Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Oos is die nuwe tuis bes vir SA eiendomsfirmas

Namate die bleek ekonomiese omgewing hul opsies vir groei in Suid-Afrika krimp, het al hoe meer genoteerde eiendomseienaars hul oog op geleenthede in die buiteland, veral in Sentraal-Oos-Europa.

Die binnekant van Delta City Podgorica in Montenegro, waarin Hyprop ’n belang van 60% hou.

’n Rits genoteerdes het reeds hul kleim afgesteek in onkonvensionele beleggingsbestemmings soos Pole, Kroasië, Montenegro, Roemenië, die Tsjeggiese Republiek, Slowakye en Serwië en nou loer die swaargewig-Growthpoint ook met belangstellende oë na dié markte.

“Ons was aanvanklik skepties, maar daar was meriete daarin om die markte van naderby te gaan bekyk,” het Norbert Sasse, uitvoerende hoof van Growthpoint, het verlede week by die bekendmaking van die groep se finansiële resultate gesê.

Growthpoint het vier markte geïdentifiseer, waar hy graag “institusionele graad-eiendom” wil verkry, Pole, Roemenië, die Tseggiese Republiek en Hongarye. Sasse sê daarmee bedoel hy eiendom van internasionale gehalte, markte wat likied en funksioneel is, sodat skuld verkry kan word.

Hy sê die groei in die bruto binnelandse produk (BBP) in die lande is hoër as in Europa en ’n groot trekpleister is dat verkrygingsopbrengste van tussen 6,5% en 8,5%, heelwat hoër is as skuldfinansieringskoste van tussen 2,5% en 3,5%, wat dividendbetalings ’n onmiddellike hupstoot gee. In Suid-Afrika is skuldfinansieringskoste hoër as die verkrygingsopbrengste weens die hoër rentekoerse.

Ons was aanvanklik skepties, maar daar was meriete daarin om die markte van naderby te gaan bekyk.
Norbert Sasse van Growthpoint

Hy sê ’n groot voordeel is dat die eiendomme in die markte lang huurkontrakte van tot tien jaar het, vergeleke met Suid-Afrika, waar die huurtermyne weens ’n ooraanbod van ruimte al hoe korter raak en die gemiddelde tans 3,4 jaar behels.

Growthpoint het reeds blootstelling in die buiteland deur sy 65,5%-belang in Growthpoint Properties Australia (GOZ), wat 58 eiendomme met ’n waarde van R30,9 miljard besit. Hy hou ook ’n genoteerde belang van 22,9% in die Stenham European Shopping Centre Fund.

Sasse sê hulle hou van die dinamika in Australië en bly ook op die uitkyk Doer Onder.

Pieter Prinsloo, uitvoerende hoof van die genoteerde spesialiswinkelsentrumfonds Hyprop, sê plaaslike geleenthede vir die groep is ook beperk en hy sal graag sy blootstelling in die buiteland wil vergroot. Hyprop het in Februarie vanjaar sy vlerke na Suid-Oos-Europa gesprei deur ’n belang van 60% in twee moderne winkelsentrums in die hoofstede van Serwië en Montenegro te koop. Dit is Delta City Podgorica in Montenegro en Delta City Belgrade in Serwië.

Prinsloo sê dié verkrygings verteenwoordig ’n aantreklike belegging en is aanvullend tot Hyprop se strategie om goeie gehalte, inkomste-genererende winkelsentrums in ontluikende markte te verkry. Die sentrums behaal groei in hul handelsdigtheid (omset per m²) van 5%. Hy sê die sentrum in Montenegro vertoon stewig en daar is potensiaal om dit met sowat 12 000 m² uit te brei.

Ander Suid-Afrikaanse rolspelers wat in Sentraal-Oos-Europa bedrywig is, sluit in Redefine wat ’n strategiese belang van 49,9% in die Poolse Echo Polska Properties hou en die Tower Property Fund wat verlede jaar bates in Kroasië verkry het.

Meer oor:  Growthpoint  |  Redefine  |  Norbert Sasse  |  Pole  |  Genoteerde Eiendom
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.