Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Tegnuus
Naspers: Nóg planne kom vir groter waarde

Ontleders verwag nóg optredes van Naspers en Prosus om waarde te ontlok.

Bob van Dijk, uitvoerende hoof van Naspers en Prosus. Foto: Getty Images

Dit kan insluit om van die groepe se onderliggende bates soos kosaflewering, digitale betalings of geklassifiseerde advertensies afsonderlik te noteer.

Maar hulle sal dit slegs doen as die tyd ryp is, meen Claude van Cuyck, portefeuljebestuurder by Denker Capital.

Hulle het reageer op die internetreuse se voorstel Woensdag dat Prosus sy belang in Naspers met 45% vergroot deur Prosus-aandele aan Naspers-aandeelhouers te bied in ruil vir van hul Naspers-aandele.

Van Cuyck verwag die aandeelhoudingstruktuur van Naspers en Prosus kan mettertyd ingeplof word sodat daar net een toegangspunt vir beleggers is. Hy verwag Prosus sal dié toegangspunt wees.

Hy waarsku dat die transaksie belastingimplikasies vir Naspers-aandeelhouers kan inhou. Dit kan kapitaalwinsbelasting lok vir Naspers-aandeelhouers wat kies om van hul aandele vir Prosus-aandele te ruil.

‘Te ingewikkeld’

Casparus Treurnicht, portefeuljebestuurder van Gryphon Capital, meen egter beleggers hou nie van kruisaandeelhoudings nie, en die meeste van dié strukture word mettertyd ontbind. Hy waarsku oor die gelde wat die bestuur die laaste paar jaar aan beleggingsbanke moet betaal vir die oprig van dié ingewikkelde strukture.

Hy meen die enigste uitweg vir Naspers en Prosus om waarde te ontlok, is om die belang in die Chinese internetreus Tencent stelselmatig te verkoop en om wesenlike dividendverklarings te maak. Prosus besit 28,8% van Tencent.

Die oorheersende gewig van Naspers op die JSE skep ’n te groot konsentrasie in een aandeel. Baie beleggingsmandate vereis dat beleggers nie meer as 10% in een aandeel besit nie.

Van Cuyck verduidelik die oorheersende gewig van Naspers op die JSE skep ’n te groot konsentrasie in een aandeel. Baie beleggingsmandate vereis dat beleggers nie meer as 10% in een aandeel besit nie, en institusionele beleggers het dus deurlopend hul blootstelling aan Naspers verklein namate die groep beter as die mark presteer het.

Vir Prosus-aandeelhouers sal die groter gewig van Prosus in verskeie plaaslike en internasionale beursindekse beteken dat beleggers hul blootstelling aan Prosus sal vergroot, en daar sal ’n groter vraag van passiewe indeksfondse en beursverhandelde fondse na Prosus wees, het Van Cuyck verduidelik.

prosus

$5 miljard om aandele te koop

Bob van Dijk, uitvoerende hoof van Naspers en Prosus, het Woensdag verduidelik die ruilaanbod is ’n groot stap om waarde te ontlok. Dit skep ’n stabiele struktuur vir groei en halveer bykans Naspers se gewig in die JSE.

Tot $5 miljard gaan deur Prosus gebruik word om Naspers-aandele terug te koop om die transaksie deur te voer as daar nie genoeg Naspers-aandeelhouers is wat die Prosus-aandele wil hê nie, het Van Dijk gesê.

Maar hy is vol vertroue dat die ruilaanbod só aantreklik is dat dit nie nodig sal wees om aandele te koop nie.

Die jongste transaksie sal help om die Naspers-gewig in die Swix tot sowat 15% laat daal.

Van Dijk sê toe hy in 2013 by Naspers oorgeneem het, was Naspers se gewig op die JSE se aandeelhouersgeweegde indeks (Swix) onder 5%, maar dit het teen 2019 tot bo 20% geklim. As Naspers nie Prosus in 2019 afsonderlik genoteer het nie, sou dit die gewig tot bo 30% gedryf het weens sy sterk groei.

Hy verduidelik die jongste transaksie sal help om die Naspers-gewig in die Swix tot sowat 15% laat daal.

Naspers het ook onderneem om geen Prosus-aandele te verkoop vir 12 maande ná die transaksie nie, om ’n stabiele struktuur te help skep.

Naspers sal steeds die grootste maatskappy op die JSE wees, selfs ná die aandeleruiling en met sy markwaarde wat met sowat $45 miljard sal krimp.

Dit sal op sy beurt Prosus se likiditeit en internasionale aantreklikheid as belegging verbeter.

Nuwe B-aandele

Basil Sgourdos, finansiële hoof, het beklemtoon die aanbod aan Naspers-aandeelhouers is vrywillig.

Naspers-aandeelhouers word 2,27 Prosus-aandele aangebied vir elke 1 Naspers-aandeel.

Hy meen die transaksie sal van dag een af waarde ontlok deurdat Prosus die laer gewaardeerde Naspers-aandele kry in ruil vir hoër gewaardeerde Prosus-aandele. Naspers-aandeelhouers kry op hul beurt Prosus-aandele wat nader aan hul netto batewaarde gewaardeer word.

Naspers en Media24 se hoofkantoor in Kaapstad. Foto: Getty Images

Sgourdos het gewys op die nuwe B-aandele in Prosus wat uitgereik sal word om Naspers steeds stemreg-beheer oor Prosus te gee, al is sy effektiewe ekonomiese belang in Prosus kleiner. Slegs Naspers sal dié B-aandele in Prosus besit.

Van Dijk het verduidelik Prosus-aandeelhouers sal die skep van dié nuwe B-aandele op ’n buitengewone aandeelhouersvergadering moet goedkeur.

Die transaksie sal nie iets aan die groep se belastingstatus verander nie. Sgourdos het in antwoord op vrae gesê dit sal te duur wees om Prosus te ontbondel, want soiets sal wel groot belastingimplikasies inhou.

Verbind tot SA

Van Dijk het beklemtoon Naspers is steeds ten volle verbind tot Suid-Afrika, met R4,6 miljard se beleggings wat beloof is vir die streek. Naspers het byvoorbeeld R1,4 miljard in Naspers Foundry, ’n broeikas vir nuwe tegnologiemaatskappye, belê, en het R1,5 miljard bestee aan die stryd teen die Covid-19-pandemie.

Naspers en Prosus se aandeelpryse op die JSE het Woensdag albei met meer as 3% gestyg.

  • Netwerk24 is deel van Media24, ’n filiaal van Naspers.
Meer oor:  Prosus  |  Naspers  |  Basil Sgourdos  |  Bob Van Dijk  |  E-Handel  |  Beleggings  |  Tegnologie  |  Geklassifiseerde Advertensies  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.