Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Só bepaal jy die regte verkoopprys vir jou huis

Krap jy kop oor wat die verkoopprys van jou huis moet wees? ’n Buitensporig hoë prys beteken nie meer geld in die verkoper se sak nie. Eiendomme het gaan uitvind.

Hoewel dit belangrik is dat ’n huiseienaar ’n goeie prys vir sy eiendom kry, is dit van kritieke belang dat die verkoopprys akkuraat en markverwant is, sê eiendomskenners.

Dit geld veral in ’n huismark wat weer gunstiger vir kopers as verkopers word.

Regverdige markwaarde is deesdae vir huiskopers ’n groot prioriteit – net so belangrik soos wat dit vir huiseienaars is om ’n goeie verkoopprys of huurinkomste vir hul eiendom te kry.

Dit is raadsaam om te onthou dat kopers vandag uiters ingelig is ongeag watter pryskategorie hulle in belê.

Kopers doen deeglik navorsing voordat hulle ’n besluit oor ’n eiendom neem. Daarom moet jy glad nie ’n eiendom teen ’n onrealistiese prys probeer verkoop nie, sê Pam Golding Properties.

Die maatstaf vir verkopers is om die mark binne die eerste sowat twee weke te probeer aangryp, voordat voornemende kopers ’n ander rigting inslaan of belangstelling verloor.

Lanice Steward, Pam Golding Properties se opleidingshoof, sê dit is veral waar wat eerstekopers – en meer spesifiek millenniërkopers – betref.

Dié groep hou marktendense en -pryse dop om seker te maak dat hulle ’n ingeligte en intelligente aanbod op ’n huis maak.

“Dié soort koper verstaan dikwels die huismark baie goed omdat hulle ’n oog hou op al die beskikbare eiendom wat deur al die verskillende agentskappe bemark word,” sê sy in ’n verklaring. “Verkopers wat hul eiendom vir ver bo die markprys probeer verkoop, sal óf potensiële kopers afskrik óf ’n aanbod ver onder die vraprys kry.”

Die feit bly staan: Huise met onrealistiese verkooppryse bly baie langer op die mark en word normaalweg vir baie minder verkoop.

Sy sê daar is ’n wanpersepsie by sommige verkopers dat ’n eiendom se vraprys aansienlik meer as sy markwaarde moet wees om vir enige prysonderhandelinge toe te laat. ’n Huisprys wat te hoog is, kan veroorsaak dat die eiendom baie langer as wat dit moes op die mark bly.

Steward maan ook oor buitensporige opknappingswerk om ’n huis se waarde te probeer verhoog.

’n Belegging van R80 000 in swembadbedekking skep nie dieselfde waarde as om dieselfde bedrag op ’n nuwe badkamer te bestee nie, sê sy.

“Die feit bly staan: Huise met onrealistiese verkooppryse bly baie langer op die mark en word normaalweg vir baie minder verkoop. Dít is omdat kopers op die uitkyk vir verlaagde pryse is en dit as ’n geleentheid sien om ’n winskopie op te raap – iets wat tot jou nadeel is as jy die beste markverwante prys vir jou eiendom probeer kry.”

In die Boland

Annien Borg, besturende direkteur vir Pam Golding Properties in die Boland- en Overbergstreek, sê die hoër lewenskoste daar het voornemende kopers meer pryssensitief gemaak.

“Ons ervaar ’n markverskuiwing waar kopers hulle teen pryse begin verset.

“Weens die stygende lewenskoste, wat stygende krag- en waterpryse insluit, het mense ’n kleiner besteebare inkomste en is hulle in die algemeen meer pryssensitief.”

Borg sê dit is daarom belangrik dat verkopers op die regte verkoopprys besluit.

“Dit is ook raadsaam vir verkopers om te weet teen hoeveel ander eiendomme hul eiendom sal meeding sodra dit in die mark is.

“Hoe meer ander eiendomme in dieselfde tyd op die mark is, hoe belangriker word dit om te verseker dat jou eiendom uitstaan en goeie waarde vir geld bied.”

Prys wat jou huis kan haal: Steeds onseker? Volg al dié wenke

Hier is nog wenke van Pam Golding Properties oor hoe om die regte verkoopprys te bepaal:

  • Vergeet van hoeveel jy aan jou huis bestee en hoeveel geld jy nodig het om ’n nuwe huis te koop. Dit is faktore wat minder of glad nie relevant is as jy op ’n verkoopprys moet besluit nie.
  • Hou aanlyn soekenjins in gedagte. Mense word dikwels gevra om ’n prysreeks te kies ten einde hul soektog doeltreffender te maak. As ’n eiendom se verkoopprys byvoorbeeld R755 000 is, maar die voornemende koper kies ’n prysreeks van tussen R700 000 en R750 00, gaan daardie eiendom nie in die soektog opkom nie.
  • Win advies in van kenners van ’n professionele en ervare eiendomsagentskap in jou buurt en neem die agent se mening oor die mark in ag wanneer jy op ’n verkoopprys besluit. Laat voornemende kopers toe om jou huis te besoek en maak seker dat dit te alle tye skougereed is.
  • Een toegewyde agent wat jou eiendom bemark en ’n goeie verkoopstrategie uitwerk, lewer beter resultate.

’n Huis wat aan alles en almal blootgestel en beskikbaar is, is nie net ’n veiligheidsrisiko vir die inwoners nie, maar kan ook tot dubbele kommissie-eise lei en dit laat lyk asof die koper desperaat is.

  • Die huidige waarde van ’n huis het niks te make met wat die eienaar daarvoor betaal het nie.

Die waarde van ’n eiendom moet ruweg saam met ’n buurt se gemiddelde groeikoers per jaar toeneem.

As jy dus jou huis tien jaar gelede gekoop het en die buurt se gemiddelde groeikoers was 4% oor daardie tydperk, is dit ’n maatstaf wat jy kan gebruik om die eiendom se waarde te bepaal.

As jy egter te veel vir ’n huis in ’n sekere buurt betaal het en dit binne ’n kort tydperk wil verkoop, maak dit nie saak wat jy aanvanklik betaal het nie. Die huidige mark sal die waarde van die huis bepaal.

  • Die prys wat jy graag vir jou huis sal wil kry, bepaal nie die ware vraprys nie. Die huidige mark sal die waarde van jou eiendom bepaal – gegrond op onder meer ligging, vraag en aanbod. As dit nie verkoop nie, beteken dit die mark verwerp die verkoopprys.
  • As jy meer as een agent nader om jou huis te waardeer, vra elkeen van hulle om die waardasie te staaf. Professionele en ervare agente se waardasies sal almal min of meer dieselfde wees. Daar is ongelukkig agente wat eiendom oorwaardeer net om die mandaat te kry, waarna die huis maande later vir heelwat minder verkoop moet word.
  • Die waardasie wat ’n bankwaardeerder doen, bepaal nie noodwendig die huis se verkoopprys nie. Die bank se waardeerder kyk net na die buurt se statistieke by die aktekantoor, maar weet dalk nie in watter toestand die eiendom is of watter afwerkings dit het nie.
  • As jy die pryse van ander eiendom in jou buurt by jou berekeninge wil insluit, fokus op die werklike verkoopprys wat die eiendom behaal het en nie op die prys waarvoor dit bemark is nie.

Meer oor:  Eiendomme
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.