn nie.

Louwtjie de Beer, Jan de Jong, Charl van Rooyen en Joel Herholdt aan’t smul aan die klewerige skaapstertjies met suurlemoensout by Landbouweekblad se 100ste verjaardagviering by die Nampo-oesdag in Bothaville. Foto: Johan Norval, Landbouweekblad

Anél se skaapstertjies

As ek ’n paar stertjies in die hande kry, plaas ek hulle in ’n oondbak en gooi genoeg sout en bietjie witpeper oor. Bedek die bak met foelie en bak vir ’n uur teen 180 °C in die oond. Haal die foelie af en bak ’n verdere 30 minute oop tot mooi bruin. Sonder fieterjasies.

Eet dit asseblief saam met ’n lekker stuk vars brood in die hand en vee die vet op uit die pan so tussen die happies deur.

Deesdae skop jy egter nie sommer skaapstertjies agter elke bos uit nie. Wanneer jy dit wil maak, bel jou slagter dat hy dit vir jou kan bymekaarmaak.

Arina du Plessis se skaapstertjies

Arina du Plessis, kosredakteur van Landbouweekblad, het vir Landbouweekblad se 100ste verjaardagviering by Nampo vanjaar 600 klewerige skaapstertjies met suurlemoensout gemaak. Sjoe, waar was ek?

Arina vertel: “Die klewerige skaapstertjies was een van die geregte wat die meeste aftrek by die gaste gekry het. Die stertjies is oor die kole gebraai, en daarna met suurlemoensout gegeur. Die vars sitrusgeurinspuiting is die ideale teenvoeter vir die ryk vleis.

“Elkeen wat ’n skaapstertjie ken en daarvoor lief is, het sy voorkeur-manier om dit gaar te maak. Ons ken almal die stories wat ons pa’s en oupas vertel oor hoe hulle ná slagdag die sterte sommer so met wol en al in die kole gegooi het om gaar te word, en dan word die vel net afgestroop voordat hulle kon smul (nee, dis nie stories nie, Arina, ek het dit self gedoen).

“Baie verkies weer om die stertjies stadig oor die kole gaar te maak en dit nie eers vooraf ’n bietjie sag te kook nie. My manier is om die stertjies eers sag te kook, dit te dreineer en dan met ’n soet-suur marinade te smeer voordat ek dit in die oond rooster, of nog beter, oor die kole braai tot klewerig, goudbruin en vingerleklekker.”

Theresa de Vries se skaapstertjies

My vriendin Theresa de Vries van Brandvlei by wie ek my skaapvleis koop, het die volgende reseppie per WhatsApp gestuur:

“Hi Nella, ek maak nie fênsie stertjies nie. Kook stertjies in water met ’n heel ui, wortel, seldery, sout en peper tot sag. Haal uit, laat afkoel en gooi die marinade (resep op blad) oor. Laat oornag so lê en bak in die marinade tot klewerigof haal uit marinade en braai oor kole. Dis ook lekker net so plein gaargekook en dan lekker bruin gebraai met chimichurri-sous. Dit breek darem die vetterigheid.” Lekker, man!

En toe kry ek die volgende WhatsApp van Theresa wat sommer ’n groot glimlag op my gesig gesit het: “Die meeste van die tyd verf ek sommer koopsous oor.”

Ek stem saam, vriendin, ek is ook nie ’n kossnob nie – as jy ’n botteltjie kan gebruik, gebruik hom. Dit spaar baie tyd en soos ek altyd sê: “Your kitchen, your rules.”

Johann, ek hoop die rubriek gee jou inspirasie en wanneer jy weer skaapstertjies maak, stuur asseblief ’n foto’tjie of twee.

Groete uit my kombuis,

Anél

anepot@telkomsa.net

Skaapstertjies 

Skaapstertjies is heerlik met net sout en ’n bietjie peper, maar marinade maak dit nóg beter. Foto: iStock

De Vries se skaapstertjiemarinade

5 cm vars gemmer, gerasper

5 ml knoffelvlokkies of 2 knoffelhuisies, gerasper

125 ml sojasous

125 ml perskeblatjang

80 ml soetrissiesous

5 ml fyn koljander

125 ml heuning of appelkooskonfyt

125 ml of meer suurlemoensap, moet effens soetsuur wees

10 ml fyn suurlemoenskil

As jy dit bak, bak oop in oond.

Du Plessis se skaapstertjies

Lewer 4 porsies

1 kg skaapstertjies

Marinade

sap van 1 suurlemoen

60 ml olyfolie

30 ml worcestersous

15 ml gladde appelkooskonfyt

45 ml bruinasyn

sout en varsgemaalde swartpeper na smaak

5 ml gemaalde koljander

Sit die skaapstertjies in ’n pot met ligte soutwater. Verhit tot kookpunt en prut tot sag. Dreineer en skep in ’n oondbak wat groot genoeg is dat die stertjies in ’n enkellaag daarin kan lê. Meng suurlemoensap, olyfolie, worcestersous, appelkooskonfyt en asyn en giet dit oor die skaapstertjies. Geur met sout en peper en sprinkel koljander oor. Voorverhit oond tot 200 °C of kry jou kole reg. Bak of braai skaapstertjies in die marinade totdat die vleis goudbruin en die sous afgekook en klewerig is.

Meer oor:  Resepte  |  Kostelik
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.