Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Leef
‘Reënboogkinders’ maak opslae op sosiale media

’n Spannetjie Afrikaanse plaaskinders van Klerksdorp maak opslae sedert video’s waarop hulle heerlik speel en vlot in Tswana gesels op sosiale media die ronde doen.

Miné Ernst (8), haar boetie, Pieter (6), hul sussie, Ilne (4), en hul maats Teko Mokgotu (7), Katlego Dladla (10), Ntumisang Mokgotu (11) en Refilwe Dirulelo (15) het sedert 7 April die ganse land aan die koer.

Dit is nadat ’n video waar Miné te heerlik met ’n Tswana-sprekende vrou by ’n swembad in Tswana klets en grappies maak, op sosiale media gedeel is.

Die boesemmaats van Klerksdorp wie se lekker saamspeel in Tswana sosiale media aan die gons het, is Miné Ernst, Ntumisang Mokgothu, Pieter Ernst, Teko Mokgothu, Ilne Ernst en Refilwe Dirulelo.

Dié video, wat onder die titel “Sthando girl you can keep the land” gedeel is, is al bykans 407 000 keer gekyk en amper 13 000 keer gedeel. Dit het sowat 1 130 kommentare ontlok.

Pieter en Rika Ernst, Miné-hulle se ouers, het die naweek nog ’n video geplaas van waar die kleinspan tog te lekker saamspeel en Tswana praat.

Die kinders het ’n deurryrestaurant nageboots en bestel hul wegneemetes in Tswana.

“Dumelang,” groet klein Pieter en plaas sy bestelling in Tswana by die eerste venster, waarna hy en Teko dan op hul vierwielmotorfiets na die volgende venster ry. Hier groet hulle ook vriendelik voor Katlego hulle maan om te “pataal”.

’n Bordspeletjie se speelgeld word as betaling oorhandig en Katlego tel heel waffers eers die kleingeld uit.

Ernst sê sy is geweldig trots op haar kinders wat al van ’n jong ouderdom af Tswana praat.

Sy en haar man is oorweldig deur die positiewe reaksie wat die video’s op sosiale media ontlok.

Volgens Ernst praat Miné al vlot Tswana sedert sy drie jaar oud is en Pieter sedert hy vyf is. Hul kleinsus, Ilne, verstaan Tswana, maar praat dit nog nie vlot nie.

Om meertalig te wees is nie ’n vreemde verskynsel in dié gesin nie. Ernst, wat in Lady Grey in die Oos-Kaap grootgeword het, praat vlot Xhosa en ’n bietjie Zoeloe. Haar pa, Soon Cloete, praat Suid-Sotho en gesels graag met die kinders in dié taal.

Ernst sê dit is vir haar belangrik dat haar kinders een van die swart Suid-Afrikaanse tale magtig is.

“Hulle gaan eers skool toe van ongeveer vier jaar oud. Voor dan sê ons altyd hulle gaan skool by die ‘Tswana-skool’ op die plaas.”

Sy wou graag hê dat haar kinders, soos sy, sorgeloos en al spelende op ’n plaas grootword. Sy sê die kinders het die taal by hul huiswerkers geleer wat slegs Tswana met hulle praat.

“My kinders sien nie kleur nie en ek voel alle kinders in Suid-Afrika het dié blootstelling aan een of meer van ons swart tale nodig.”

Sy glo die blootstelling kan help om kulturele verskille te oorbrug.

“Dit kan dalk nie die land se probleme oplos nie, maar dit kan baie dinge soveel makliker maak.”

Sy sê haar kinders is alombekend in Klerksdorp en mense stop hulle gereeld om ’n foto of ’n video te neem.

Toe die video van Miné soos ’n veldbrand begin versprei, was Rika en Pieter eers ’n bietjie benoud, maar hulle het gou besef dié video is eintlik ’n seën wat ’n positiewe boodskap oordra.

“Ek glo die Here beskerm ons en dat Hy dit so bestem het,” sê sy.

Sy het veral die positiewe kommentare op die video terdeë geniet, maar bestempel ook die insette dat alle kinders in Suid-Afrika meertalig moet wees en nie net Engels en Afrikaans magtig nie, as van groot waarde.

Sy lag heerlik oor die slagspreuk “give her the land,” wat deur talle kommentators in reaksie op die video gebruik is.

“Dit wys jou hoe iets só klein die gaping in ons kulture kan vernou. Die feit dat mense nader aan mekaar voel, is só kosbaar.”

In die kommentare by die video’s het talle mense hul kontaknommers gelos en gevra dat die video vir hulle aangestuur word.

Robert Sibaya skryf: “Kom ons vergeet die grond, ouens, dis afgehandel!”

Cindy Kago Namate sê: “Wow. Ek is mál hieroor. Ek is lief, lief, lief daarvoor!”

Justice Mlulami Ntabeni skryf: “Dit is die Suid-Afrika wat ek in gedagte gehad het, dat jy nie net gemaklik moet wees met jou eie kultuur nie. Probeer ook ander mense se tale leer. Dit is so lekker om na hierdie meisie te luister en hoe sy haarself so goed in die Afrika-Setswana-taal uitdruk.”

Boitumelo Mogoje skryf: “Die kinders het ’n blink toekoms, hul ouers verstaan dat dit belangrik is om deel te wees van die samelewing. Wat ’n beter manier om dit te doen as om te verstaan waaroor ander rasse en hul kultuur gaan sodat julle maklik oor die weg kan kom.”

Meer oor:  Klerksdorp  |  Kinders  |  Video
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.