Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Maak seker jou huis verkoop

Luidens die jongste markverslae is eiendomskopers oor die land heen weer aan die terugkeer na die mark. Is jy as verkoper egter daarop voorberei? Dit is dikwels makliker om ’n eiendom te koop as te verkoop – veral in die huidige marktoestande, aldus Samuel Seeff, voorsitter van die Seeff Property Group. Hy deel ’n paar belangrike wenke met verkopers. 

Foto: ISTOCK

Verkopers moet tans die frustrasie verduur van ’n stadiger huismark met ’n relatief lae kopersvraag in baie van die woongebiede oor die land heen.

Daarbenewens is die aanbiedinge wat nou gemaak word ook dikwels laer en neem eiendomme oor die algemeen langer om te verkoop. Tog moet ver­kopers ook onthou dat alle eiendomme nie sommer dadelik opgeraap word sodra dit die eerste keer in die mark kom nie – al floreer die eiendomsmark op daardie tydstip.

Die vraag na spesifieke eiendom en die tydperk wat dit in die mark bly, hang van ’n kombinasie van faktore af, wat die regte vraprys, ligging en die toestand van die eiendom insluit. Daarbenewens hang dit ook van die heersende ekonomiese klimaat af.

Ons vind dat ’n eiendom gewoonlik gedurende die eerste maand die meeste koper­belangstelling lok. Dit raak daarna egter al hoe minder aantreklik vir kopers hoe langer die eiendom op die mark bly.

As jy vir ’n lang tydperk sukkel om jou eiendom te verkoop, het die tyd aangebreek vir jou as verkoper om al jou emosies eenkant toe te skuif en te probeer verstaan waarom kopers nie daarin belangstel nie. Dít is veral belangrik in ’n mark­siklus soos nou, waar kopers makliker toegang het tot verbandlenings en die toestande vir huiskoop oor die algemeen baie gunstiger is.

Hier is ’n paar goed wat jy behoort te doen as jou eiendom nie verkoop nie:

1 Verstaan die mark:

Probeer so objektief as moontlik oor die verkoop van jou huis bly omdat emosies dikwels in die pad van die verkoopsproses staan. Jou eiendomsagent behoort vir jou terugvoering te gee oor watter reaksie hy of sy van die mark kry, en hoe die eiendom en die vraprys daarvan met ander soortgelyke eiendomme ver­gelyk. Jou agent sal dan voorstel watter stappe om volgende te doen.

2 Hersien jou vraprys:

Dit maak werklik nie sin om aan ’n onrealistiese vraprys vas te klou as jy jou eiendom moet of wil verkoop nie. Die prys van ’n eiendom is waarskynlik die belangrikste faktor in die verkoopsproses omdat dit verband hou met hoe waardevol kopers jou eiendom ag, en hoe dit met die pryse van soortgelyke eiendomme in die mark vergelyk.

Om op die regte vraprys te besluit is altyd belangrik – maar veral wanneer jy jou eiendom dringend van die hand moet sit of wanneer, soos nou, ’n kopersmark heers. Moenie jou tyd mors deur ’n kans te waag met ’n prys wat te hoog is nie. Gaan kyk na ander eiendomme en teen watter pryse dit verkoop is, en gebruik dit as ’n gids eerder as om net na ander se vrapryse te kyk.

Kies die regte eiendomsagent:

Wees maar versigtig vir agente wat uitsonderlik hoë verkoopspryse vir jou eiendom belowe. Daar is ook talle aanlyn eiendomsagentskappe wat beweer dat eiendom op dié platforms vinniger verkoop. Ek glo egter dat plaaslike eiendomsagente eiendom steeds vinniger en teen hoër pryse verkoop.

Plaaslike kennis en ervaring is uiters noodsaaklik, so kies ’n eiendomsagent met ’n bewese rekord vir verkope in jou woongebied.

Meer as een nie aldag die beter een nie:

Jy gaan nie jou huis noodwendig vinniger verkoop met ’n oop mandaat nie omdat geen eiendomsagent dan eksklusief op jou eiendom gaan fokus nie.

’n Alleenmandaat is egter ’n kontraktuele ooreenkoms en ’n beproefde hulpbron om uiteindelik die beste moontlike resultate met die verkoop van ’n eiendom te kry. In só ’n geval fokus die eiendomsagent ál sy of haar energie op die bemarking van jou eiendom en het die agent deurentyd ’n einddoel voor oë.

Moenie ’n aanbod te vinnig van die hand wys nie:

Daar is die meeste van die tyd ruimte vir die verkoper en voornemende koper om te onderhandel, sodat ’n realistiese verkoopsprys verkry en die eiendom uiteindelik verkoop word.

’n Goeie eiendomsagent sal jou kan lei in hierdie proses en jou kan sê of ’n sekere aanbod ’n teenaanbod werd is. Oorweeg egter die tydwaarde van geld en wat dit jou werklik gaan kos as jy ’n moontlike verkoop weerhou – veral as jy reeds uitsien na jou volgende skuif.

Vertrou jou eiendomsagent:

Wees eerlik en opreg met jou eiendomsagent oor waarom jy jou eiendom wil verkoop. Dan weet die agent of dit ’n dringende verkoop is of nie, en sal hy of sy jou daarvolgens kan adviseer. Vertrou ook die raad wat jy ontvang – of dit nou oor die eiendom se toestand is, die instandhoudingswerk wat dit nodig het of hoe die eiendom bemark moet word. Jou eiendomsagent het aan die einde van die dag net een doelwit voor oë en dít is om jou eiendom so vinnig as moontlik teen die beste moontlike prys te verkoop.

Onthou: Eiendomsagente het almal ’n reputasie om te handhaaf.

Nóg kenners sê: Wil jy verkoop? Maak dan só!

Om ’n eiendom te verkoop is dikwels net so kompleks en stresvol as om ’n eiendom te koop. Verkopers behoort die proses te benader met net soveel sorg, geduld en deursigtigheid soos om te koop, aldus Kim Hogben van die Leapfrog Property Group se agentskap in Durban-Sentraal. Die verkoopsproses is makliker hoe meer georganiseerd jy is, sê sy in ’n verklaring. Hier is ’n paar wenke:

  • Verklaar alle defekte: Net soos ’n geheim wat jou in die verleentheid kan bring, het versteekte eiendomsdefekte die geneigdheid om altyd kop uit te steek. Maak seker dat jy as die verkoper deursigtig en eerlik is oor enige foute en probleme met die eiendom, voordat dit later by jou spook – en dit kan! “Hoewel ’n voetstoots-klousule in die koopkontrak be­teken dat ’n eiendom ‘net soos dit is’ verkoop word, is daar baie beslis gevolge vir ’n verkoper wat versuim om enige defekte te verklaar waarvan hy of sy bewus is en wat later probleme kan veroorsaak,” sê Hogben.
  • Maak kontak met jou bank: Banke vereis gewoonlik minstens 90 dae kennis van verbandhouers as hulle hul verbande wil kanselleer. “As jy nie jou bank genoeg­same kennis gee nie, kan jy dalk beboet word. Dit kan vir vertragings met die oordrag- en registrasieproses sorg omdat die verkoper die oordragprokureur instruksie kan gee om eers te wag totdat die 90 dae verstryk, voordat die proses kan voortgaan. Dit is nie voordelig vir enige van die twee betrokke partye nie.”
  • Sit jou beste voetjie voor: Besigtingsafsprake en skoudae is spesifiek daar om jou eiendom uit te stal en die regte kopers te lok. Maak seker dat jou huis verwel­komend lyk en voel deur van alle onnodige meubels en besittings ontslae te raak, die gordyne oop te trek en te verseker dat dit skoon is en lekker ruik. Om ’n eiendom te koop is ’n baie emosionele proses, en hoe die koper dit ervaar, het dikwels ’n baie groot impak op sy of haar besluit, verduidelik Hogben.

Meer oor:  Huisgids  |  Eiendomme
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.