Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
‘Inflasieteikens ’n keerwal teen meer as hoër pryse’

Moenie toelaat dat “populiste en outokrate” se wêreldwye aanslag op sentrale banke jou mislei nie: Suid-Afrika is baie verskuldig aan sy inflasieteikens, waarsku Lesetja Kganyago, president van die Reserwebank.

Lesetja Kganyago, president van die Reserwebank. Foto: Denzil Maregele

Kganyago het Woensdagaand in ’n toespraak aan buitelandse afgevaardigdes in Pretoria die sukses van inflasieteikens besing.

“Inflasieteikens het aan Suid-Afrika ’n goeie diens bewys. Dit het ons gehelp om laer inflasie te bereik en dus laer rentekoerse te handhaaf.

“Dit het ook die deursigtigheid van monetêre beleid laat toeneem en die Reserwebank meer aanspreeklik gemaak,” sê Kganyago.

“Ons het al ’n lang pad gekom van die dae toe die president van die Reserwebank sommer net op ’n Vrydagmiddag kon besluit om rentekoerse aan te pas, en nie eens sy doelwitte of redes daaragter bekend gemaak het nie.”

Kganyago sê inflasieteikens het oor die jare heen enorme ekonomiese probleme afgeweer.

“Die langtermynkoste van hoër inflasie en die gepaardgaande verswakking van inflasieverwagtinge het ’n potensieel nadelige uitwerking op die geloofwaardigheid van ons beleid, verbruikers se koopkrag, die koste van krediet en die wêreldwye mededingendheid van Suid-Afrikaanse maatskappye.”

Dis die beste manier waarop die Reserwebank die ekonomie kan ondersteun, sê Kganyago. Om dié rede voel hy is uiters belangrik dat die mandaat van die Reserwebank onveranderd bly, soos vasgevang in die Grondwet.

Ons het al ’n lang pad gekom van die dae toe die president van die Reserwebank sommer net op ’n Vrydagmiddag kon besluit om rentekoerse aan te pas.
Lesetja Kganyago van die Reserwebank

Kganyago het weer beklemtoon dat die Reserwebank voorsien dat die repokoers verlaag gaan word, maar nie so gou soos ontleders verwag nie.

Ontleders by onder meer FNB én Moody’s Investors Service het vandeesmaand begin voorspel dat Suid-Afrikaners met skuld in Julie verligting kan verwag met ’n verlaging van 25 basispunte aan die repokoers.

Hulle verneem lae inflasionêre druk van 4,4% te midde van ’n 3,2%-inkrimping in die bruto binnelandse produk (BBP) in die eerste kwartaal dui op ’n geleentheid vir verslapte monetêre beleid.

Kganyago stem nie heeltemal saam nie.

Kganyago, wat veral die afgelope week aanslagte vanuit onder meer die ANC oor die mandaat en onafhanklikheid van die Reserwebank afweer, sê monetêre beleid kan net soveel vir ekonomiese groei doen.

“Monetêre beleid is nie ’n plaasvervanger vir strukturele hervorming nie,” sê hy.

“Wat nodig is om ’n merkwaardige invloed op potensiële uitset- en indiensnemingsvlakke te hê, is die implementering van verstandige makro-ekonomiese beleid wat deur geloofwaardige strukturele beleidsinisiatiewe ondersteun word.”

Inflasie het tot 4,4% in April gedaal en die Reserwebank se model dui daarop dat inflasie voortaan naby die 4,5%-middelpunt van die teikenband (3% tot 6%) oor die volgende paar jaar sal bly. Dit is “waar ons dit wil hê,” sê Kganyago.

“As jy laer rentekoerse wil hê, moet jy eers laer inflasie hê.”

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.