Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Energie
Wie’s die ingenieurs wat Eskom kom ‘regruk’?

Pravin Gordhan, minister van openbare ondernemings, het Dinsdag in die parlement aangekondig dat Italië se grootste kragverskaffer, Enel, genader is om Eskom se beurtkrag-krisis te help regruk.

Die stand van al Eskom se kragstasies gaan ondersoek word deur Italiaanse ingenieurs van die firma Enel.

Gordhan en Jabu Mabuza, voorsitter van Eskom, het Enel gekontak om tegniese hulp te verleen om die probleme by Eskom op te los.

Die minister sê in ’n e-pos dat Enel binnekort ingenieurs na Suid-Afrika sal stuur om die omvang van die probleem vas te stel deur ’n omvattende bedryfsoudit van alle kragstasies te voltooi. Dit sal volgens Gordhan verseker dat elke moontlike tegniese probleem volledig verstaan word sodat oplossings doeltreffend gevind kan word.

Enel is wel reeds bedrywig in Suid-Afrika as Enel Green Power RSA (Enel GP), met onder meer 520 megawatt (MW) se installasies wat landwyd son- en windkrag opwek. Dié groenkragaanlegte is reeds in bedryf.

Luidens ’n verklaring wat Dinsdag uitgereik is, het Enel GP ook pas met die konstruksie van die nuwe Nxuba 140 MW-windplaas in Amathole in die Oos-Kaap begin.

Die windkragsentrale kos R3,1 miljard om te bou en sal teen September 2020 begin krag opwek as deel van Eskom se toekenning van sy 2015-verkrygingsgprogram van hernieubare energie van onafhanklike kragprodusente (REIPPPP). Die Italiaanse maatskappy het ’n kontrak van 20 jaar met Eskom vir dié aanleg.

Enel is internasionaal in 35 lande bedrywig, en het ’n deurlopende fokus op groenkrag, met 43 gigawatt (GW) se windplase, hidro-elektriese, geotermiese, son- en biomassa-kragsentrales wêreldwyd. Net minder as 50% van die kragreus se totale opwekkingsvermoë van 89 GW kom van hernieubare bronne.

Die Italiaanse nutsmaatskappy is oorspronklik in 1962 as ’n staatsonderneming begin, maar is toe in 1999 geprivatiseer en bestuur nou ’n inkomste van ongeveer R1 100 miljard per jaar.

Die kredietgraderingsagentskap Fitch het pas Enel se langtermynkredietwaardigheid ook opwaarts hersien tot A-. Dit is vier vlakke bo beleggingsgraad by Fitch.

“Die graderingsagentskap het erkenning gegee aan Enel se sterk prestasiegeskiedenis ondanks die groep se uitdagende bedryfs- en finansiële doelwitte in die tydperk tussen 2015 en 2018,” luidens Enel se verklaring.

“Enel se posisie aan die voorpunt van innovasie sowel as volhoubaarheid is merkwaardig.”

Enel is ook by die twee ander groot kredietgradeerders ver bo beleggingsgraad gegradeer. By Moody’s Investors Service staan Enel twee posisies bo rommelstatus, en by Standard & Poor’s Global Ratings (S&P) is hy drie posisies bo rommelstatus.

Eskom, wat tans R420 miljard se skuld het, staan by S&P, Moody’s en Fitch onderskeidelik sewe, vyf en drie posisies onder beleggingsgraad.

Eskom het vandeesweek beurtkrag ingestel om te keer dat die hele netwerk weens onbeplande instandhouding ineenstort.

Eenhede by Arnot, Kriel, Duvha, Matla en Grootvlei was saam met dié by Medupi en Kusile nie Dinsdag in

bedryf nie.

Eskom het net 27 305 MW krag beskikbaar gehad van die 30 033 MW wat hy in piektye nodig het, het

Gordhan Dinsdag gesê.

Woensdag het Eskom weer fase 3-beurtkrag van 08:00 tot 23:00 ingestel.

Wanneer fase 3-beurtkrag ingestel word, beteken dit Eskom moet 3 000 MW se elektrisiteit van die netwerk haal.

Meer oor:  Eskom  |  Pravin Gor­Dhan  |  Beurtkrag  |  Krag  |  Sonkrag  |  Windkrag  |  Groenkrag  |  Elektrisiteit
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.