Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Resessie, swak groei wink vir SA, waarsku Moody’s
Trae ekonomiese groei word vanjaar verwag.

Die kans dat Suid-Afrika vanjaar weer ’n tegniese resessie gaan beleef, is groot, sê Moody’s Investors Service.

Trae wêreldwye ekonomiese groei gaan ook nie help nie.

Moody’s, die laaste kredietgraderingsagentskap wat Suid-Afrika se staatskuld nog op beleggingsgraad gradeer, het sy verwagtinge vir reële groei in Suid-Afrika tot net 1% vir 2019 verlaag nadat teleurstellende groeisyfers Dinsdag uitgereik is.

Die land se bruto binnelandse produk (BBP) het in die eerste kwartaal op ’n kwartaalgrondslag met 3,2% ingekrimp op ’n geannualiseerde grondslag of met 0,8% nie geannualiseerd nie. 

As dit in die tweede kwartaal weer op ’n kwartaalgrondslag krimp, sal die land dus in ’n tegniese resessie wees.

Moody’s sê wel die oënskynlike bereidwilligheid van pres. Cyril Ramaphosa om strukturele hervorming deur te voer, is rede tot hoop, maar hy meen dit sal lank duur om die land te hervorm, selfs onder die beste omstandighede.

En die beste omstandighede heers nie – sowel plaaslik as internasionaal.

“Suid-Afrika word deur baie ingewikkelde ekonomiese probleme in die gesig gestaar,” sê Moody’s in ’n verslag wat hy Donderdag uitgereik het.

Annabel Bishop, hoofekonoom van Investec Batebestuur, is meer optimisties as Moody’s oor die regering se vermoë om hervormings deur te voer, maar meen internasionale verwikkelinge is ’n groot bedreiging vir Suid-Afrika se vooruitsigte.

Sy is veral bekommerd oor die eskalerende handelsoorlog tussen die VSA en China.

Moody’s het sy vooruitsigte vir wêreldgroei in 2019 met 0,4 persentasiepunt tot 2,8% verlaag. Hy sê die twee bepalende faktore vir wêreldgroei vanjaar is die handelsoorlog tussen die VSA en China en die verswakkende situasie in die Midde-Ooste weens die spanning tussen die VSA en Iran.

Moody’s se siening oor China

Die kredietgraderingsagentskap skets drie moontlike scenario’s vir China:

  • Waarskynlikste (45%-kans): Geen handelsooreenkoms word tussen die VSA en China bereik nie. In dié scenario bly 25%-invoertariewe op $250 miljard se invoergoedere uit China van krag, maar dit vererger nie. China sal in dié geval ook nie verder weerwraak neem met tariewe van sy eie nie.
  • Minder waarskynlik, maar steeds met ’n groot moontlikheid (40%-kans): Die VSA pas wel sy 25%-invoertarief toe op bykans $600 miljard se invoergoedere uit China en China neem in gelyke mate weerwraak. Hierdie handelsversperrings tussen die twee grootste ekonomieë op aarde knou wêreldhandel.
  • Onwaarskynlikste (15%-kans): Die VSA en China bereik ’n ooreenkoms op die G20-beraad van 28 tot 29 Junie in Osaka, Japan. Tariewe word verlaag, hoewel die spanning tussen die twee lande hoog bly.

Indien die handelsoorlog vererger, voorspel Moody’s dat die VSA en China regstreeks tussen 0,3 persentasiepunt en 0,5 persentasiepunt se groei kan verloor, maar die uitkringende onregstreekse gevolge sal verwoesting saai.

“Geen bedryf sal dit kan vermy nie,” waarsku Moody’s.

Bishop sê Suid-Afrika sal swaarkry indien die handelsoorlog vererger.

“Aangesien Suid-Afrika ’n klein, oop ekonomie is, het die prestasie van die wêreldekonomie ’n groot invloed op hom. Swakker, veral baie swak wêreldgroei en selfs ’n wêreldresessie, word onder ’n handelsoorlog verwag. Dit kan Suid-Afrika se ekonomie in ’n resessie dwing wat baie erger sal wees as wat ons die afgelope dekade gesien het, en eerder sal herinner aan die 2008-’09-resessie wat die land toe verduur het weens ’n wêreldresessie.”

Volgens sy hersiene vooruitsigte verwag Moody’s nou dat Suid-Afrika in 2019 die swakste van al die G20-lede sal groei.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.