Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Leef
40 keer bult uit vir bedreigde spesies, honger mense
Van die geld wat ingesamel is, gaan gebruik word vir die Kariega-wildreservaat se eenheid teen stropers. Foto: Twitter/Kariega Game Reserve

’n Suid-Afrikaanse atleet het geskiedenis gemaak toe hy vir 36 ure op sy fiets ’n vertikale klim vir ’n goeie doel aangepak het wat gelykstaande is aan die hoogte van Mount Everest.

Jamie Marais, ’n atleet wat aan ultra-uithouwedrenne deelneem, het dié avontuur gedurende die laaste naweek van Augustus in die Kariega-wildreservaat in die Oos-Kaap aangepak. Dit was om geld in te samel vir bedreigde dierespesies en om gemeenskappe te voed wat negatief deur die Covid-19-pandemie geraak is.

Hy het daarin geslaag om R400 000 in te samel vir die Kariega Foundation se eenheid teen stropers en vir programme wat help om die gemeenskap te voed.

Die vertikale klim op sy fiets was 9 000 m, teenoor Mount Everest se 8 845 m.

Marais het met die idee vorendag gekom ná ’n gesprek met Lindy Sutherland, direkteur van die Kariega Foundation.

Die twee was in gesprek oor die gevolge van die inperking, en hoe dit die toerismebedryf sonder enige inkomste gelaat het.

Die Covid-19-pandemie het ook ’n uiters negatiewe effek gehad op die wildreservaat se breër gemeenskap en die bewaringsprogramme wat dit bestuur.

Daar is dadelik aan die werk gespring toe ’n internasionale span hul tyd en kennis verleen het om die geleentheid te beplan en te bestuur.

Die span sluit die legendariese Britse fietsrykommentator Phil Liggett; Louwrens Mahoney, wat die Roof of Africa-motorfietsren drie keer gewen het; Paul Ingpen, die redakteur van Bike SA-tydskrifte; en die filmmaker Fergus Clark in.

Jamie Marais het deurnag ’n strawwe fietsren aangepak om geld in te samel vir bedreigde spesies en honger gesinne. Foto: Twitter/Michaela Strachan

Marais sê omdat dit vir ’n goeie doel was, het hy in bitter koue weerstoestande deurgedruk om die fietsroete, op ’n taai grondpad in die hartjie van die wildreservaat, 40 keer (337 km) ná mekaar aan te pak.

“Die wete dat weerlose diere en inwoners wat honger ly hulp nodig het, het my geïnspireer om deur te druk deur die nag toe temperature tot nul gedaal en die sneeu op hoogliggende gebiede begin val het, insluitend Tafelberg.

“Die skenkings wat mense uit hul harte gemaak het, het my die krag en die deursettingsvermoë gegee om langs wilde diere te ry, insluitend ’n olifantbul genaamd Charlie, wat deurentyd teenwoordig was,” sê Marais.

Sutherland sê: “Met die Covid-19-pandemie is dit belangrik om nie net na jou eie behoeftes om te sien nie, maar ook na die behoeftes van diegene wat nie hulself kan help nie.”

Die familie en vriende van diegene wat betrokke was, aanhangers, sowel as die werknemers van die wildreservaat het die geleentheid bygewoon.

Talle ander het via sosialemedia-platforms die fietsren dopgehou.

Die organiseerders glo die fietsren het weer lewe geblaas in die Kariega-wildreservaat, nadat dit vir vyf maande gesluit was.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.