Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
JSE bereik rekord: Wat help dit jou?

Die JSE het Dinsdag vir die tweede dag in ’n ry op ’n rekordhoogtepunt gesluit danksy die rand se verswakking die afgelope paar dae.

Die JSE is in groot mate gedryf deur drie aandele – Naspers, Richemont en British American Tobacco. As dié drie buite rekening gelaat word, het die res van die mark sedert die begin van die jaar maar met sowat 2% gestyg.

Die indeks van alle aandele het Dinsdag op 55 390,07 punte gesluit. Dit is 182,66 indekspunte, oftewel 0,33%, beter as sy vorige hoogtepunt, wat hy Maandag behaal het.

Agteros

Jason Forssman, fondsbestuurder by Ashburton Investments, sê internasionale markte het die afgelope tyd feitlik elke dag op ’n hoogtepunt gesluit.

“Ons is eintlik ’n bietjie laat om dié punt te bereik. Die onlangse swak rand het ons nou tot hier gedruk.”

Forssman meen markte wêreldwyd is tans op hoogtepunte omdat rentekoerse internasionaal vir langer as verwag laag bly (meer beleggers belê dus in aandele as in byvoorbeeld rentedraende beleggings, wat pryse opdruk).

Aan die begin van die jaar het die meeste beleggers geglo Amerika se Federale Reserweraad gaan rentekoerse vanjaar vinniger verhoog.

Sywaarts mars

Izak Odendaal, beleggingstrateeg van Old Mutual Multi-Managers, sê omdat internasionale markte goed vaar, sou ’n mens verwag het dat die JSE hulle sou volg, maar in plaas daarvan het die plaaslike beurs drie jaar lank niks gedoen nie.

“Die vorige hoogtepunt was twee jaar gelede in April 2015.

“Dit is nie eintlik veel van ’n prestasie om ná twee jaar weer ’n hoogtepunt te bereik nie. ’n Mens gee eerder amper ’n sug van verligting dat ons kon.”

Die indeks is sedert die begin van die jaar deur spesifieke aandele hoër gehelp.

Naspers, wat 20% van die indeks verteenwoordig, het van die begin van die jaar af met 44% gestyg. “As mens dit uit berekening laat, is die styging nie so groot nie,” sê Forssman.

Ander maatskappye met aandeelpryse wat in die vorige twee jaar sleg gevaar het, soos mynmaatskappye, het ook van die begin van die jaar af sterk gestyg.

Dit is nie eintlik veel van ’n prestasie om ná twee jaar weer ’n hoogtepunt te bereik nie. ’n Mens gee eerder amper ’n sug van verligting dat ons kon.
Izak Odendaal, beleggingstrateeg van Old Mutual Multi-Managers
  • Anglo American is nou 12% hoër as aan die begin van die jaar en 40% hoër oor die afgelope 12 maande.
  • BHP Billiton is 10% hoër as aan die begin van die jaar en 42% hoër as 12 maande gelede.
  • Die luuksegoederegroep Richemont, wat ook ’n groot deel van die indeks uitmaak, is amper 25% hoër as aan die begin van die jaar en 39% hoër oor 12 maande.

Hannes van den Berg, ’n portefeuljebestuurder van Investec Batebestuur, sê Naspers het sowat 6% bygedra tot die 11%-styging van die indeks sedert die begin van die jaar.

Richemont het sowat 1,7% bygedra.

Tot Vrydag, voordat British American Tobacco (BAT) skerp gedaal het, het hy ook ’n groot deel van die prestasie bygedra.

“Die mark is dus in groot mate gedryf deur daardie drie aandele.” As dié drie buite rekening gelaat word, het die res van die mark sedert die begin van die jaar maar met sowat 2% gestyg.

Dit is minder as wat kontant oor dié sewe maande sou gelewer het, sê Van den Berg.

Julie help

In Julie het die indeks van aandele met 7% gestyg.

Forssman sê as Julie se lopie buite rekening gelaat word, het beleggers die afgelope drie jaar nie werklik ’n opbrengs gehad nie.

Dit sou beter gewees het as ’n belegger sy geld in geldmarkfondse gelos het.

Veral genoteerde kleinhandelaars en banke het in Julie stewig gestyg. Die Mr Price-groep het met 15% en Standard Bank met 14% gestyg.

Waardasie

Of die JSE se styging volhoubaar is, is ’n ope vraag, sê Odendaal. Baie van die JSE se onlangse prestasie is deur hulpbronaandele gedryf.

Anglo American het in Julie baie goeie resultate uitgereik.

“Die res van die winste van genoteerde maatskappye op die JSE is regtig niks om oor huis toe te skryf nie. Dit is die plaaslike maatskappye wat hul brood en botter hier verdien in ’n ekonomie wat swak is, wat sukkel.”

Volgens Odendaal is aandele ongelukkig nog nie “supergoedkoop nie”.

“Op ’n historiese grondslag is die prysverdiensteverhouding (pv) steeds 20 keer, wat hoog is. Dit is die dilemma vir beleggers. Hulle het swak opbrengste gekry en nie die voordele van aantreklike waardasies as aanmoediging om in te klim in die mark nie.”

Dit wil voorkom asof die rand dalk gestabiliseer het. As dit meer stabiel is, gaan dit nie so ’n groot uitwerking op die aandelemark hê nie.
Izak Odendaal van Old Mutual

Forssman sê ’n historiese pv van 20 klink baie hoog, maar ’n mens moet in ag neem dat ’n baie groot deel van die mark buitelandse bates is wat neig om ’n hoër pv te kry.

Naspers het ’n uitsonderlik hoë pv van 115.

Forssman sê as die groot aandele wat die meeste van hul wins in die buiteland verdien (die sogenaamde randverskansers) uitgehaal word, het die mark ’n historiese pv van tien keer.

“Dan is dit redelik geprys. Ek sal dit nie goedkoop noem nie, maar dit is nie duur nie.”

Van den Berg sê meer as die helfte van die aandele op die JSE se pv is nou onder 15 keer. “Daar is dus geleenthede vanuit ’n waardasieoogpunt.”

In 2014 het nader aan 40% van die mark ’n pv van minder as 15 keer gehad.

Forssman meen as die rand rondom R13 stabiliseer en met inflasie wat begin daal, gaan veral plaaslike verbruikersaandele aantreklik begin lyk.

Hy meen nog ’n rede hoekom die mark dalk verder kan styg, is omdat die plaaslike mark onderpresteer het teenoor die wêreldmarkte.

“Faktore soos die sterker rand en die swakker plaaslike omgewing het hiertoe gelei. Daar is dus geleenthede vir ons om op te vang.”

Randfaktor

Die rand se invloed word al hoe belangriker.

“Die groot maatskappye op die JSE is almal buitelandse maatskappye. Van die toptien is net twee (FirstRand en Vodacom) maatskappye wat hul wins hier verdien,” sê Odendaal.

’n Swakker rand ondersteun randverskansers se aandeelpryse. “Die sterker rand was een van die redes hoekom die JSE nie die wêreldmarkte die afgelope 18 maande hoër gevolg het nie. As ons nou ’n effense swakker rand kry, kan dit die JSE ondersteun.”

Volgens hom is die R13,20 waarteen die rand Dinsdag teenoor die dollar verhandel het, min of meer die gemiddelde vir 2017.

“Dit wil voorkom asof die rand dalk gestabiliseer het. As dit meer stabiel is, gaan dit nie so ’n groot uitwerking op die aandelemark hê nie.”

Meer oor:  Rand  |  Markte  |  Indeks Van Alle Aandele  |  Jse  |  Beleggings  |  Beurs  |  Mark  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.