Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
‘Kans op ’n tegniese resessie is 50-50’

Dit sal nóg slegter gaan met die ekonomie voordat dit beter gaan, sê ekonome nadat Lesetja Kganyago, president van die Reserwebank, Donderdag gesê het beurtkrag en die staking in die goudbedryf in die eerste kwartaal kan tot ’n inkrimping in die bruto binnelandse produk (BBP) lei.

Kganyago het oor die ekonomiese vooruitsigte gepraat by die rentekoersaankondiging. Die koers is onveranderd gelaat.

Lees ook: Gesprek oor laer rentekoers (eindelik) op die tafel

Al hoe meer ekonome reken dat die ekonomie in die eerste kwartaal van vanjaar ingekrimp het op grond van teleurstellende data, en waarsku selfs oor ’n moontlike tegniese resessie as ekonomiese groei ook in die tweede kwartaal negatief sou wees.

’n Plakkerskamp in in die vroeë oggendlig. ’n Inkrimping in die ekonomie kan werkloosheid en armoede laat toeneem.

Johann Els, hoofekonoom van die Old Mutual Investment Group (OMIG), het Dinsdag met die groep se beleggingsvooruitsig in Johannesburg gesê daar is vanjaar ’n 50-50-kans op ’n tegniese resessie – twee agtereenvolgende kwartale van ekonomiese inkrimping.

Van die teleurstellende data in die eerste kwartaal wat die BBP-syfer kan aftrek, is seisoensaangepaste mynbouproduksie wat 3,4% laer was op ’n kwartaalgrondslag, en seisoensaangepaste vervaardigingsyfers wat 2,4% laer was.

Mike Schüssler, ’n ekonoom van economists.co.za, het ook vroeër gewaarsku ekonomiese groei kan in die eerste kwartaal “aansienlik” inkrimp, het Fin24 berig.

Statistieke Suid-Afrika sal op 4 Junie die BBP-syfer vir die eerste kwartaal bekend maak.

Die Reserwebank verwag Suid-Afrika se ekonomie sal vanjaar met 1% groei (in Maart het die bank nog groei op 1,3% geraam), voordat dit vaart kry tot 1,8% in 2020 en 2% teen 2021.

Els is meer optimisties en verwag vanjaar groei van 1,3% en 2% aanstaande jaar.

Hy sê die volgende vyf jaar sal beter wees as die afgelope paar jaar. Tussen 2004 en 2007, toe daar min kommer was oor politieke stabiliteit en beleid, was Suid-Afrika se reële BBP-groei gemiddeld 5,2% per jaar. Tussen 2015 en 2018, deel van die Zuma-jare, het dit teruggesak tot gemiddeld 1% per jaar.

Els sê beter vlakke van verbruikers- en sakevertroue is ’n voorvereiste vir sterker groei, maar dringende beleidsimplementering en algemene hervormings is nodig om vertroue te herstel.

In sulke omstandighede is 3% groei per jaar moontlik. “Dit sal moeilik wees om vol te hou, maar dit is nie onmoontlik nie.”

Suid-Afrika het dus nou meer werklose mense as net ná die resessie wat gevolg het op die wêreldwye finansiële krisis in 2008 en 2009.
Johann Els

Hy glo vertroue sál herstel en dat die volgende drie tot vyf jaar veel beter sal wees as die afgelope vyf jaar.

Sterker ekonomiese data uit Europa en China, terwyl die Amerikaanse ekonomie effens verlangsaam, kan die plaaslike ekonomie ook ’n hupstoot gee, sê Els.

Volgens hom bly werkloosheid – tans op 27,6% en sowat 50% vir jeugdiges – ’n baie groot probleem.

In die eerste kwartaal was daar 6,2 miljoen werkloses in die land, teenoor 4,4 miljoen in die vierde kwartaal van 2009. Ons het nou 3 miljoen ontmoedigde werksoekers, teenoor 1,7 miljoen einde 2009.

“Suid-Afrika het dus nou meer werklose mense as net ná die resessie wat gevolg het op die wêreldwye finansiële krisis in 2008 en 2009.”

Hy sê Spanje wat in 2012 nog met ’n werkloosheidskoers van 25% gesit het, het dit begin vanjaar deur die regte beleid wat groei aangehelp het, tot 13,9% laat daal.

Meer oor:  Mike Schüssler  |  Lesetja Kganyago  |  Inflasiekoers  |  Resessie  |  Reserwebank  |  Rentekoers  |  Ekonomie  |  Ekonomiese Groei  |  Inflasie
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.