Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Leef
KYK: Japannese sing volkslied saam met ANC-voorsitter

’n Video waarin twee Suid-Afrikaners die volkslied vir Japannese rugbyondersteuners leer voor Sondag se kragmeting in die kwarteindstryd van die Wêreldbekertoernooi tussen die Springbokke en Japan, maak opslae op sosiale media.

In die video leer Geoff Makhubo, die ANC-streekvoorsitter in Gauteng, en sy vrou, Dikeledi Majola, twee Japannese “Nkosi Sikelel’ iAfrika”.

Hulle is in Springboktruie geklee en Majola hou ’n groen pamflet vas waarop die volkslied gedruk is en dui die woorde aan terwyl die volkslied speel. Sy en Makhubo sing saam met die twee mans.

Wanneer hulle by die Afrikaanse deel kom, sukkel die mans effens, maar laat hulle nie van stryk bring nie.

Makhubo het die video op Twitter gedeel. “Wat ’n oomblik! Ek en my vrou is afgeneem waar ons die Suid-Afrikaanse volkslied vir die Japannese in hul land leer tydens die kwarteindstryd waarin ons hulle geklop het. Welgedaan, Springbokke,” het hy by die video geskryf.

Die video is byna 40 000 keer gekyk en meer as 2 000 mense het aangedui dat hulle daarvan hou. Dit is ook meer as 500 keer op Twitter gedeel.Hulle is Japan toe om na die kwarteindstryde Saterdag en Sondag te gaan kyk, sê Makhubo.

Van agter is Dikeledi Majola en haar man, Geoff Makhubo, die ANC-streekvoorsitter in Gauteng, en die twee Japannese vir wie hulle die Suid-Afrikaanse volkslied geleer het. Foto: Cape Talk-webtuiste

Engeland het Australië Saterdag met 40-16 geklop en Nieu-Seeland het met 46-14 teen Ierland gewen. Sondag het Wallis met 20-19 oor Frankryk koning gekraai en die Bokke het Japan met 26-3 geklop.

“Die twee Japannese mans het die Suid-Afrikaanse volkslied op ’n selfoon gestoor en ons genader en gesê: ‘Kom ons sing.’ Toe sing ons saam.”

Volgens Makhubo het die mans ná die derde probeerslag die woorde van die volkslied perfek geken.

“Dit was ’n lekker ervaring. Hulle het ons verwelkom en goeie sportmanskap getoon. Hulle het moeite gedoen om ons volkslied te leer.”

Die mans het Sondag ook ’n afskrif van hul volkslied vir Makhubo gegee. Hy bieg dat dit moeilik is om aan te leer, maar dat hy Engelse vertalings sal probeer gebruik om dit makliker te maak.

Makhubo en sy vrou keer Dinsdag na Suid-Afrika terug.

Intussen het baie Suid-Afrikaners positiewe boodskappe onderaan die video getwiet en is gaande daaroor.

“Breek grense af met ons mooi volkslied. Pres. Mandela sou so trots gewees het. Dit is presies waarvoor hy gestaan het. ’n Wêreld verenig deur sport,” lui een van die Twiets.

’n Ander vrou laat ook van haar hoor: “Fantasties! Ek is so bly julle was daar, maar baie jaloers dat dit nie ek was nie. Maak vriende oor die wêreld heen. Mooi so!”

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.