Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Vrae oor NGV, Eskom maak beleggers bang
Prof. Raymond Parsons

Die “Ramaforie” wat geheers het sedert pres. Cyril Ramaphosa die ANC-leier en staatshoof geword het, begin verdamp.

Een van die redes hiervoor is hernude politieke onsekerheid, sê prof. Raymond ­Parsons, ekonoom verbonde aan die Noordwes-Universiteit se sakeskool.

Parsons is die medesamesteller van die sakeskool se beleidsonsekerheidsindeks (PUI).

Dié indeks word kwartaalliks gepubliseer.

Die PUI het vir die tweede kwartaal tot 51 indekspunte gestyg.

Dit is hoër as die optimistiese 49,6 van die eerste kwartaal (net nadat Ramaphosa as staatshoof oorgeneem het) en aansienlik hoër as die beste punt tot dusver van 38,8 punte in die vierde kwartaal van 2016.

Enige punt bo 50 weerspieël groter onsekerheid.

“Hoewel sommige onlangse beleidsontwikkelings elemente van noodsaaklike hervorming bevat, is daar verskeie ander wat onsekerheid verhoog het,” sê Parsons.

Dit sluit onder meer kwessies soos grondhervorming, die hersiene Mynbouhandves, die voorstelle oor die nuwe Nasionale Gesondheidsversekering, die voortslepende Eskom-sage en politieke faksievorming in.

“Hierdie faktore is nie almal van onmiddellike belang of weeg ewe swaar nie, maar hul gelyktydige invloed verduidelik waarom daar ’n onderstroming van politieke onsekerheid voortduur,” sê Parsons.

Die samestellers kyk na beleidsonsekerheid waaroor daar in die media berig word, ’n peiling onder ekonome oor onsekerheid in die ekonomie en die Buro vir Ekonomiese Ondersoek se peiling onder vervaardigers oor hul siening van die politiek en beleid.

Parsons verduidelik dis onvermydelik dat ’n tydperk van politiek een ekonomiese verandering, soos Suid-Afrika tans beleef, die politieke onsekerheid sal laat wipplank ry.

Dit is selfs moontlik dat die styging in onsekerheid in die tweede kwartaal vanjaar weer later in die jaar kan afneem.

“Daar is steeds heelwat welwillendheid jeens die Ramaphosa-presidentskap in die markte en die sakesektor, soos die onlangse positiewe beleggingsbesluite deur maatskappye soos Old Mutual en Mercedes-Benz bewys.”

Maar as ’n mens na die wyer prentjie kyk, sal beleidsonsekerheid se daling afhang van tasbare bewyse dat die ekonomie strukturele hervorming ondergaan, waarsku Parsons.

“Suid-Afrika moet sy spelpeil in ’n hoogs mededingende wêreld verhoog en die regering se vermoë om beleggersvertroue te herbou, sal ’n sleutelfaktor wees.”

Hy sonder veral die kwessie van grondhervorming uit.

“Die wyse waarop grondhervorming bestuur word, sal ’n belangrike bepaler van toekomstige vlakke van beleidsonsekerheid en beleggersvertroue wees.”

Hy waarsku ook dat die land die wind van voor sal kry indien ’n internasionale handelsoorlog en hoër internasionale rentekoerse ’n werklikheid word.

Dis veral die rand wat sal deurloop wanneer beleggers hul geld uit ontluikende markte soos Suid-Afrika onttrek. Suid-Afrika met sy ekonomiese groei wat agterbly by ander ontluikende lande asook sy skuldlas wat vergroot as kapitaal die land uitvloei, is weerloser teen hierdie winde as sommige van sy eweknieë.

“Hoe meer Suid-Afrika sy sake agtermekaar kry, hoe sterker is sy vermoë om internasionale teenspoed te hanteer.”

Meer oor:  Nwu  |  Raymond Parsons  |  Handelsoorlog  |  Ekonomie  |  Ekonomiese Beleid
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.