Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Kantore al leër, kleiner in SA, sê Growthpoint

Die leegstand van kantore in Suid-Afrika het met 10% gespring in die afgelope boekjaar, terwyl die tendens voortgeduur het om spasie wat gehuur word al meer te krimp, het die grootste eiendomsgroep op die aandelemark, Growthpoint, Woensdag gesê.

’n Kunstenaarsvoorstelling van Growthpoint se nuwe kantoorontwikkeling in Oxfordweg, Rosebank. In die afgelope boekjaar is kapitale besteding van R2,7 miljard aangegaan insluitende R406,1 miljoen op hierdie eiendom.

Sy resultate vir die boekjaar tot einde Junie is Woensdagoggend uitgereik. 

Die groep het gewaarsku sy dividend kan weens die ekonomiese omstandighede in Suid-Afrika moontlik in die komende boekjaar nie groei nie.

Die meeste van Growthpoint se eiendomme is in Suid-Afrika, waar hy 450 eiendomme ter waarde van R78,3 miljard regstreeks besit. Dit beloop 69,7% van die markwaarde van sy eiendomsbates.

"Plaaslike huurders het voortgegaan om die spasie wat hulle huur, te krimp," het die direksie onder leiding van die voorsitter Francois Marais, gesê.

Boonop beperk die oormatige voorraad eiendom in die mark ook die groep se vermoë om huur te groei.

“Huurders het te kus en te keur en die onderhandelinge om kontrakte te hernu en nuwe huurkontrakte te sluit is taai.” 

Leegstand het oor al die eiendomsektore in Suid-Afrika (kantore, nywerhede en winkelsentrums) gestyg. In Suid-Afrika het leegstand in geheel met 6,8% gestyg vergeleke met die vorige boekjaar se groei van 5,4%.

Die leegstand het ingesluit sy oorsese eiendomme in 2019 met 5,8% tot 6,6 miljoen vierkante meter gegroei. Dit is vinniger as die 4,7% in die vorige boekjaar.

Nie immuun

’n Belang van 50% word ook in die bekende V&A Waterfront in Kaapstad besit, waarvan die waarde van die belegging tans R7,6 miljard beloop. Maar selfs dié spogeiendom is nie immuun nie.

“Die V&A Waterfront, wat voordeel trek uit plaaslike en internasionale toerisme, is reg om groei te lewer maar is nie immuun teen die erosie van die plaaslike ekonomie nie.”

Edcon se waarde daal

In die boekjaar is R110 miljoen in Edcon (wat Edgars en Jet besit) as deel van dié maatskappy se reddingsplan belê. Dit is met die halfjaar aangekondig.

Die bestuur se beste beraming van die billike waarde van die belegging is R96 miljoen vergeleke met soortgelyke transaksies in die mark.

“Ons sal voortgaan op die grondslag totdat meer inligting beskikbaar is wat ons sal toelaat om ’n meer omvattende ontleding van die billike waarde van die belegging te doen.”

Gelukkig is daar nog vraag vir maatskappye se kantore in die V&A wat positief vir die maatskappy se beleggingsopbrengs is.

Waarsku oor dividend

Gegewe Growthpoint se wesenlike blootstelling aan die Suid-Afrikaanse ekonomie, waar die grondliggende faktore vir die eiendomsmark swak bly, verwag die direksie dat die dividend per aandeel moontlik nie gaan groei nie.

“Die ekonomiese toestande druk swaar op die groep se vermoë om dividende vir die lopende boekjaar te groei,” lui die vooruitsig vir die jaar. “Die direksie verwag die groei in die dividend per aandeel, indien enige, gaan gering wees.”

Growthpoint is in terme van markwaarde een van die top-40-grootste-maatskappye op die JSE. Sy markwaarde was einde Junie op R72,1 miljard.

Sy verspreiding per aandeel het vir die boekjaar met 4,6% tot 218,1c gestyg nadat ’n finale dividend van 112,3c per aandeel (2018: 107,4c) vir die laaste halfjaar verklaar is.

Die groei is effens beter as die vooruitsig wat aan die mark vir die boekjaar gegee is.

So styg inkomste

Die groep se verspreibare inkomste het 5,3% of R322 miljoen tot R6,4 miljard gestyg. Ingesluit in dié inkomste is die R677,5 miljoen wat van die V&A Waterfront gekry is, wat skerp met 14,5% in die afgelope boekjaar gestyg het.

In geheel het die inkomste 3,8% gestyg. Die inkomste in Suid-Afrika het 2,2% gestyg.

Die verhouding van die uitgawes van eiendom tot die inkomste het tot 23,1% gestyg (2018: 21,6%). In Suid-Afrika het dié verhouding tot 25,6% (2018: 23,8%) gestyg.

Waardasie

Die herwaardasie van eiendomme in Suid-Afrika en GOZ het tot ’n toename van R1,8 miljard of 1,5% tot R116,6 miljard vir die beleggingseiendomme gelei (ingesluit die eiendomme wat verkoop gaan word).

Dit is grootliks vanweë die positiewe grondliggende faktore vir eiendom in Australië, want in Suid-Afrika het die waardasie weens die ekonomiese toestande gedaal.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.