Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Tegnuus
Is die nuwe Fitbit vir kinders die moeite werd?

Nellie Brand-Jonker, senior sakeverslaggewer van Netwerk24, het ’n Fitbit Ace ’n paar weke lank op haar dogter (8) getoets en deel haar gewaarwordinge.

  

Die Fitbit Ace is 'n moet vir jou kind as jy graag wil weet hoe baie hulle werklik oefen.

Fitbit het in Junie bekend gemaak hy stel nou sy visier op die jonger generasie. Dié gewilde skepper van fiksheidsbandjies het sy eerste toestel spesiaal vir die kinders bekend gestel.

Nes Fitbit se bandjies vir volwassenes, meet die Ace kinders se treë en hoeveel minute per dag hulle aktief is.

Dit versamel ook waardevolle inligting oor hul slaappatroon.

Maar is dit die moeite werd vir ouers om sowat R1 500 op te dok vir só ’n bandjie vir elkeen van hul kroos?

Nellie Brand-Jonker, senior sakeverslaggewer van Netwerk24, het ’n geleende Fitbit Ace ’n paar weke lank op haar dogter (8) getoets en deel haar gewaarwordinge.

  

Die data sal jou verbaas

  

As ’n ma wat gedink het haar agtjarige is betreklik onaktief en kyk gans te veel televisie, was ek aangenaam verras om te sien hoeveel oefening sy werklik kry.

Net ’n paar dae nadat sy die bandjie begin dra het, het sy ’n “prys” gekry wat haar gelukwens dat sy 10 000 tree op een dag gegee het.

Ek was so opgewonde saam met haar!

Maar ná meer as ’n week sien ek toe sy het dié mylpaal net vir vier dae gehaal, wat toe weer my moed laat sak het dat sy “baie oefening” kry.

  

Dit moedig oefening aan

     

Gelukkig moedig die bandjie en Fitbit se meegaande app jou spruit aan om haar litte te beweeg.

My dogter het byvoorbeeld op een dag meer as 14 000 treë gegee toe ons ’n naweek saam met vriende weggegaan het en sy ’n maatjie saamgeneem het.

Daardie dag het sy volgens die bandjie 9,4 km beweeg.

Fitbit “beloon” jou vir sulke goeie oefendae met “pryse” en moedig jou dan aan om jou eie rekord te verbeter.

  

’n Grafiek van die App wat ’n week se inligting toon en hoe jou kind se treë daagliks met die aanbevole getal treë vergelyk. Jy kan ook op elke dag kliek om die dag se inligting in grafiekvorm te sien.
Die app gee heelwat insig

     

Omdat my dogter nog nie haar eie slimfoon het nie, was haar bandjie aan die app op my selfoon gekoppel. Ek besit nie self ’n fiksheidsbandjie nie, so ons moes ’n nuwe profiel skep vir my en haar wat gekoppel word.

Dis goed dat ouers meer inligting oor hul kinders se oefenpatrone kan sien terwyl die jongklomp net toegang tot basiese data soos aantal treë het.

Ek kon byvoorbeeld sien dat sy op die betrokke dag waarop sy 14 000 treë gegee het ook meer as 2 300 kalorieë verbrand het.

Hopelik was dit genoeg om daai melkskommel en lekkergoed wat sy geëet het, te verbrand!

In “Parent View” kan jy ook interessante grafieke sien wat wys watter tye van die dag jou kind op haar aktiefste was. Dit was geen verrassing dat dit meestal tydens pouse en ná skool by nasorg was nie.

Die grafieke dui ook aan hoe intens die oefening was. Rustig stap vertoon byvoorbeeld rooi, met hardloop wat nader aan oranje of selfs groen beweeg.

Een Sondag het ons gaan fietsry en dit het behoorlik grasgroen gegloei op daardie dag se grafiek.

  

Weet hoe goed jou kind slaap

     

As ouer was dit ook vir my baie insiggewend om te sien hoe goed (of sleg) my kind slaap.

In die toetsperiode het my dogter gemiddeld nege ure en 17 minute se slaap per nag gekry.

Die inligting toon hoe jou kind se slaappatroon lyk. Jy kan dan ook op elke dag kliek om te sien watter ure sy wakker of rusteloos was.

Maar ek kon ook sien hoe goed sy elke aand geslaap het. In die app word daar aangedui wanneer sy in die nag wakker geskrik het of selfs net rusteloos was.

Dis verbasend hoe baie inligting die bandjie oor jou kind se slaappatrone vasvang. Een oggend kon ek byvoorbeeld sien sy was vir ’n enkele minuut omstreeks 04:00 wawyd wakker.

  

Moet ek dit vir my kind aanskaf?

      

As ouer kan dié soort tegnologie jou help om te weet hoeveel jou kind werklik oefen. My dogter is nie besonder aktief nie, maar ek was verbaas oor hoeveel treë sy eintlik elke dag gee.

Dit is toe al die tyd nie net ’n geval van voor die televisie lê en vergaan nie; sy hardloop werklik baie rond.

Die bandjie is ook lekker stewig en boonop waterdig ook. Sy het sommer met die bandjie aan in die bad gespring.

Die Ace se battery hou ook verstommend lank. Eers ná vyf dae het ek ’n e-pos van Fitbit gekry wat sê die batteryvlak is nou laag. Dit is baie slim van Fitbit, want dit beteken ek as ouer hoef nie heeltyd te wonder of my kind se bandjie se battery al uitgeloop het nie.

Die Fitbit Ace is ook betreklik goedkoop en daarom sal ek enige tyd oorweeg om een vir my dogter vir Kersfees of haar volgende verjaarsdag aan te skaf.

Die enigste haakplek is dat dit nogals moeilik was om die aanvanklike verbinding tussen my foon en die bandjie te bewerkstellig, en ook om die app in my en my dogter se naam op te stel.

Meer oor:  Fitbit  |  Oefening  |  Tegnologie  |  Fiksheidsbandjies
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.