Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
IMF verlaag verwagting oor SA se groei
verbruikers, winkels, ekonomie
Die vooruitsig vir groei vir Suid-Afrika vir 2019 is afwaarts na 0,7% vanjaar aangepas.Verbruikers gaan steeds gebuk onder berge skuld. Foto: Unsplash

Die Internasionale Monetêre Fonds (IMF) het sy verwagting vir die ekonomiese groei vir Suid-Afrika vir vanjaar wéér afwaarts tot minder as 1% aangepas.

Die wêreldliggaam verwag nou dat die staatskuld in verhouding tot die bruto binnelandse produk (BBP) volgende jaar al 64,2% gaan bereik.

Die IMF reik jaarliks in April en Oktober ’n verslag oor groeiverwagtinge uit.

Die vooruitsig vir groei vir Suid-Afrika vir 2019 is nou afwaarts na 0,7% vanjaar aangepas. Die IMF het in Oktober verlede jaar geglo dat die ekonomie in 2019 met 1,4% sal groei. Dié verwagting is daarna in April na 1,2% verlaag.

LEES OOK: IMF skiet rooi fakkel af oor SA groei

Die jongste syfer van die Reserwebank oor vanjaar se groei is 0,6%, terwyl nasionale tesourie wat altyd meer optimisties is, in Februarie groei voorspel het van 1,5%.

“Suid-Afrika se groei gaan onder druk bly, en matig van 0,7% in 2019 tot 1,1% in 2020 verhoog omdat private belegging en uitvoergroei na verwagting swak gaan bly.”

Die IMF se verwagting vir groei vir 2020 is ook van April se 1,5% af verlaag.

Die IMF se groei vir 2020 is swakker as die jongste verwagting van die Reserwebank van 1,5%. Dit is ook swakker as die nasionale tesourie se voorspelling in Februarie van 1,7%.

Op medium termyn word verwag dat die ekonomie effens stadiger as 2% gaan groei, wat skaars bo die bevolkingsgroei is.

Volgens die IMF toon dit die impak van strukturele beperkinge soos hoe duur dit is om sake te doen en die onbuigsame arbeidsmark asook ondoeltreffendheid onder staatsondernemings. “Dié faktore gaan sakevertroue en beleggings van die private sektor flou hou.”

Staatskuld skerp op

Die IMF verwag nou dat Suid-Afrika se staatskuld in verhouding tot die BBP vanjaar tot 59,9% gaan styg en volgende jaar tot 64,2%.

Die syfer vir 2019 is hoër as die 57,3% wat in Oktober verlede jaar en die 57,8% in April verwag is.

Die syfer vir 2020 is baie hoër as die 59,8% wat in April verwag is.

Dit is ook hoër as wat die nasionale tesourie in Februarie met die begroting verwag het. Die hoogste vlak van skuld wat tesourie voorspel het, was 60,2% vir die boekjaar tot einde Maart 2024.

Die regering het egter ná Februarie ’n groter reddingsboei vir Eskom as wat gesê is en hulp aan talle ander staatsondernemings aangekondig.

Die mediumtermyn-begrotingsraamwerk (MTBR), wat einde Oktober uitgereik word, sal meer lig werp op wat die jongste verwagting van die nasionale tesourie oor die staatskuld is.

Die hantering van die Eskom-krisis het egter van Augustus af ’n groot meningsverskil laat losbars onder ekonome of dit Suid-Afrika se staatskuld tot ’n punt gaan lig wat die land gaan noodsaak om by die IMF om ’n lening aan te klop.

LEES OOK: Eskom: ‘Kies jul medisyne of IMF-lening kom’

Die IMF het nog in Augustus ontken dat Suid-Afrika aansoek om ’n lening gedoen het.

LEES OOK: IMF: G’n lening; SA moet sy eie probleme oplos

Begrotingstekort spring

Die IMF glo ook nou die fiskale balans as persentasie van die BBP vir Suid-Afrika gaan spring tot 6,2% in 2019 van die 4,4% wat dit in 2018 was. Die IMF glo dit gaan teen volgende jaar 6,7% bereik.

In Oktober verlede jaar is verwag dat dit 4,5% vir 2019 gaan wees. In April is geglo dit 5,1% vir beide jare gaan wees.

Moeiliker eksterne faktore

Die IMF het sy verwagtinge oor groei in Afrika op 3,2% vir 2019 gehou maar glo dit gaan nou teen 3,6% 0,1 persentasiepunt stadiger groei in 2020 as wat aanvanklik gedink is.

“Die afwaartse aanpassing toon ’n moeiliker eksterne omgewing, voortgesette probleme met produksie in olielande en swakker as verwagte groei in Suid-Afrika,” het Abebe Aemro Selassie, direkteur van die IMF se departement oor Afrika, gesê. “Eksterne winde van voor het – soos gesien kan word in die beduidende verlangsaming in die groei in uitvoer – toegeneem.”

Volgens Selassie het die eksterne winde van voor sedert April vererger. Dit sluit in die risiko van ’n toename in proteksionisme en ’n omkeer in kapitale invloei weens rentekoerse wat oorsee begin styg plus ’n vinniger as verwagte verlangsaming in China en Europa.

“Te midde van die verhoogde kwesbaarheid oor skuld in sommige lande, het beleidmakers min ruimte om te beweeg om die eksterne winde teen te werk.”

Inkrimping nou in buurland Namibië verwag

Die IMF verwag dat Namibië se ekonomie vanjaar met 0,2% gaan inkrimp.

’n Jaar gelede in Oktober is verwag dat Namibië in 2019 met 3,1% gaan groei.

Teen April is die reële BBP-groei tot 1,4% afwaarts aangepas.

Dit kom nadat die land reeds volgens die IMF se syfers in 2017 ’n inkrimping van 0,9% ondervind het.

In Oktober verlede jaar is geglo dat die land in 2018 teen 1,1% gaan groei. Dit is egter in April verander toe getoon is ’n inkrimping van 0,1% is in 2018 ervaar.

Dit beteken die land kan drie jaar lank agtereenvolgens ’n inkrimping ondervind.

In April is verwag dat Namibië in 2020 teen 2% gaan groei. Die groei wat nou vir 2020 verwag word, is ook effens laer op 1,6%.

Sy buurland Angola gaan na verwagting ook ’n inkrimping van 0,3% in 2019 ervaar. Dit beteken die land se ekonomie ervaar sedert 2016 ’n inkrimping.

’n Jaar gelede het die IMF verwag dat Angola 3,1% gaan groei. Groei van 1,2% word vir Angola vir volgende jaar voorspel, wat ook klaar minder as die 2,9% is wat in April verwag is.

Meer oor:  Imf  |  Internasionale Monetêre Fonds  |  Bbp  |  Belasting  |  Ekonomie  |  Ekonomiese Groei  |  Staatskuld  |  Staatskas
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.