Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Beleggers katvoet vir eiendomme
Keillen Ndlovu, hoof van Stanlib se genoteerde eiendomsfondse.

Genoteerde eiendomsaandele is die goedkoopste in meer as ’n dekade ná verlede jaar se rampspoedige vertoning, maar beleggers is nog nie oortuig van waarde in dié sektor nie.

Die genoteerde eiendomsektor bied tans ’n aantreklike opbrengs van sowat 9%, wat strook met die huidige opbrengs van staatseffekte, sê Keillen Ndlovu, hoof van Stanlib se genoteerde eiendomsfondse.

“Vanuit ’n perspektief van netto batewaarde verhandel verskeie eiendomsaandele teen ’n diskonto van 10% en meer onder die netto batewaarde, waar dit vantevore sowat 11% bo die netto batewaarde verhandel het.”

Tog huiwer beleggers om op groot skaal in te klim.

Beleggers is vroeg in 2018 die skrik op die lyf gejaag deur Viceroy se bewerings van prysmanipulasie, oordrewe eiendomswaardes en kruisaandeelhouding in die Resilient-groep van maatskappye. ’n Uittog uit dié sektor het ’n droewige vertoning tot gevolg gehad, en die jaar is met ’n totale opbrengs (inkomste en kapitaal) van -25% afgesluit, die swakste sedert 2008.

Hoewel Resilient op die meeste van die aantygings geantwoord het, word daar nog gewag op die uitslag van die Gedragsowerheid vir die Finansiële Sektor se ondersoek na die prysmanipulasie-bewerings.

Tot dusver vanjaar het die sektor begin terugveg met ’n positiewe totale opbrengs van 8,7%, heelwat beter as die 0,6% van kontant, staatseffekte se 2,8% en aandele se 2,4%. Volgens Anchor Stockbrokers was van die groot wenners van die jaar tot dusver Octodec met ’n opbrengs van 17,7%, Accelerate Property Fund met 16,7%, Arrowhead met 14,4%, Resilient met 13,2%, Investec Property Fund met 12,9%, Nepi Rockcastle met 11,8% en Hyprop met 11,7%.

Tot dusver vanjaar het die sektor begin terugveg met ’n positiewe totale opbrengs van 8,7%, heelwat beter as die 0,6% van kontant, staatseffekte se 2,8% en aandele se 2,4%.

Die verloorders sluit in Balwin Properties (-16,4%), Delta Property Fund (-5,6%) en Rebosis (-3,7%).

Ndlovu verwag ’n matige herstelfase. “2019 gaan ’n oorgangsperiode wees, waarna die vooruitsigte beter kan lyk.”

Wat beleggersvertroue demp, is die talle uitdagings aan die plaaslike eiendomsfront. Dit sluit in kommer oor grondonteiening sonder vergoeding en die lustelose ekonomiese groeitoestande in die land. Hy sê die swak ekonomiese groei raak die huurgroeivooruitsigte, veral in die kantoor- en kleinhandeleiendomsektor, albei sektore waaraan die genoteerde eiendomsektor groot blootstelling het: 26,8% en 57,2%.

Die situasie in die kleinhandeleiendomsektor word vererger omdat daar nog nie uitsluitsel oor Edcon se toekoms is nie.

Van Edcon, die moedermaatskappy van winkels soos Jet, Edgars en CNA, se regrukplan wat al Desember verlede jaar bekend gemaak is, het nie veel gekom nie.

Kommer oor Edcon kom op ’n tyd waar die leegstaansyfers in die kleinhandeleiendomsektor toeneem. Volgens MSCI Real Estate was dit vir superstreekwinkelsentrums in September verlede jaar 6,3% – 1,4% hoër as ’n jaar tevore.

Weens ’n ooraanbod van kantoorruimte het 11,1% van alle kantore in Desember leeg gestaan; in Sandton is die syfer 18%. ’n Pluspunt is dat die ontwikkeling van nuwe kantore en winkelsentrums beduidend afgeneem het.

Hy sê die genoteerde eiendomsektor se blootstelling aan gunstige buitelandse markte soos Oos-Europa, Australië en Duitsland beloop meer as 40%, wat ’n finansiële kussing in moeilike tye is.

Meer oor:  Edcon  |  Eiendomsektor  |  Beleggings  |  Beleggersvertroue  |  Eiendomme  |  Eiendomsagent
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.