Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Kaapse Waterfront ly groot verlies in 2020

Die letsels van die pandemie lê oor die halfjaarresultate van Growthpoint, Suid-Afrika se grootste eiendomsfonds.

Die Twee Oseane-akwarium by die V&A Waterfront in Kaapstad. Die Waterfront het in 2020 ’n verlies gely.

Die eienaar van topklas-eiendomme soos die V&A Waterfront in Kaapstad, moes sy verspreiding per aandeel vir die halfjaar tot einde Desember met 44,8% tot 58,5c verminder. Hotelle en winkels in die Waterfront wat op top-modes fokus sukkel steeds, sê Norbert Sasse, uitvoerende hoof van Growthpoint. 'n Jaar gelede was die Waterfront hierdie tyd 'n kookpot van mense danksy toeriste en besoekers aan groot konferensies in Kaapstad. Sasse verwag die Waterfront sal eers herstel as toerisme en internasionale passasiersvaarte hervat word.

Growthpoint se totale omvattende verlies vir die halfjaar is R3,7 miljard, teenoor ’n wins van R3,9 miljard ’n jaar gelede, hoewel dit herwaardasie van eiendomme en internasionale sake insluit.

Die Waterfront is waar Growthpoint gewoonlik sy sterkste prestasie behaal, maar die pandemie het hom hier erger as elders in Suid-Afrika getref weens die sentrum se sterk afhanklikheid van internasionale en plaaslike toerisme.

Die Waterfront het ’n gekonsolideerde verlies van R407 miljoen gely, teenoor die voorbelaste wins van R322 miljoen ’n jaar gelede.

Growthpoint sê sy kleinhandelkliënte – veral restaurante, rolprentteaters en gimnasiums – is die ergste getref deur die inperkings. Growthpoint het in die halfjaar huurverligting van R116 miljoen aan sy huurders verleen, met R25 miljoen se huur wat uitgestel is en R91 miljoen se afslag. Tot 68% van die totale uitgestelde huurgeld sedert die begin van die pandemie is intussen ingevorder.

Growthpoint het ook geskok met 'n leegstandsyfer van 18% in sy kantoorsektor, hoewel sy gemiddelde leegstandsyfer rondom 8% was.

Sasse glo die positiewe punte uit die halfjaarresultate is die groep se fokus om sy balansstaat te verstewig, skuld af te betaal en steeds daarin te kon slaag om uitkerings te betaal. Meer as R4,4 miljard se skuld is afbetaal en daar is meer as R5 miljard se likiditeit beskikbaar, met meer as R1 miljard se kontant op sy Suid-Afrikaanse balansstaat. Growthpoint beskou sy kundigheid in eiendomsontwikkeling as sy mededingende voordeel, maar hy het vir eers spekulatiewe ontwikkelingsprojekte gestaak.

Internasionaal

Sy internasionale eiendomsbeleggings is ook deur die pandemie geraak, maar in ’n veel minder mate vanweë die fokus op kantore en nywerheidseiendom.

In Pole en Roemenië het die eiendomme groot multinasionale maatskappye as huurders en in Australië is die huurders meer genoteerde maatskappye en staatsdepartemente.

Die Britse belegging C&R het wel kwaai gely weens die opeenvolgende streng inperkings daar.

In syfers

Growthpoint se totale inkomste was wel 12,5% hoër op R6,58 miljard en sy bedryfswins het met 8,5% tot R4,43 miljard geklim. Die wesensverdienste per aandeel het met 5,1% tot 73,84c gestyg.

Die groep se totale eiendomsbates word nou op R157,1 miljard waardeer, wat 5,8% minder is as die R166,7 miljard aan die einde van die vorige boekjaar.

Growthpoint kon wel in November aandelekapitaal van R4,9 miljard insamel. Dit het gelei tot die uitreiking van meer as 408 miljoen ekstra aandele, wat bygedra het tot die laer verspreiding per aandeel.

Growthpoint het boonop sy uitkeringskoers van 100% van die verspreibare inkomste vir die halfjaar tot einde Desember 2019 verander na 80% vir die halfjaar tot einde Desember 2020.

Die groep belowe wel dat hy likied en solvent bly en sal voortgaan om twee keer per jaar uitkerings te maak, al is dit selfs net 75% van die verspreibare inkomste.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.