Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Hoekom die rand nou wind onder sy vlerke het

Die rand het Dinsdag vir ’n groot deel van die dag onder R14 teenoor die dollar verhandel nadat dit Maandag kortstondig vir die eerste keer sedert einde 2019 onder dié vlak versterk het.

Foto: Elvira Wood

Die rand het Dinsdag in ’n stadium tot R13,95 versterk nadat dit die vorige dag op R14,03 gesluit het.

Teen namiddag het die rand weer teruggesak tot R14,04 per dollar.

Kundiges glo die rand gaan waarskynlik sterk bly danksy faktore wat tans in sy guns tel.

Izak Odendaal en Dave Mohr, strateë van Old Mutual Wealth Investment, sê die aptyt vir risiko onder beleggers het wêreldwyd die afgelope twee maande sigbaar verbeter.

Die rede vir die jolige siening is die vinnige verspreiding van entstowwe teen die koronavirus in sommige lande, veral in Brittanje en Amerika.

Die afname in die koers waarteen die virus versprei in Amerika, Brittanje en groot dele van Europa, het dié lande ook toegelaat om meer bedrywe te open, wat verkope, produksie en handel gelig het.

Nedbank se ekonome sê die rand se lopie tel spoed op. “Die belangrikste dryfvere tot dusver is die sterk risiko-aptyt wêreldwyd, ’n swakker Amerikaanse dollar, sterk hulpbronpryse, beter as verwagte plaaslike fiskale uitkomste en bemoedigende tekens dat die ANC begin optree teen korrupsie binne sy geledere.”

Hulle glo die aptyt vir risiko onder internasionale beleggers gaan waarskynlik gesond bly in 2021, aangedryf deur die wêreldwye ekonomiese herstel danksy entstowwe, die ultra-akkommoderende monetêre beleid van die grootste ekonomieë en aggressiewe fiskale stimulus, veral in Amerika.

“Beleggers fokus meestal op die voortgesette en aggressiewe uitbreiding van fiskale stimulus in Amerika en enkele ander gevorderde lande. Hulle verkies om op die hupstoot vir ekonomiese groei en werkskepping te fokus eerder as die implikasies daarvan vir staatskuld, toekomstige belastingkoerse, inflasie en monetêre beleid op medium- tot langer termyn.”

Odendaal en Mohr sê die afgelope tyd het die rand ’n massiewe hupstoot van hulpbronpryse gekry, veral die platinumgroepmetale en ystererts.

“Dit het ’n direkte invloed op die geldeenheid omdat meer uit uitvoer verdien word.”

Nedbank se ekonome sê die onlangse nuwe hoogtepunte vir hulpbronpryse is weens deur die verwagting vir die internasionale ekonomiese herstel, China se ekonomie wat gaan versnel en die hoop op infrastruktuurontwikkeling in gevorderde lande.

Die S&P Goldman Sachs-indeks van alle hulpbronne, wat 24 grondstowwe insluit, het sedert einde Februarie met nog 9,5% gestyg nadat dit met ’n indrukwekkende 16% in die eerste twee maande van die jaar gestyg het.

Koper, wat die wydste in nywerhede gebruik word, het vir die eerste keer sedert 2011 bo $10 000 gestyg. Sterk stygings is ook in ystererts, platinum, palladium, rodium en aluminium beleef.

Brent-ruolie het met 36,6% gestyg sedert einde verlede jaar.

Hulle meen dié faktore gaan uiteindelik groter belangstelling in opkomende markte aanwakker.

Siobhan Redford, ’n ekonoom van RMB, sê in ’n nuusbrief ook die rand trek voordeel uit die oplewing in die hulpbronsektor.

“Terwyl monetêre beleid internasionaal akkommoderend bly, gaan die oplewing in hulpbronne waarskynlik floreer.”

Annabel Bishop, hoofekonoom van Investec, meen die versterking van die rand vandeesweek hou ook daarmee verband dat die kredietgraderingsagentskap Moody’s Vrydagaand laat ná die sluiting van die mark Suid-Afrika se skuldgradering onveranderd gehou het.

Anchor Capital beaam dit en glo ook die verbetering in die plaaslike politieke omgewing en die aptyt vir risiko internasionaal ondersteun die rand verder.

“Die rand gaan voordeel trek uit dié tendense, maar die opwaartse potensiaal gaan beperk word deur binnelandse faktore, veral hoë fiskale risiko, energietekorte en onsekere groeivooruitsigte,” sê Nedbank se ekonome.

Die rand is meer as 31,7% sterker as ’n jaar gelede en lewer die beste vertoning van opkomende markte se geldeenhede op ’n jaargrondslag, asook sedert die begin van 2021, volgens Bishop.

Die rand het ’n jaar gelede skerp verswak te midde van die paniek oor die pandemie en omdat beleggers wêreldwyd hul aptyt vir risiko verloor het.

Sy meen die sterk rand kan hierdie kwartaal volgehou word, indien nie vir die res van die jaar nie. Maar volgens haar is die rand steeds onderhewig aan baie wisselvalligheid.

Die rand word as een van die wisselvalligste geldeenhede in die wêreld beskou.

Odendaal en Mohr sê Suid-Afrika het groot en diep kapitaalmarkte en vir afgeleide instrumente. Dit bied likiditeit (baie verhandeling) vergeleke met ander opkomende lande met baie min beheer oor buitelanders se deelname.

Maar terselfdertyd skort die rand ’n enorme en gediversifiseerde ekonomie om hom stabiliteit te gee, volgens hulle.

Meer oor:  Rand  |  Dollar  |  Wisselkoers
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.