Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Ekonomie
Vroeë tekens van lente in die ekonomie?

Augustus was dalk ’n vroeë lente vir winkeliers en die Suid-Afrikaanse ekonomie.

Annabel Bishop, hoofekonoom van Investec.

Kleinhandelverkope was in dié maand 2,5% hoër as ’n jaar gelede en is die sterkste sedert Mei.

Die syfers het ekonome verras, wat enigiets tussen ’n daling van 0,1% in verkope en groei van net 0,3% voorspel het.

Verskeie kategorieë het die beste groei aangeteken sedert Maart – die maand voordat belasting op toegevoegde waarde met ’n persentasiepunt verhoog is. Dit sluit in verkope by algemene handelaars, wat 1,7% beter was as ’n jaar gelede.

Die syfers is in reële waarde, wat die uitwerking van prysstygings (dus inflasie) uitsluit.

Volgens Statistieke Suid-Afrika is die beste groei aangeteken in die kategorie vir meubels en huishoudelike toestelle, waarvan die groei met 10,4% gestyg het. Verkope van klere en skoene het met 6% gestyg en van toiletware en medisyne met 3,1%.

Net een kategorie – ysterware, glas en verf – het van jaar tot jaar gedaal, met 2%.

Kevin Lings, hoofekonoom van Stanlib, sê dié “baie beter as verwagte” kleinhandelverkope kom ondanks die styging in die petrolprys.

“Dit sal Suid-Afrika uit die resessie help kom, hoewel die algehele groeikoerse uiters laag bly.”

Annabel Bishop, hoofekonoom van Investec, wys daarop dat hoewel die syfers baie beter as verwag is, is dit nog baie laer as die geskiedkundige gemiddelde van 4,5%.

Ander syfers wat die afgelope ruk uitgereik is, is minder rooskleurig. Die indeks van ekonomiese transaksies vir September en vir die hele derde kwartaal het Mike Schüssler, hoofekonoom van Economists.co.za, juis dié week laat glo die resessie gaan nog ’n derde kwartaal voortsleep.

Bishop sê die September-syfers sal die deurslag gee, maar dit lyk in dié stadium asof kleinhandelverkope ’n positiewe bydrae tot die land se bruto binnelandse produk (BBP) gaan lewer.

Die feit dat Jeff Radebe, minister van energie, in September ’n groot styging in die petrolprys afgeweer het, kan dalk deurslaggewend wees vir ekonomiese groei.

Verbruikers se besteding verteenwoordig nagenoeg 60% van die BBP.

Die Nedbank-ekonome Johannes Khosa en Dennis Dykes stem in hul ontleding saam dat dit lyk asof die resessie beëindig is, maar hulle waarsku: “Kleinhandelverkoopsyfers gaan na verwagting wisselvallig en in die algemeen gedemp bly op kort termyn, onderdruk deur swak huishoudelike geldsake weens die powere arbeidsmark, hoër belastings en die styging van brandstof- en ander pryse.”

Hulle waarsku dat inflasie oor die volgende paar maande gaan styg. Hulle voorsien egter nie dat die Reserwebank vanjaar die rentekoers gaan verhoog nie.

Meer oor:  Annabel Bishop  |  Kleinhandelverkope  |  Ekonomie  |  Ekonomiese Groei  |  Kleinhandel  |  Bbp  |  Resessie
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.