Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Tegnuus
Klomp tale lei tot Babelse verwarring op Facebook

Facebook se reguleerders sukkel om kop of stert uit te maak van kommentaar op dié platform omdat daar in soveel verskillende tale gebabbel word.

Facebook is in meer as 110 tale beskikbaar, maar sy reguleerders kan nie almal praat nie. Foto: Reuters

Uit Reuters se navorsing blyk dit dat daar 111 verskillende tale op Facebook se platform gebruik word, maar dit beteken nie dat die maatskappy reguleerders in diens het wat al die tale magtig is nie.

Die platform se bepalings en voorwaardes wat haatspraak monitor, is byvoorbeeld ook net in 41 van die 111 tale beskikbaar.

Facebook se 15 000 reguleerders praat min of meer 50 tale. Die maatskappy sê wel hy stel vertalers aan waar nodig. Kunsmatige intelligensie wat ingespan word om haatspraak op te tel werk in sowat 30 tale, sê Facebook.

’n Gebrek aan sprekers in die ander tale bemoeilik Facebook se stryd om skadelike inhoud uit te skakel.

Dit is glo veral ’n probleem in lande soos Australië, Brittanje en Singapoer, waar die owerhede dreig om die sosiale netwerk swaar boetes op te lê as hy nie gevalle van haatspraak gou genoeg verwyder nie.

Facebook werk maandeliks sy bepalings en voorwaardes by om nuwe gevalle van haatspraak of ander onvanpaste inhoud daarop te verklaar. Dié dokument is reeds byna 10 000 woorde lank, of minstens die Engelse weergawe daarvan.

Volgens ’n woordvoerder word die bepalings en voorwaardes slegs vertaal in tale wat baie op dié platform gebruik word. Die maatskappy beskou dit glo as ontsettende groot moeite om die dokument te vertaal.

Ná die onlangse aanvalle in Sri Lanka, waar die regering onlangs die gebruik van sosiale netwerke soos Facebook tydelik verbied het, het Facebook die vertaling van sy bepalings in Singalees, die land se oorheersende taal, geprioritiseer.

Die dokument word ook eersdaags in Khmer, die amptelike taal in Kambodja, vertaal. Reuters het onlangs bevind dat gevalle van haatspraak in Mianmar weens ’n gebrek aan sprekers van dié land se grootste tale ongekontroleer is.

Die sosiale netwerk het intussen meer as 100 sprekers van Birmaans aangestel om inwoners daar teen haatspraak te beskerm, veral in die lig van etniese suiwering wat in die land plaasvind.

Facebook is ook in Afrikaans beskikbaar, maar dit is nie duidelik of die maatskappy enige Afrikaanse reguleerders in diens het nie.

Die maatskappy het wel ’n streekkantoor in Johannesburg.

Meer oor:  Facebook
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.