Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Motorhandelaars moet geldwassery help keer

’n Groter verpligting gaan voortaan op motorhandelaars rus om kontanttransaksies by die Finansiële Intelligensiesentrum (FIC) aan te meld in ’n poging om geldwassery te keer.

Foto ter illustrasie. Foto: Pixabay

Die sentrum, wat Woensdag ’n voorlegging oor sy jaarverslag aan die parlementêre staande komitee oor finansies gelewer het, is gemagtig om verslae oor verdagte en ongewone transaksies te ontvang en te ontleed.

Adv. Xolisile Khanyile, direkteur van die FIC, het gesê die meeste verslae in die 2018-’19-boekjaar is van banke ontvang. Hulle het 5,5 miljoen kontanttransaksies gerapporteer. Die FIC het ook 288 434 verslae ten opsigte van verdagte transaksies ontvang en twee verslae oor terroriste-eiendom.

Die sentrum het in die tyd transaksies wat meer as R53,6 miljoen beloop, gekeer as die opbrengs van misdaad.

LP’s het gehoor dat die drempel vir die rapportering van kontanttransaksies van R25 000 verhoog is tot R50 000.

As ons nie optree as hulle versuim om dit aan te meld nie, veroorsaak ons dat ’n groot gaping ontstaan.

Khanyile sê dat die FIC gewoonlik strafmaatreëls toepas op motorhandelaars wat versuim om kontanttransaksies aan die FIC te rapporteer.

“As jy na ’n motorhandelaar gaan met die opbrengs van misdaad . . . mense wat normaalweg in besit is van die opbrengs van misdaad gebruik nie die bank nie. Hulle ontvang kontant. As jy kontant ontvang van die opbrengs van misdaad, hetsy dit tenderkorrupsie of iets anders is en jy koop ’n motor met kontant – of dit ’n Maserati is of wat ook al – is motorhandelaars verplig om die FIC in te lig daaroor. As ons nie optree as hulle versuim om dit aan te meld nie, veroorsaak ons dat ’n groot gaping ontstaan,” het Khanyile gesê.

Strafmaatreëls ten bedrae van sowat R12 miljoen is in die 2018-’19-boekjaar aan motorhandelaars opgelê.

Motorhandelaars het tans twee verpligtinge teenoor die FIC – registrasies en verslagdoening.

“Ons wil hulle egter nou skuif vanaf instellings wat verslag doen na aanspreeklike instellings sodat hulle ’n groter verpligting het om hul klante te ken en bewus te wees van risiko-gevalle.”

Dr. Mike Masiapato, uitvoerende bestuurder van monitering en ontleding, sê hulle het aanvanklik nie baie aandag aan transaksies by motorhandelaars gegee nie. Die FIC het egter algaande besef dat daar “baie, baie aan die gang is” in die bedryf.

Daarom word daar nou ’n groter verpligting op die handelaars geplaas.

In die verlede was dit nie hul saak waar die geld vir die voertuig vandaan gekom het nie, maar nou gaan jy verplig word om vas te stel waar ’n koper die geld gekry het as hy met R2 miljoen by jou opdaag, het Masiapato gesê.

Volgens Khanyile werk die FIC nou saam met die nasionale vervolgingsgesag, die Suid-Afrikaanse Inkomstediens, die Valke en die onderskeie banke aan “groot kwessies”.

Die sentrum wil ook in die toekoms ’n rol speel ten opsigte van leefstyloudits.

Meer oor:  Bedrog  |  Geldwassery
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.