Op VIA se kosprogram Maklik met Marinda gee Marinda Engelbrecht kitsklasse vir bekendes wat sukkel in die kombuis. Gideon Lombard, akteur, skrywer en musikant, is heel gemaklik agter haar kospotte, maar sy leer hom wel nuwe dinge: haar worspastei met Italiaanse sous, slaai en ’n blitsige sjokolademousse.

Worspastei met Italiaanse sous

Bestanddele vir pastei

1 rol skilferkorsdeeg

600 g gaar kapokaartappels

4 gaar varkworsies

250 ml gerasperde cheddarkaas

melk of ’n geklitste eier

Metode

Rol die deeg op ’n gesmeerde bakplaat oop.

Smeer ’n laag kapokaartappels oor.

Pak die varkworsies in ’n lang ry op die aartappels.

Smeer nog kapokaartappels bo-oor.

Strooi die kaas oor.

Rol die deeg toe soos ’n wors en sny kepe daarin. Verf met melk of eier.

Bak 40 minute by 180 °C.

Bestanddele vir Italiaanse sous

30 ml olyfolie

1 ui, in blokkies gesny

15 ml fyngekapte knoffel

5 ml tot 10 ml brandrissievlokkies

400 g bruin sampioene, in skyfies gesny

sout en peper na smaak

410 g heel tamaties, kleiner gesny of fyngedruk

410 g tamatiepuree

15 ml gewone asyn

suiker na smaak

45 ml basiliepesto of ’n handvol geskeurde basiliekruidblare

Metode

Verhit die olie in ’n pot en braai die ui liggies.

Voeg die knoffel en brandrissievlokkies by en braai tot geurig.

Sit die sampioene by en braai tot gaar.

Geur met sout en peper en roer die geblikte tamaties, tamatiepuree en asyn by.

Geur na smaak met die suiker en bring tot kookpunt. Verlaag die hitte en prut ’n halfuur of langer totdat jou sous dieprooi en lekker is.

Roer die pesto of basiliekruidblare in en bedien.

Peer-en-bloukaasslaai

Bestanddele vir slaaisous

90 ml olyfolie

20 ml wit druiweasyn

8 ml heuning

5 ml Dijonmosterd

Sout en peper

Meng al die bestanddele in ’n konfytfles en hou dit eenkant.

Slaai

90 ml okkerneute, grofgekap

6 koppies gemengde slaaiblare, fyner geskeur

10 dadels, fyner gesny

2 pere, in dun wiggies gesny

100 ml gekrummelde bloukaas

Metode

Rooster die neute in ’n pan.

Sit die res van die bestanddele in ’n bak. Krummel die bloukaas daaroor en giet die slaaisous oor.

Blitsige sjokolademousse

Bestanddele

1 boksie kitssjokoladepoeding-mengsel

30 ml kakaopoeier

1 liter room

Metode

Meng die sjokoladepoeding en kakaopoeier.

Voeg 750 ml room by en klits met ’n elektriese klitser tot lekker donsig.

Skep in glase.

Klits die orige room en sit bo-op. Sit in die yskas.

Versier met kersies of gerasperde sjokolade indien verkies.

• Nuwe episodes van Maklik met Marinda is Woensdae om 17:30 op VIA (DStv-kanaal 147).