Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Nog afgraderings kan kom van S&P en Fitch ook

Suid-Afrika gaan in die komende maande dieper in rommelstatus afgegradeer word deur die kredietgraderingsagentskappe S&P en Fitch.

Fitch Ratings moet ook binnekort weer 'n besluit oor Suid-Afrika se gradering neem. Foto: Argief

Peter Attard Montalto, ekonoom van Intellidex, glo dié moontlikheid is groot, asook dat Moody’s later vanjaar weer ’n afgradering gaan aankondig.

S&P en Fitch het reeds die gradering van Suid-Afrika se staatseffekte op rommelstatus.

Hy glo sowat R90 miljard se buitelandse beleggersgeld gaan in die komende weke uit staatseffekte vloei weens Moody’s wat Suid-Afrika ook nou na rommel afgegradeer het.

Soveel kan uitvloei

Amper R90 miljard ($5 miljard) kan in die komende weke uit Suid-Afrika se staatseffekte vloei, voorspel Intellidex.

Hiervan is sowat R37 miljard ($2 miljard) van passiewe beleggingsfondse wat hul beleggingsbesluite op indekse grond.

Dié uitvloei sal eers plaasvind wanneer Suid-Afrika amptelik teen einde April uit die FTSE World Government Bond Index (WGBI) val.

Saville sê daar is beleggers soos buitelandse pensioenfondse wat eers verplig sal wees om Suid-Afrika se staatseffekte te verkoop wanneer die land nie meer deel van die WGBI is nie. “Dit beteken ons mag eers die volle impak van die afgradering teen Mei sien.”

Staatseffekte word deur regerings uitgereik om finansiering te kry.

Internasionale kredietgraderingsagentskappe gradeer lande se staatskuld sodat groot beleggers soos pensioenfondse wêreldwyd ’n idee het waarin hulle kan belê en wat die risiko is.

Staatseffekte met ’n gradering op beleggingsgraad word as minder riskant beskou. Rommelstatus is meer riskant.

Montalto glo Fitch en S&P sal Suid-Afrika afgradeer gegewe die impak wat die koronavirus op die land se ekonomie gaan hê.

Hy som Moody’s se rede vir die afgradering op as “dat hulle eenvoudig opgegee het dat genoeg strukturele en begrotingshervormings gaan plaasvind om die ekonomiese groei wesenlik te verhoog en vir die staatskuld om te stabiliseer en te verlaag”.

Moody’s het verwys na die vinnige en groot verhoging in die skuldlas van die staat en dat daar ook nou risiko’s is vir die finansierbaarheid van die staatskas.

“Daar is net twee keer na die koronavirus verwys en dit maak die aankondiging nog donkerder, en dra by tot die groter risiko dat nog ’n afgradering vanjaar kan kom.”

Dr. Adrian Saville, uitvoerende hoof van Cannon Asset Managers, sê hoewel die regering met die nasionale begroting in Februarie die regte geluide gemaak het om die kommer van graderingsagentskappe aan te pak “het hy uiteindelik misluk daarin om enige bewyse van sy goeie voorneme” te gee.

“Die werklikheid is dat Suid-Afrika se fiskale maatstawwe van problematies tot diep in die gemors beweeg het in ’n tyd waarin bestendige verbeterings getoon moes word wat uit vasbeslote beleidsoptrede moes gespruit het.

Wat is die impak van ’n afgradering?

As staatseffekte in Mei op groot skaal verkoop word, sal dit tot ’n omskakeling van rande in dollar lei, volgens Saville.

Die pryse van staatseffekte sal daal en die omskakeling na dollar sal die rand laat verswak.

Die laer pryse vir staatseffekte lei tot hoër rentekoerse op staatseffekte en dus hoër leningskoste vir die regering.

Die swakker rand sal inflasie verhoog, want sowat ’n derde van die land se eindprodukte word ingevoer.

“Die impak van die hoër inflasie gaan dan binne die komende maande deurvloei na die breër ekonomie, wat hoër lewenskoste gaan meebring.”

“Ons het min vordering gemaak met die hantering van die belangrikste strukturele kwessies wat die ekonomie wurg, naamlik: die groeiende begrotingstekort; die ontploffing van staatskuld; voortgesette onsekerheid oor grondbesit en eiendomsreg; swak ekonomiese groei; die droewige bedryfs- en finansiële situasie van staatsondernemings; die land se oorweldigende werkloosheid en ongelykheid.

“Selfs voordat die afgradering se impak op die ekonomie in ag geneem word, is die ekonomiese vooruitsig vir Suid-Afrika vanjaar angswekkend weens die Covid-19-krisis en die inperking.”

Volgens hom toon finansiële modelle dat die ekonomie vanjaar met tot 5% kan inkrimp. “Dit is ’n ongekende syfer in die onlangse geskiedenis. In die krisisse van 1983, 1992 en 2009 het die ekonomie met omtrent 2% gekrimp.”

Die koronavirus se impak gaan die begrotingstekort onder ernstige druk plaas omdat belastinginkomste gaan daal.

Hy meen die begrotingstekort in verhouding tot BBP wat in Februarie nog op 6,8% was, kan ontplof in ’n dubbelsyfer.

“Die afgradering van Moody’s gaan die staatskas onder nog druk plaas en meer pyn meebring vir die regering, maatskappye en huishoudings omdat dit tot hoër leningskoste en rentekoerse lei.”

Montalto sê hulle vind in hul interaksie met politici en beleidmakers buite die nasionale tesourie en die Reserwebank ’n “traak-my-nie-agtigheid” oor die impak van ’n afgradering.

“Ons dink die land se inwoners onderskat heeltemal die langtermynimpak as al die graderingsagentskappe die staatskuld tot rommel afgegradeer het, asook wat kan gebeur as die gradering dieper in rommel skuif.”

’n Onregstreekse impak is op banke en maatskappye wat in die geldmark finansiering van beleggers kry omdat hulle ook saam met die land afgegradeer gaan word, wat die koste van hul finansiering gaan verhoog.

“Hierdie skuif verminder die langtermyn-groeipotensiaal van die ekonomie deur hoër finansieringskoste, groter wisselvalligheid en minder likiede markte.”

Volgens Maarten Ackerman, hoofekonoom van Citadel, het die effektemark verlede week ’n afgradering begin inprys omdat baie buitelanders staatseffekte verkoop het.

Hy glo verdere uitvloei sal eers gesien word wanneer Suid-Afrika uit die World Government Bond Index gehaal word.

Ackerman sê Suid-Afrika was al voorheen in rommel-status. “Rommelstatus beteken nie dit is die einde van die ekonomie nie en dat ons nie sake kan doen nie.

“Daar is baie ekonomieë wie se staatskuld nie beleggingsgraad is nie wat redelik goed vaar. Die geskiedenis wys lande soos Brasilië het nie ineengestort nadat hulle tot rommel afgegradeer is nie en in ’n groot mate het die land beter begin presteer omdat beleggers meer sekerheid gekry het.”

Hy sê dit is ongelukkig so dat Suid-Afrika reeds in ’n ekonomiese insinking is en boonop met die Covid-19-krisis worstel. “Die fokus vir nou is om te fokus op die gesondheid van ons samelewing en om seker te maak die verspreiding van die virus word bekamp voordat ons weer aan die ekonomie begin werk.”

Meer oor:  Intellidex  |  S&P  |  Citadel  |  Fitch  |  Moody's  |  Kredietgradering  |  Rommel  |  Covid-19  |  Afgradering
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.