Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Reserwebank ‘speel Russiese roulette’

Dis asof die Reserwebank nou Russiese roulette speel – die sentrale bank hoop maar ’n afgradering deur Moody’s Investors Service gebeur nie of het nie ’n groot invloed op die rand en die inflasiekoers nie.

Die laer rentekoers het ontleders verwar oor die Reserwebank se boodskap. Foto: iStock

Dit is die reaksie van Peter Attard Montalto, hoof van kapitaalmarknavorsing van die navorsingsfirma Intellidex, op die verrassende besluit om die rentekoers met 0,25 van ’n persentasiepunt te verlaag.

Hoewel baie verbruikers en ekonome dit as ’n welkome stap beskou, het dit ook die meeste ontleders heeltemal onkant gevang – en dít, sê Montalto, skep groot onsekerheid oor die monetêre beleid.

Dieselfde risiko’s wat in Maart gegeld het, geld steeds, wat die vraag laat ontstaan waarom die rentekoers juis nou verlaag is.

Montalto sê al meer “kommunikasieprobleme” blyk uit sowel die monetêrebeleidskomitee (MBK) se verklaring as uit vraetyd ná Lesetja Kganyago, president van die Reserwebank, se nuuskonferensie.

Dit maak ontleders baie onseker oor wat die Reserwebank volgende gaan doen.

Die meeste ekonome het geen verandering in die rentekoers verwag nie – nie voordat Februarie se begrotingsrede getoon het of die land se skuldvlakke en begrotingstekort verder agteruitgegaan het nie en ook nie voordat Moody’s Investors Service einde Maart oor die land se kredietgradering besluit het nie.

Die ekonoom Peter Attard Montalto van Intellidex.

Dít was immers die Reserwebank se boodskap in November toe die MBK gewaarsku het hy kan nie die rentekoers verlaag en dan weer verhoog as die rand ná ’n afgradering verswak nie.

Nou lyk dit asof die Reserwebank sê dat as daar ’n uitval weens die afgradering en ander risiko’s is, sal hy daarop reageer – dus die teenoorgestelde benadering, sê Montalto. “Daar was ’n ooglopende maar swak verduidelikte ommeswaai.”

Nema Ramkhelawan-Bhana, navorsingshoof van RMB Global Markets, beaam dat ontleders “effens verward” gelaat is deur die besluit. Die rand en opbrengskoerse op staatseffekte het ná die aankondiging wipplank gery omdat die Reserwebank vantevore gewaarsku het dat risiko’s vir die inflasiekoers aan die styg was.

“Dit sou impliseer die rentekoers moet onveranderd gelaat word totdat die risiko’s bedaar het. Tog kan die Reserwebank min doen om fiskale en kredietgraderings-uitkomste te beïnvloed. Hy kan net reageer wanneer gebeure plaasgevind het – ’n waarskuwing wat Kganyago in vraetyd beklemtoon het.” 

Montalto sê ook die MBK se redes vir die verlaging is nie heeltemal duidelik uit die verklaring nie – “en dis waar die grootste probleem om die MBK aan die ontwikkel is,” sê Montalto.

Wat gaan volgende gebeur?

Montalto sê dis hoogs onwaarskynlik dat die Reserwebank in Maart – net ’n week voor Moody’s se besluit – weer die rentekoers sal verlaag, iets wat die kwartaallikse projeksiemodel van die Reserwebank wel voorspel. 

Ramkhelawan-Bhana meen die rentekoersverlaging is wel geregverdig, en RMB voorspel selfs twee verdere verlagings vir 2020, soos die Reserwebank self.

Die belangrikste redes wat die MBK vir die verlaging uitstippel, is nie soseer inflasie nie – dit was reeds in November ver onder die middelpunt (4,5%) van die Reserwebank se teikenband geanker – maar omdat die situasie vir die wêreldekonomie nou gunstiger lyk.

Montalto meen egter dat Moody’s se besluit ’n baie diepliggende invloed kan hê en daarom is dit nie iets wat die Reserwebank ligtelik – “soos ’n styging in die olieprys” – kan opneem nie.

Intellidex het al aangevoer dat Moody’s se afgradering reeds in ’n mate ingeprys is in die waarde van die rand, en dat die Reserwebank dit problematies gaan vind as niks ná die afgradering gebeur nie, terwyl die rentekoers om dié rede in November onveranderd gehou is.

“Die randstabiliteit het almal verras, insluitend die Reserwebank. Daarby is die wisselkoers-deurvloei buitengewoon laag, wat beteken dat enige swakheid of daalrisiko van die rand met selfs minder inflasierisiko geabsorbeer kan word.”

Met wisselkoers-deurvloei word bedoel die invloed wat die swakker rand op pryse, en dus inflasie, het.

k
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.