Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Eiendomme
Só werk dit as jy huurder moet uitsit
’n Probleemhuurder kan jou duur te staan kom. Foto: iStock

Om ’n residensiële eiendom te verhuur, is ’n uitstekende bron van inkomste indien dit korrek bestuur word.

Maar selfs met die mees bindende voorwaardes in plek, kan jy steeds opeindig met ’n swak huurder wat uiteindelik uitgesit moet word.

“Die uitsettingsproses is tydrowend en dit moet baie streng volgens wettige riglyne gedoen word as die verhuurder nie die risiko van regsaksie teen hóm wil loop nie,” sê Bruce Swain, besturende direkteur van Leapfrog Property Group.

“Daar is basies drie stelle omstandighede waaronder uitsetting noodsaaklik word en wettig is: Wanneer die huurder die eiendom beskadig, versuim om huur te betaal of die eiendom gebruik vir ander doeleindes as wat in die huurkontrak gestipuleer word,” verduidelik Swain.

Terwyl dit aanloklik kan wees om die slotte te verander, sal dit beskou word as ’n onwettige uitsetting omdat die verhuurder nie die magtiging het om self huurders uit te sit nie – die korrekte regsprosedure moet gevolg word.

Die prokureursfirma NGL Attorneys beklemtoon dat die rede vir die uitsetting geldig moet wees ingevolge die Wet op die Voorkoming van Onwettige Uitsetting en Wederregtelike Besetting van Grond van 1998. Die rede hiervoor is om willekeurige of onregverdige uitsettings te voorkom.

“Hierdie wet bevat ’n uiteensetting van die riglyne rondom die uitsettingsproses, wat streng nagekom moet word,” sê Swain.

“In my ervaring is die gehalte van die huurkontrak kernbelangrik – hoe meer gedetailleerd die kontrak is, hoe makliker is dit om die uitsetting deur te voer.”

As dit ’n gewone uitsetting is, moet die volgende basiese stappe gevolg word:

1. Kanselleer huurkontrak

Die eerste stap is om die huurkontrak met die huurder te kanselleer, insluitend ’n verduideliking waarom die kontrak beëindig word.

Dit is ook belangrik om in gedagte te hou dat die Wet op Verbruikersbeskerming stipuleer dat die verhuurder die huurder ’n minimum van 20 besigheidsdae kennis moet gee om die kontrakbreuk reg te stel voordat die ooreenkoms beëindig kan word.

2. Nader ’n hof vir ’n uitsettingsbevel

Die verhuurder moet dan ’n landdroshof of hooggeregshof nader om ’n uitsettingsbevel te kry. Die hof sal vereis dat die uitsetting geldig is en behoorlik uitgevoer word.

As die aansoek nie teengestaan word nie, kan dit van agt tot tien weke neem om goedgekeur te word.

3. Huurder kry tyd om sy saak te stel

Die huurder sal van die uitsettingsbevel in kennis gestel word en toegelaat word om sy saak te stel. Dit is moontlik dat die huurder die redes vir die kansellasie van die kontrak sal betwis, wat tot ’n hofbevel kan lei.

Kwandokuhle Ncube, kandidaat-prokureur by Ramushu Mashile Twala Inc, verduidelik dat dit belangrik is om die hof­bevel betyds na sowel die inwoner as die munisipaliteit te stuur omdat die bogenoemde wet stipuleer dat die bevel ontvang moet word nie minder nie as 14 dae voor die datum waarop die betrokke partye weer in die hof moet verskyn.

4. Huurder kry kans om ander verblyf te soek

In baie gevalle is dit standaardpraktyk om die huurder een maand te gee om ander verblyf te kry voordat die balju wettig daarop geregtig is om hom uit te sit.

“Twee dinge is ononderhandelbaar belangrik: ’n goeie, sterk kontrak en om die bewyse vir die kansellasie duidelik uiteen te sit en te dokumenteer,” maan Swain.

“Die uitsettingsproses is reeds duur, en om nie vanuit die staanspoor aan die regsvereistes te voldoen nie, sal nie net ’n onaangename situasie onnodig uitrek nie, dit kan ook lei tot die verwerping van die bevel of ’n lang en duur hofsaak.”

Meer oor:  Huurders  |  Verhuurders  |  Koop Om Te Verhuur  |  Verhuring
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.