Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
‘Trumponomics’ verwar die markte
Foto ter illustrasie.Foto: Getty Images

JPMorgan Chase & Co se handelaars het nie die afgelope week pres. Donald Trump se praatjies gekoop nie.

Dinsdag het belangrike Amerikaanse aandele-indekse met meer as 3% gedaal weens hernude vrese oor ’n handelsoorlog met China. Dit was enkele dae nadat Trump ná ’n ete met pres. Xi Jinping getwiet het: “Betrekkinge met China het met rasse skrede gevorder.”

“Dit lyk nie asof daar in werklikheid enige ooreenkoms op die ete bereik is nie,” het JPMorgan later die dag in ’n nota aan sy kliënte gesê. As Trump se twiets “nie heeltemal gefabriseer is nie, is dit minstens erg oordrewe”.

Die wantroue van die bank se handelaars onderstreep ’n breër dilemma vir Wall Street-beleggers: Hoe ernstig moet ’n mens kommentaar van die Withuis bejeën?

Aan die een kant weet handelaars lankal dat Trump se kordate uitsprake nie altyd water hou nie, wat die uitwerking daarvan op sekuriteite uiteindelik verdoof.

Aan die ander kant het markwisselvalligheid in 2018 toegeneem, deels weens verwarring oor kommentaar van amptenare, wat dit moeiliker maak om te ignoreer.

Hierdie situasie skep beslis onnodige onbestendigheid en komplikasies vir die beleggingsproses
Maria Vassalou

“ ’n Mens moet jou eie oordeel gebruik oor watter aankondigings jy ernstig moet opneem,” sê Maria Vassalou, portefeuljebestuurder by Perella Weinberg Partners, met $685 miljoen in haar portefeulje.

“Hierdie situasie skep beslis onnodige onbestendigheid en komplikasies vir die beleggingsproses.”

Maar dis nie net Trump wat die kaarte deurmekaar krap nie.

Onverwagse kommentaar van Withuis-amptenare soos Steven Mnuchin, minister van finansies, en Larry Kudlow, ’n ekonomiese raadgewer, het handelaars al op hol gehad.

Hulle is albei al meer as twee dosyn kere deur Reuters geïdentifiseer as die aandrywers van markbewegings.

Mnuchin het die dollar in Januarie tot ’n driejaarlaagtepunt gedryf met hy kommentaar op die Wêreld- Ekonomiese Forum in Davos dat ’n swakker geldeenheid “goed is” vir Amerika.

Binne ure het dit gelyk of Trump hom weerspreek toe hy gesê het hy wil uiteindelik ’n sterk dollar hê, wat die Amerikaanse geldeenheid weer laat versterk het.

Kudlow het byvoorbeeld op 4 April aan verslaggewers gesê dit is moontlik dat Amerikaanse invoerheffings op Chinese nywerheidsprodukte nooit van krag sal word nie en moontlik bloot ’n onderhandelingstaktiek is.

Aandeelpryse het gestyg ná dié opmerkings, wat ’n anonieme Withuis-amptenaar later aan Reuters verduidelik het bedoel was om die markte gerus te stel.

Maar termynkontrakte op aandele het die volgende dag geval nadat Trump in ’n verklaring gesê het hy het handelsamptenare beveel om tariewe op ’n bykomende $100 miljard se Chinese invoergoedere te oorweeg as straf vir die Chinese weerwraak op invoertariewe wat vroeër aangekondig is.

Sommige beleggers het die beskerming van hul bates teen Withuis-aangevuurde onstuimigheid in hul eie hande geneem.

In hierdie stadium verwag ’n mens omstrede hoofopskrifte. Dit het my aanvanklik gek gemaak, maar ons verwag dit nou al
Juan Gomez

Juan Gomez, hoof van die verskansingsfonds-maatskappy Black Swan Quantitative Advisors, wat $75 miljoen se bates bestuur, sê hy moes sy model – wat op opsies fokus – die afgelope twee jaar aanpas om groter beskerming teen markwisselvalligheid in te bou, deels in reaksie op opmerkings uit die Trump-administrasie.

“In hierdie stadium verwag ’n mens omstrede hoofopskrifte,” sê Gomez. “Dit het my aanvanklik gek gemaak, maar ons verwag dit nou al.”

Katina Stefanova, hoof van Marto Capital met sowat $300 miljoen onder bestuur, sê haar verskansingsfonds-maatskappy het ’n “Trumponomics”-indeks van sekuriteite geskep om hul breër portefeulje te verskans.

Stefanova sê haar wins vanjaar – sowat 7% tot einde November – sou sowat 2 persentasiepunte laer gewees het sonder die indeks, wat onlangs gefokus het op die impak van Amerika se handelsoorloë op byvoorbeeld Chinese tegnologie-aandele, Amerikaanse nywerheidsmaatskappye en Asiatiese geldeenhede.

“Jy moet die Withuis steeds baie ernstig opneem,” sê Stefanova. “Teenstrydighede swaai markte en beïnvloed sentiment op sigself.”

Professionele beleggers sê die Withuis se uitwerking op die markte is moeilik om te vermy.

Sekuriteite sal bykans vir seker aanhou reageer op stellings oor Amerikaanse handelsbeleid, rentekoersveranderings en ander ekonomiese kwessies.

Die CBOE-wisselvalligheidsindeks, ook bekend as VIX, ’n algemene maatstaf van waargenome vrees in die markte, is vanjaar bykans 90% hoër.

“Miskien kan sommige mense sien wat gaan vir wat, maar dit is baie moeilik,” sê Fritz Folts, hoofbeleggingstrateeg van 3Edge Asset Management, wat sowat $800 miljoen bestuur. “Jy moet kyk na wat hulle doen en nie wat hulle sê nie.”

– Reuters

Meer oor:  Jp Morgan Chase  |  Donald Trump  |  Wall Street  |  Aandeelmark  |  Effekte  |  Aandeelprys
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.