Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Promosie
Die staat loer na jou pensioen: Oorweeg jou opsies

Daar word op die oomblik baie bespiegel en daar is baie bangpraatjies, maar besonderhede oor die regering se plan om nog voorskrifte aan pensioenfondse op te lê, is nog skraps.

Die regerende party se 2019-manifes verwys na voorgeskrewe bates as ’n sleutelprioriteit. Foto: iStock

Daar is egter opsies wat alle beleggers kan oorweeg om hul aftreevoordele te beskerm.

Enigeen van 55 jaar of ouer kan potensieel uit hul uittree-annuïteite, bewarings-, voorsorg- of pensioenfondse aftree. Na gelang van die reëls van die fonds, kan hulle ’n kontantbedrag onttrek en die res as ’n lewende annuïteit belê. Op dié manier kan beleggers hul spaargeld beskerm deur vooraftrede-produkte – wat deur regulasie 28 beheer word – te omskep in ná-aftrede-produkte, wat nié deur regulasie 28 beheer word nie.

In ’n lewende annuïteit het beleggers algehele buigsaamheid oor batetoewysing, sonder enige inmenging van die regering.

Daarby het hulle die vryheid om hul belastingvrye beleggings en nabelaste kontantonttrekking te belê waar hulle wil, sonder die voorskriftelikheid van regulasie 28.

Maar hoe hoog is die risiko van verdere voorskriftelikheid oor aftreeprodukte? Dis veral vir mense jonger as 55 jaar kommerwekkend omdat hulle tot dan in hul aftreevoordele vasgesluit is.

Die regerende party se 2019-manifes verwys na voorgeskrewe bates as ’n sleutelprioriteit. Die ANC wil hê ’n deel van finansiële instellings se hulpbronne moet aan “maatskaplik produktiewe bates” toegewys word.

Die maklikste manier om dit te doen, is om regulasie 28 te verander, wat tans alle vooraftrede-produkte reguleer, insluitend pensioen-, voorsorg- en bewaringsfondse en uittree-annuïteite.

Die belangrikste perke van regulasie 28 in sy huidige vorm, is dat aftreeprodukte ’n maksimum van 75% in aandele mag belê, 25% in genoteerde eiendom, 30% in buitelandse bates en 10% in sogenaamde alternatiewe bates.

In ’n lewende annuïteit het beleggers algehele buigsaamheid oor batetoewysing, sonder enige inmenging van die regering.

As voorgeskrewe bates in werking gestel word, kan dit regeringsbeleid vir die plaaslike pensioenfondsbedryf word om ’n deel van sy meer as R4 000 miljard se bates te belê in staatsondernemings soos Eskom en Transnet, wat ’n maatskaplik en ekonomiese ontwikkelingsmandaat het.

As dit deurgedruk word, sal batebestuurders met produkte wat aan regulasie 28 voldoen, verplig wees om ’n sekere aantal effekte (skuldbriewe) van die regering te koop.

Die feit dat dit hoër opbrengskoerse kan oplewer, kan die hou versag.

Die meeste Suid-Afrikaanse pensioenfondse het ieder geval op die oomblik ’n mate van blootstelling aan staatseffekte.

Maar deurlopende reddingsboeie aan dié staatsbeheerde instellings, tesame met onthullings oor staatskaping, het baie onsekerheid en selfs kommer in die mark geskep, veral oor vereistes vir voorgeskrewe bates wat alle fondsbestuurders kan dwing om in staatsbeheerde instrumente te belê, ongeag die onderliggende ekonomiese omstandighede van die entiteite.

Die kommer is verstaanbaar. Die land het sy vingers al voorheen met soortgelyke beleid verbrand. Voorgeskrewe bates is die eerste keer in 1956 in Suid-Afrika bekend gestel, deur die Nasionale Party, toe van pensioenfondse vereis is om meer as die helfte van hul geld in staatseffekte te belê.

Die riglyne vir omsigtige beleggings van daardie tyd het vereis dat 53% van aftreefondse se bates, 33% van die bates van langtermynversekeraars en 75% van die Openbare Beleggingskommissaris (nou die Openbare Beleggingskorporasie, OBK), se bates onder bestuur in staatseffekte en die effekte van staatsondernemings belê moes word.

Teen 1977 was die voorskrif so hoog as 77%.

As die ANC soortgelyke toewysings instel, verteenwoordig dit ’n enorme risiko vir aftreefondslede se spaargeld.

Regulasie 28 is juis ingestel om aftreevoordele van buitensporige risiko te beskerm.

Voorgeskrewe bates soos voorgestel gaan teen die bedoeling van dié heersende wetgewing en die vereistes wat aan aftreefondse se trustees gestel word. Trustees het ’n fidusiêre plig om in die beste belang van lede op te tree, en voorgeskrewe bates sal die mate beperk waarin hulle lede se voordele kan beskerm en laat groei.

Regulasie 28 is slegs van toepassing op vooraftrede-fondse. Enige veranderinge aan dié regulasie sal die regering nie toegang gee tot diskresionêre bates of ná-aftrede-produkte soos lewende annuïteite nie. Dit kan natuurlik verander, maar dis onwaarskynlik.

Daar is geen rede tot paniek nie. Maar miskien is dit nodig om ’n kritiese gesprek met ’n finansiële adviseur te hê, veral vir mense ouer as 55 jaar.

Daar is geen rede tot paniek nie. Maar miskien is dit nodig om ’n kritiese gesprek met ’n finansiële adviseur te hê, veral vir mense ouer as 55 jaar, oor die potensiële impak op jou aftreegeld indien die regering voorgeskrewe bates instel.

Soos dinge nou staan, is ’n plan vir voorgeskrewe bates voorgestel, maar nog glad nie geformaliseer nie. Dit kan egter net ’n regulasie wees en nie ’n wet wat deur die parlement gevoer moet word nie. ’n Regulasie kan vroeër eerder as later werklikheid word.

Hoewel Enoch Godongwana, die ANC se hoof van ekonomiese transformasie, onlangs gesê het die party het nog nie ’n besluit oor die voorstel oor voorgeskrewe bates geneem nie, het hy aangedui dis belangrik dat Suid-Afrika se plaaslike spaargeld ingespan word om ontwikkelingsdoelwitte te haal. Onder dié doelwitte sou wees groei, indiensneming en die transformasie van die ekonomie om die demografie van die land te weerspieël.

Pres. Cyril Ramaphosa het ook onlangs in die parlement gesê: “Ons hulpbronne is nou uitgeput.”

Die staat is bankrot en op soek na oplossings – en het sy oog op jou pensioen!

Finansiële adviseurs en batebestuurders, sowel as verskeie drukgroepe is teen die voorstelle gekant en is uitgesproke daaroor.

Wees proaktief en vra raad van ’n finansiële adviseur ten einde te bespreek hoe jy jou aftreevoordele die beste kan beskerm.

  • Die artikel is geskryf deur Brian Butchart, besturende direkteur van Brenthurst Wealth.
  • Die artikel is geborg deur Brenthurst Wealth Management.
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.