Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Reserwebank ‘misluk’, kon SA hoop gegee het

Enkele ekonome – en alle Suid-Afrikaners met skuld – was Donderdag teleurgesteld dat die Reserwebank nie die jaar begin het met die aankondiging dat die rentekoers verlaag word nie.

Die Suid-Afrikaanse Reserwebank in Pretoria. Foto: Getty Images

Die besluit was weliswaar nie ’n verrassing nie, met die meeste ekonome wat dit voorspel het.

Prof. Raymond Parsons, ekonoom van Noordwes-Universiteit se sakeskool, sê dis jammer dat die Reserwebank nie maar bereid was om die rentekoers te verlaag nie.

Die besluit beteken die repokoers bly 3,5% en banke se prima rentekoers 7%.

“In die huidige ongewone ekonomiese omstandighede kan die besluit nie op nougesette tegniese gronde alleen geneem word nie, maar eerder deur die uitoefening van breë diskresie.”

Parsons sê dis welbekend dat monetêre beleid nie ekonomiese groei alleen kan dra nie, maar laer rentekoerse sou wel ondernemings en huishoudings kon help, veral te midde van die voortslepende effek wat die Covid-19-verwante inperkings het. “Die monetêrebeleidskomitee (MBK) het dié keer misluk om die inspuiting van vertroue vir die ekonomie te gee wat dit nodig het.”

Parsons sê die feit dat die MBK so verdeeld was – twee lede het vir ’n verlaging van 25 basispunte gestem en drie dat die rentekoers onveranderd bly – wys daarop dat daar ’n saak vir ’n laer rentekoers uit te maak is.

Die besluit kom terwyl Lesetja Kganyago, president van die Reserwebank, juis gesê het die sentrale bank verwag nie dat inflasie oor die volgende drie jaar veel bo 4,5% gaan styg nie. Vir 2021 word inflasie van 4% voorspel, vir 2022 4,5% en vir 2023 4,6%.

Dit beteken dat inflasie vyf jaar lank – van 2019 tot 2023 – op of net-net oor die middelpunt van die Reserwebank se teikenband van tussen 3% en 6% sou bly.

Kganyago sê daar is geen teken van vraagkant-druk op die inflasiekoers nie. Nie eens die swakker rand het pryse laat styg nie.

Hoewel kospryse styg, is daar faktore soos ’n verwagte rekord-mielieoes wat dit waarskynlik weer sal temper.

Brandstofpryse en kragtariewe blyk in dié stadium die grootste bronne van kommer te wees, tesame met die vrees van “fiskale risiko’s” wat die rand kan laat verswak.

Die Reserwebank beskou die risiko’s vir inflasie nietemin as gebalanseerd.

Mamello Matikinca-Ngwenya, FNB se hoofekonoom, sê ook die vraag in die ekonomie bly baie laag. Pryse styg oor ’n breë front omtrent glad nie of baie min, insluitend mediesefondspremies, versekering en huur.

Enige derde golf van Covid-19-infeksies en gepaardgaande strenger inperkings, en enige vertraging in die regering se entstofprogram, sal ekonomiese herstel vertraag en inflasie baie laag hou.

Lukman Otunuga, senior ontleder van die valutahandelaars FXTM, sê daar was sterk gronde vir ’n laer rentekoers terwyl inflasie geanker is en die groeivooruitsig “bewerig en broos”.

Alle oë sal nou op die Februarie-begrotingrede wees om te kyk of die trajek van staatskuld afplat. Dit kan die rand se waarde beïnvloed en dus antwoorde oor een van die Reserwebank se grootste vrese gee.

Meer oor:  Rentekoers  |  Ekonomie  |  Inflasie  |  Inflasiekoers  |  Monetêre Beleid  |  Reserwebank
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.