Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Attacq wil reit word
Die binnekant van die Mall of Africa, Attacq se vlagskipbate in sy portefeulje van goeiegehalte- kommersiële eiendomme.

Die genoteerde Attacq, wat as ’n kapitaalgroeifonds genoteer het, is besig om planne in plek te sit om ’n eiendomsbeleggingstrust (reit) te word.

Sedert sy notering op die JSE in Oktober 2013 het die eiendomsmaatskappy op langtermyn-kapitaalgroei gefokus deur die aktiewe belegging in eiendom en die ontwikkeling en bestuur daarvan. Dié strategie het die maatskappy van ander genoteerde eiendomsgroepe wat op gereelde inkomste-uitkerings fokus, onderskei.

Attacq se bruto bates het van R15,1 miljard teen notering tot R27,1 miljard toegeneem, wat neerkom op groei van 80%.

Die herposisionering van Attacq gaan tot gevolg hê dat die fonds ook op uitkerings en uitkeringsgroei gaan fokus, wat goeie nuus vir aandeelhouers inhou.

Morné Wilken, uitvoerende hoof van Attacq, sê die plan om ’n reit te word, was altyd deel van Attacq se groter prentjie, maar dat dit nou meer sin het. “Ons wil waarde uit ons balansstaat ontsluit en dié is ’n manier wat dit sal kan dryf.”

Die oorskakeling na reit-status, wat onderworpe is aan die goedkeuring van die JSE, is geoormerk vir 1 Julie 2018.

Wilken sê die maatskappy gaan vir die jaar tot einde Junie 2018 sy eerste uitkering verklaar, wat as ’n dividend betaal sal word, waarop dividend-belasting betaalbaar is. As ’n reit sal hy daarna uitkerings verklaar, waarop inkomstebelasting betaalbaar is. Die nooiensdividend gaan na verwagting 73c per aandeel beloop.

Hy sê Attacq se waardeaanbieding het vier aandrywers: sy bestaande Suid-Afrikaanse portefeulje wat ’n inkomste genereer, sy Waterfall-ontwikkeling, wat bestaande bates asook ’n pypleiding van toekomstige ontwikkelings behels, sy strategiese investering in MAS Real Estate en sy kleinhandeleiendomme in Afrika.

Morné Wilken, uitvoerende hoof van Attacq.

Hy sê as die regte prys vir die kleinhandelbates in Afrika, wat insluit die Mall of Namibia na vore kom, sal ­Attacq dit oorweeg om dit van die hand te sit.

“ ’n Voordeel is dat ons geen skuld het op grond of infrastruktuur nie.”

Attacq het nóg sowat 1,2 miljoen m² se ontwikkelbare ruimte in Waterfall, waarvan 608 000 m² se ruimte reeds van dienste voorsien is. Dit kom daarop neer dat ons dit kan ontwikkel sonder om verdere infrastruktuuruitgawes aan te gaan, wat positief is vir inkomste-uitkerings.

Hy sê die riglyn is dat aandeelhouers die volgende drie jaar uitkeringsgroei van sowat 20% per jaar kan verwag, ­afhangende van makro-ekonomiese ­toestande.

Hy sê een ding wat Attacq nie bereid is om prys te gee nie, is die goeie gehalte van sy bates. Benewens die vlagskip-Mall of Africa-winkelsentrum in Waterfall, besit hy onder meer ook die Lynnwood Bridge-ontwikkeling vir gemengde gebruik in Pretoria, die Garden Route Mall in George aan die Tuinroete, Eikestad Mall in Stellenbosch en ’n onverdeelde belang van 25% in die Brooklyn Mall.

Hy sê Attacq het onlangs van sy beleggings in Ciprus verkoop om meer op sy strategiese belegging van 30,8% in MAS te fokus. MAS belê in Wes-, Sentraal- en Oos-Europa via sy vennootskap met Prime Kapital. MAS het onlangs eiendomme in Pole en Bulgarye aangeskaf en voorsien dat hy sy uitkerings met meer as 30% per jaar kan laat toeneem tot in 2019. Dié beleggings voorsien Attacq van ’n groeiende inkomste, diversifisering en verskansing teen die rand.

Teen Desember 2016 was die belegging in MAS R2,4 miljard werd.

Wilken is opgewonde oor die vennootskap tussen MAS en Prime Kapital omdat die span daar aktief is in investering en uitbreiding in die groter markte in Oos- en Sentraal-Europa.

Meer oor:  Attacq  |  Reit  |  Veilings  |  Eiendomme
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.