Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Sakesiening: Waarom Moody’s nié sal afgradeer
Dr. Roelof Botha, onafhanklike ekonoom.

Die volgende hersiening van die status van Suid-Afrika se staatseffekte deur die kredietgradeerder Moody’s Investors Service is om die draai.

Moody’s het Suid-Afrika se staatskuld steeds op beleggingsgraad, maar ’n verdere afgradering sal dit ook na rommelstatus laat daal.

Siniese ontleders wys daarop dat die ander twee gesaghebbende kredietgradeerders (Fitch Ratings en S&P Global Ratings) reeds die land se staatseffekte op rommelstatus het en dat Moody’s moontlik nie uit pas met hulle wil wees nie.

Een van die kernredes vir die afgradering deur Fitch en S&P is die volgehoue styging in staat­skuld as persentasie van die bruto binnelandse produk (BBP), wat geruime tyd al bo 50% is.

Ten einde ’n objektiewe mening te vorm oor die kans op ’n verdere afgradering van Suid-Afrika se staatskuld, is dit raadsaam om die ander belangrike redes vir die afgradering deur Fitch en S&P van nader te beskou.

1. Waar is die plan?

Eerstens wou die kredietgradeerders ’n duidelike en werkbare plan sien om die styging in die verhouding van staatskuld tot die BBP hok te slaan.

Só ’n plan was afwesig in die mediumtermynbegrotingsraamwerk van Oktober 2017 – trouens, die vorige minister van finansies het laat blyk dat die begrote staatsinkomste vir die 2017-’18- fiskale jaar ’n tekort van sowat R50 miljard sou hê.

Die Februarie-begroting was egter ’n perd van ’n ander kleur.

’n Kombinasie van uitgawe-besparings en die verhoging van die BTW-koers het meegebring dat die begrotingstekort as persentasie van die BBP weer nader na die 3%-vlak beweeg het.

Derhalwe ’n regmerkie vir die behoud van beleggingsgraad deur Moody’s.

2. Waar is die groei?

’n Tweede bron van kommer was die swak ekonomiese groeikoers, wat sedert 2011 stelselmatig gedaal het.

Danksy die landbou, hoër metaal- en mineraalpryse en goeie verbruiksbesteding in die tweede helfte van verlede jaar het die BBP-groeikoers vir 2017 vriend en vyand verras en meer as verdubbel teenoor 2016 se syfer tot 1,3%. Nog ’n regmerkie.

3. Waar is die ranad?

Derdens was daar geregverdigde kritiek op die wisselvallige en swak wisselkoers. Hier is die vordering merkwaardig.

Die rand was vroeg vandeesmaand meer as 40% sterker as in Januarie 2016 en dié herstel het die wind behoorlik uit die seile van die kredietgradeerders gehaal.

Dan het Moody’s in die vierde plek daarop gewys dat Suid-Afrika se monetêre beleid te beperkend is en nie ondersteuning vir ekonomiese groei en werkskepping bied nie. Dié kritiek is onder meer gegrond op die feit dat inflasie sedert einde 2016 met 240 basispunte gesak het, maar die enigste rentekoersverligting deur die Reserwebank was ’n skamele 25 basispunte in Julie verlede jaar.

Noudat die rand so mooi herstel het, is dit bykans onvermydelik dat verdere dalings in die repo- en prima koers op hande is, wat vir Moody’s tevrede sal stel.

Uiteindelik is enige besluit oor die status van die land se staatseffekte ten nouste met fiskale aanwysers verweef.

  • Dr. Roelof Botha is ’n onafhanklike ekonoom, ’n dosent by Gibs en ’n vorige wenner van Sake se Ekonoom van die Jaar-wedstryd.
Meer oor:  Fitch  |  Moody's  |  S&P  |  Roelof Botha  |  Staatseffekte  |  Ekonomie  |  Sakesiening  |  Kredietgradering  |  Rommelstatus  |  Kredietgradeerders
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.