Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
JSE: Hiberneer die beer regtig nog?

Die JSE stoom voort, ten spyte van Suid-Afrika se stotterende ekonomiese groei. Die vraag is dus: Waar is die beermark wat sommige vir 2016 voorspel het?

     

     

Die verwagtinge is dat die ekonomie vanjaar met minder as 1% gaan groei, sommige meen selfs so min as slegs 0,2%, maar die JSE se indeks van alle aandele het Donderdag weer 0,37% hoër op 53 921 punte gesluit. Dit is nie ver van sy algehele hoogtepunt van 55 188 in April verlede jaar nie.

Die meeste batebestuurders is ondergewig in aandele, want hulle verwag wel nog ’n beermark, sê Abri du Plessis, uitvoerende hoof van ­Gryphon Batebestuur.

Die tyd is oorryp vir ’n korreksie, en selfs dalk vir ’n beermark.
Frans de Klerk

Du Plessis sê die oplewing in kommoditeitspryse sedert Januarie het die JSE en die rand ’n hupstoot gegee omdat Suid-Afrika grootliks ’n kommoditeitsgedrewe ekonomie is, maar buiten die olieprys (wat gister weer bo $50 per vat was) het kommoditeitspryse die afgelope twee weke weer teruggetrek.

Dit is ook hoekom die rand weer swakker is – en nié weens plaaslike politieke faktore nie – en wys dat die ­vroeëre styging in hulpbronpryse nie deur fundamentele faktore gedryf is nie, sê hy.

Misplaaste optimisme

Francois van Dijk, hoof van ekonomiese navorsing van die beleggingsbestuursfirma MenteNova, sê daar is dalk misplaaste optimisme dat lae hulpbronpryse tot ’n einde gekom het.

“Die hulpbronmaatskappye verdien hul geld uit die verkoop van die hulpbronne wat hulle produseer. Indien die vraag na die produk dus swak is, wat die geval is weens die verlangsaming in die Chinese ekonomie, behoort die prys van hulpbronne en die maatskappye wat dit produseer onder druk te kom,” sê Van Dijk.

Die beer het dalk sy een oog oopgemaak op die JSE, maar die bul gee nie sommer bes nie. Foto: iStock

Hy glo dat die vraag na hulpbronne “nie fundamenteel of volhoubaar toegeneem het nie”.

Bied dit waarde?

Daar is allesbehalwe konsensus of mynbou-aandele teen huidige vlakke waarde bied, sê Francois du Plessis, besturende direkteur van ­Vega Batebestuur.

Die rigting van die Amerikaanse dollar sal deurslaggewend wees – ’n swakker dollar behoort hulpbronpryse te ondersteun – en dit is ’n waarskynlike scenario as Donald Trump se kanse op Amerikaanse presidentskap verhoog, volgens hom.

“Indien die Amerikaanse Federale Reserweraad (Fed) wel rentekoerse in Junie verhoog, behoort markte positief daarop te reageer namate ’n element van onsekerheid uit die weg geruim is. Dit kan die dollar laat versterk, wat negatief vir die rand en ander ontluikende wisselkoerse mag wees,” sê hy.

Nie plaaslike mark

Die JSE, en veral die top-40-indeks, is lankal meer nie ’n plaaslike mark nie, so die mark weerspieël nie noodwendig die plaaslike ekonomie nie, sê Frans de Klerk, ’n onafhanklike tegniese ontleder.

“Sowat 65% van die mark is buitelandse maatskappye wat slegs hier genoteer is,” sê hy.

Korreksie vs. beermark

’n Korreksie is wanneer die mark met tussen 10% en 19% daal van die hoogtepunt.

’n Beermark is wanneer die daling 20% of meer is.

Die bierbrouer Anheuser-Busch InBev, Naspers, SABMiller en British American Tobacco maak sowat 45% van die mark uit, so hulle beweeg die mark, en die meeste van hul verdienste word in die buiteland, en nié in Suid-Afrika nie, verdien, sê De Klerk.

Hy sê beleggers moet onthou dat die bulmark nou al agt jaar aan die gang is. Dit is dus ’n “volwasse bulmark”.

“Die tyd is oorryp vir ’n korreksie, en selfs dalk vir ’n beermark,” sê hy.

’n Korreksie is wanneer die mark met tussen 10% en 19% daal van die hoogtepunt, en ’n beermark as dit met 20% daal. ’n Beermark duur gewoonlik so nege maande, maar De Klerk sê die JSE is nog ’n entjie weg daarvan.

Die JSE se top-40-indeks staan tans op 48 112 punte. Die eerste gevaarligte sal flikker as dit onder 45 500 (die 200 dae- bewegende gemiddelde) beweeg.

Die JSE is oor die algemeen steeds duur, sê Abri du Plessis, so hy hardloop nie uit om nou aandele te koop nie. Hy sê mense koop nou net omdat hulle bang is dit gaan nog ­hoër, maar dit word nie ondersteun deur fundamentele faktore soos die wêreld se ekonomiese groei en die vraag na hulpbronne, wat steeds swak lyk, nie.

Van Dijk sê hy verwag “sonder twyfel” laer opbrengste op die beurs as waarvan beleggers gewoond geraak het oor die afgelope 10 tot 15 jaar.

Meer oor:  British American Tobacco  |  Sabmiller  |  Naspers  |  Anheuser-Busch Inbev  |  Beermark  |  Aandele  |  Aandeelpryse  |  Jse
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.