Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Net één ding kan SA red as Moody’s afgradeer

Honderdmiljarde rande sal noodgedwonge uit Suid-Afrika vloei as die land sy laaste beleggingsgraadkredietgradering verloor, maar daar is ’n kans vir herstel. Dit hang net af van pres. Donald Trump van die VSA en pres. Xi Jinping van China.

Moody’s het Suid-Afrika nog nie afgegradeer nie, maar ontleders verwag sy volgende graderingsbesluit sal onafwendbaar afwaarts wees.

Moody’s Investors Service het Suid-Afrika onlangs ’n heel laaste kans gegee voordat die laaste kredietgradeerder wat die land nog op beleggingsgraad hou, die sweep sal moet klap.

Nou, met ’n amptelike negatiewe vooruitsig sedert 1 November, het Suid-Afrika hoogstens 18 maande om wesenlike vordering te maak om ’n afgradering te kan vermy.

Die meeste ontleders verwag dat dit onvermydelik is.

Indien dit sou gebeur, sou die eerste van ’n reeks rampspoedige gevolge wees dat baie buitelandse batebestuursfirmas wat Suid-Afrikaanse staatseffekte deur middel van indekse hou, dit sal móét verkoop.

Dit is omdat randgedenomineerde staatseffekte nie meer op, onder meer, die FTSE Wêreldindeks van staatseffekte (WSEI) ingesluit sal wees nie.

Met al drie die groot kredietgradeerders wat Suid-Afrika as onder beleggingsgraad beskou, voldoen Suid-Afrika se risikoprofiel dan nie meer aan die minimum vereistes van gesogte indekse soos die WSEI nie.

Buitelandse beleggers hou 37% of R780 miljard van Suid-Afrika se randgedenomineerde staatseffekte.

As miljarde rande die land so skielik uitvloei, begin ’n sneeubaleffek: ’n baie swakker rand, hoër inflasiekoers, mettertyd dalk hoër rentekoerse, en natuurlik ’n staatskas wat gekniehalter word.

Annabel Bishop, hoofekonoom van Investec, sê baie van dié rampspoedige newe-effekte kán vermy word as opbrengs-honger beleggers met ’n aptyt vir risiko dan weer genoegsaam belê in die land ná die aanvanklike uitvloei.

Moodys,kredietgraderings

Sodanige invloei van beleggings sou gemotiveer word deur die enorme opbrengste wat al die gestorte Suid-Afrikaanse staatseffekte ná die afgradering sou bied, sê Bishop.

Maar, of dit sou kon gebeur, hang alles af van of die marksentiment internasionaal sy aptyt vir risiko sou kon terugkry of nie. En dít hang hoofsaaklik af van of Trump en Xi die handelsoorlog tussen die twee lande sal beëindig.

“Die sleutelpunt is dat die prestasie van markaanwysers ná ’n ernstige kredietafgradering heeltemal afhang van wat die aard is van die globale sentiment vir finansiële markte, spesifiek of daar ’n aptyt vir risiko is of nie,” sê Bishop.

Bishop sê meer as R100 miljard sou uit die land vloei ná ’n afgradering van Moody’s. Maar indien die aptyt vir risiko wêreldwyd kon verbeter, sou ’n aansienlike hoeveelheid beleggings weer die land daarna kon invloei.

Dit sou nie die leemte heeltemal vul nie, reken Bishop, en baie meer spekulatief wees, maar in ’n meer stabiele wêreldekonomie sou die enorme opbrengste op Suid-Afrikaanse staatseffekte onvergelykbaar wees met amper enige ander land wêreldwyd.

Volgens Bank of America (BoA) is al wat beleggers terughou van toenemend seldsame opbrengste jaag soos wat Suid-Afrika kan aanbied die heersende handelsoorlog tussen die VSA en China.

As ’n wêreldresessie weens die handelsoorlog dus vermy kan word met ’n handelsverdrag tussen China en die VSA, meen BoA, kan beleggers baie baat vind as hulle die geleenthede vir hoë opbrengste in veral Suid-Afrika aangryp – selfs ná ’n afgradering.

Bishop verduidelik indien dié gewensde uitkoms sou kon geskied, sou baie van die rampspoedige effekte van die afgradering vermy kon word, maar ongelukkig nie almal nie.

Bishop se ontleding vind dat lande wat deur soortgelyke afgraderings gegaan het gemiddeld die volgende op kort termyn ervaar het:

  • Rentekoerse skiet met 2,2% op.
  • Inflasie styg met 3%.
  • Die geldeenheid verswak met 13%.
  • Die bruto binnelandse produk (BBP) krimp met 1,1%.

Sulke syfers sou beteken die prys van petrol, alledaagse goedere en dienste sou die hoogte in skiet, skuld sou duurder word, die regering se vermoë om dienste te verskaf sou nog verklein en meer maatskappye sou waarskynlik moet sluit.

Dié effekte kan gedemper word deur nuwe beleggings as die handelsoorlog sou eindig en ’n wêreldresessie vermy word, maar daar is sekere probleme wat nie vermy sal kan word nie.

Die staat se verwagte enorme groei in staatskuld tot meer as 71% van die BBP teen 2022 sal hard geslaan word deur die beduidende toename in koste om skuld aan te gaan met ’n afgradering tot onder beleggingsgraad.

Bishop waarsku ook dat selfs al sou nuwe invloei die land kon help, is die aard van sulke beleggings anders as vir ’n land wat nog beleggingsgraad-status het.

Hierdie soort spekulatiewe beleggers wat risiko’s aangaan om opbrengste te jaag bring “beduidende onstuimigheid” mee, sê Bishop.

Maar vir eers is die beste waarvoor gehoop kan word dat die handelsoorlog eindig sodat Suid-Afrika minstens ’n kans het om ’n moontlike afgradering te kan trotseer.

Meer oor:  Moody's  |  Annabel Bishop  |  Rommelstatus  |  Kredietgradering  |  Staatseffekte
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.