Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Energie
Olieprys daal weer ná Iran-aanval

Die prys van Brent-ruolie het weer begin daal nadat dit in reaksie op die Amerikaanse lugaanval op die Iranse genl.maj. Kassem Soleimani tot die hoogste vlak in drie maande gestyg het.

Die prys het ná die aanval tot bó $70 per vat gestyg, maar het nou weer tot $68 per vat gedaal.

Dit was die eerste keer sedert September dat die olieprys meer as $70 per vat was.

Hoewel die politieke situasie in die Midde-Ooste in ’n ommesientjie kan verander, vloei olie tans nog ongehinderd uit die streek.

Die oliemark het ’n onstuimige begin tot 2020 beleef met die Amerikaanse aanval wat die vrees vir ’n volskaalse oorlog in die gebied opnuut laat opvlam.

Die prys van Brent-ruolie is steeds sowat 3% hoër as voor die aanval, maar dit verg ’n groot ontwrigting van produksie om die prys tot ’n langdurige verhoogde vlak te stoot.

’n Werker by ’n Irakse olieraffinadery draai ’n kraan toe. Foto: Getty Images

“Alhoewel daar geen bykomende vate olie gelewer word as gevolg van die toenemende konflik tussen die VSA en Iran nie, bly die situasie vloeibaar,” sê Michael Tran, strateeg van RBC Capital.

Brent-ruolie se prys het Dinsdagmiddag met 55c, oftewel 0,8%, tot $68,36 per vat op die ICE Futures-beurs gedaal.

Die prys het Maandag net 0,5% hoër gesluit nadat dit vroeër die dag tot soveel as 3,1% gestyg het.

Sou die olieprys aanhou klim, is duurder petrol en diesel te wagte, ook in Suid-Afrika.

Netwerk24 het vroeër berig dat die invloed van die sluipmoordaanval in Irak reeds ’n invloed op Suid-Afrikaanse brandstofpryse het.

Volgens die jongste syfers wat die Sentrale Energiefonds Dinsdag beskikbaar gestel het, is die oorverhandeling (potensiële daling) op 95-oktaan-petrol nou net 9c.

Vrydag was die oorverhaling net 14c terwyl dit op 1 Januarie nog 22c was.

Soleimani is op 3 Januarie in ’n sluipmoordaanval naby die lughawe in Bagdad dood.

Minstens 35 mense is Dinsdag in Iran dood en 48 beseer in ’n stormloop in Soleimani se begrafnisstoet. – Bloomberg, bygewerk

Meer oor:  Olieprys  |  Olie  |  Brandstofprys  |  Energie
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.