Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Energie
Eskom draai stokkies by Skoor

Weens ’n misverstand en swak kommunikasie het die parlement se staande komitee oor openbare rekeninge (Skoor) nie Dinsdag Eskom se jaarverslag ontvang nie.

Megawatt Park, Eskom se hoofkantoor in Johannesburg. Foto: Getty Images

Eskom het ’n herrie veroorsaak op ’n vergadering van Skoor deurdat hy ter elfder ure kennis gegee het dat hy “nie gereed” gaan wees vir die vergadering wat al op 12 Februarie versoek is nie.

Pravin Gordhan, minister van openbare ondernemings, het probeer verskoning maak vir Eskom se versuim om aan Skoor verslag te doen oor sy jaarverslag en huidige ondersoeke, waaronder dié van die spesiale ondersoekeenheid (SOE).

Maar Eskom voer aan dat hy verwar is deur Skoor se twee briewe – een op 12 Februarie en een op 19 Februarie.

Prof. Malegapuru Makgoba, voorsitter van Eskom, het te velde getrek oor die “verwarring” wat Skoor veroorsaak het met sy twee afsonderlike versoeke.

Op die 12de het Skoor versoek dat Eskom sy jaarverslag voorlê aan die komitee. Eskom was ook veronderstel om uit te brei en toestemming te vra vir enige uitbreidings en afwykings van sy huidige tenders en verkrygingsprosesse.

Op 19 Februarie het Skoor ook versoek dat die jaarverslag aan die komitee oor Eskom se huidige ondersoeke op dieselfde dag ingehandig sal moet word en voorgestel dat daar twee afsonderlike vergaderings sou geskied – een om 09:30 tot 13:00 vir die jaarverslag en ondersoeke, en een om 18:30 vir die uitbreidings en afwykings.

Makgoba sê Eskom ís gereed om sy jaarverslag voor te lê, maar nie alles op een slag nie.

Gordhan het aangevoer dat Eskom egter nié gereed is om die jaarverslag, wat al tussen vier en vyf maande gelede voltooi is, voor te lê nie.

LP’s in die komitee was ontsteld hieroor.

Bheki Hadebe, ANC-LP, sê Eskom wil spesiale behandeling hê. “Ons moet ons voet neersit,” het hy gesê.

Ntombovuyo Mente, EFF-LP, het ’n stewige waarskuwing aan Eskom gerig. “Dit is die eerste en laaste keer dat hulle nie gereed sal wees vir ons nie. As hul huis nie in orde is nie, is dit nie ons probleem nie.”

Skoor het ingestem dat Eskom nou op 3 Maart sy jaarverslag en stand van ondersoeke sal voorlê.

Gordhan sê deel van die rede vir die kort kennisgewing is omdat hy nie die brief van die 19de betyds gelees het nie.

Die brief het Vrydag gearriveer, en hy het dit eers ná die naweek oopgemaak.

Meer oor:  Eskom  |  Staatsondernemings  |  Parlement  |  Komitee  |  Skoor  |  Jaarverslag
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.