Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
SA firmas sál skuld kan betaal, sê Moody’s

Moody’s Investors Service glo Suid-Afrikaanse maatskappye se vermoë om hul skuld terug te betaal wat in die komende jaar verskuldig word, is voldoende.

A monitor displays Moodys Corp. signage on the flo
Moody's se hoofkantoor in New York. Foto: Getty Images

Moody’s gradeer 18 maatskappye buite die finansiële bedryf wat omtrent R655 miljard se uitstaande skuld het.

Daarvan moet omtrent 11% of R70 miljard binne die komende 12 maande afbetaal word.

Die maatskappye het altesaam R202 miljard se kontant beskikbaar. Die likiditeit word ook ondersteun deur R149 miljard se kredietgeriewe wat nog onbenut is.

Volgens Moody’s toon sy ontleding die vervaldatums van die uitstaande skuld is betreklik gelyk versprei oor die komende vyf jaar en dit help om die risiko met herfinansiering te beheer.

10 met die meeste skuld

Hier is die tien van die maatskappye wat Moody’s gradeer met die meeste skuld in Amerikaanse dollar:

  • Sasol: $9,2 miljard
  • Transnet: $9,1 miljard
  • MTN: $5,9 miljard
  • Growthpoint: $3,5 miljard
  • Naspers: $3,2 miljard
  • Redefine: $2,5 miljard
  • AngloGold Ashanti $2,05 miljard
  • Gold Fields: $2,1 miljard
  • Sibanye-Still water: $1,7 miljard
  • Fortress: $1,2 miljard

Sowat 36% van al die skuld moet eers oor meer as vyf jaar terugbetaal word, vergeleke met 44% vir soortgelyke ondernemings in Europa.

Sasol, Naspers en Transnet het die grootste persentasie skuld wat in meer as vyf jaar verval.

Die skuld waarna Moody’s verwys, behels skuldbriewe en banklenings.

Binne die komende 12 maande is omtrent 83% van die skuld wat terugbetaalbaar is, banklenings en 17% is skuldbriewe.

Wisselkoers

Van die totale uitstaande skuld, is 49% in dollar uitgereik. Die dollar-skuld is meestal dié van mynmaatskappye soos AngloGold Ashanti, Gold Fields en Sibanye-Stillwater, asook Naspers en Sasol.

Moody’s meen die risiko van die rand se wisselkoers met die dollar is in die algemeen matig tot klein omdat kontantvloei wat in buitelandse geldeenhede gekry word en die skuld meet, met mekaar tred hou.

Die maatskappye is minder afhanklik van die toestande vir herfinansiering in die plaaslike kapitaalmark as die toestande in internasionale kapitaalmarkte.

Kommer oor korporatiewe beheer

Moody’s het gesê die mislukking van korporatiewe bestuur by maatskappye raak al hoe meer algemeen in Suid-Afrika. “As dit erg genoeg is, kan dit ’n maatskappy se toegang tot sowel die aandeel- as skuldmark beperk.”

“Hoewel ons nie ’n volledige onttrekking van marktoegang onder die ondernemings sien wat ons gradeer nie, is daar gevalle soos met Fortress, waar die gradering verlaag is weens ondersoeke oor ongerymdhede ten opsigte van verbode verhandeling wat ons vertroue verminder het dat hy toegang tot die effektemark kan kry, wat tot swakker likiditeit gelei het.”

Ander sluit in Transnet, waar onreëlmatige besteding van R8,1 miljard in die 2018 boekjaar aangemeld is. Dit het tot ’n gekwalifiseerde ouditmening gelei wat as ’n voorval van wanbetaling beskou word onder sy R15,8 miljard leningsooreenkomste. Transnet het egter daarna kwytskelding van dié voorwaardes van leners gekry.

“Suid-Afrikaanse maatskappye se likiditeit word goed ondersteun met ’n diep poel van plaaslike beleggers danksy ’n goed ontwikkelde finansiële sektor en markte,” luidens Moody’s se verslag.

Suid-Afrikaanse banke het die afgelope paar jaar hul lenings aan maatskappye verhoog, “wat die risiko van hul bates verbeter het”.

“Die kontantvloei van Suid-Afrikaanse maatskappye is meer standvastig as dié van huishoudings, hoewel ons ’n toename in wanbetalings deur maatskappy asook huishoudings begin sien.”

In geheel verteenwoordig die blootstelling aan maatskappye omtrent ’n derde van banke se totale uitstaande skuld.

Kommersiële verbande het in Junie 6% jaar tot jaar gestyg. Lenings aan maatskappye het ook omtrent soveel gestyg.

“Dit toon daar was nie enige wesenlike strenger optrede deur banke ten opsigte van die verskaffing van krediet aan maatskappye nie.”

“Ons verwag dat finansieringstoestande stabiel gaan bly in ooreenstemming met ons siening dat die banksektor oor die komende 12 tot 18 maande standvastig gaan bly, ten spyte van bedryfstoestande wat swak is.”

    MyStem: Het jy meer op die hart?

    Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

    Ons kommentaarbeleid

    Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

    Stemme

    Hallo, jy moet ingeteken wees of registreer om artikels te lees.