SPESIALE VAKANSIE-AANBOD: Teken in teen net R49 vir jou eerste maand! Word 'n intekenaar
Tegnuus
Naspers, Prosus stamp kop met JSE oor indekse

Een van die belangrikste beweegredes vir die ontknoping van Naspers se oorsese internetbelange in die nuwe maatskappy Prosus is nou in die weegskaal.

Bob van Dijk, uitvoerende hoof van Prosus en Naspers. Foto: Getty Images

Naspers en Prosus is besig om koppe te stamp met die JSE oor of die twee maatskappye op van die JSE se indekse as een entiteit beskou moet word of as twee.

Die twee maatskappye trek in ’n verklaring deur Eoin Ryan, hoof van beleggersverhoudinge, te velde oor hoe ’n verandering in die reëls oor indekse beleggersvertroue in die JSE en Suid-Afrika kan ondermyn. Dit kan tot ’n uitvloei van kapitaal én belastinginkomste uit Suid-Afrika lei “op ’n tydstip dat die omgekeerde nodig is”.

Die JSE impliseer op sy beurt die ontknoping was ’n “sintetiese” proses wat in berekening gebring moet word om beleggers te beskerm.

Die diskonto-probleem

As twee entiteite op die indekse is die kans groter dat die diskonto op albei se aandeelprys kan verklein.

Die diskonto verwys daarna dat Naspers se aandeelprys nie die waarde van sy belegging in die Chinese internetreus Tencent weerspieël nie, wat nog te sê sy ander, al hoe meer winsgewende ondernemings, soos dié in geklassifiseerde advertensies.

In verskeie voorleggings die afgelope paar jaar het Koos Bekker, Naspers-voorsitter, Bob van Dijk, uitvoerende hoof, en Basil Sgourdos, finansiële hoof, dit toegeskryf aan die enorme gewig van Naspers op die JSE.

Batebestuursfirmas plaas gewoonlik ’n perk op hoeveel hulle in een maatskappy mag belê en soos Naspers styg, moet hulle aandele verkoop, wat die groei in die aandeelprys aan bande lê.

Die ontknoping van Prosus – waarvan Naspers 73,84% besit – is as een van die antwoorde op dié probleem beskou.

Prosus se primêre notering is op 11 September op die Euronext Amsterdam gedoen en die maatskappy het ’n sekondêre notering op die JSE. Verreweg die meeste aandeelhouers, byna 96%, het gekies om Prosus-aandele te ontvang in die ontknoping, eerder as meer Naspers-aandele, juis omdat hulle geglo het dit sal vir hulle meer waarde ontsluit.

Die ingangsportaal van die JSE in Sandton. Foto: Elvira Wood

Afsonderlik, maar hoe lank nog?

Die JSE het met die Prosus-notering op 11 September albei maatskappye afsonderlik op die indekse ingesluit waarop Naspers ook is. Die gewigte van die twee maatskappye is op 23 September aangepas.

Op 5 November het die JSE egter ’n konsultasiedokument gepubliseer waarin hy sê hy oorweeg klagtes deur sekere batebestuursfirmas oor die Naspers-Prosus-vraagstuk.

Die grootste kommer is oor die beperkte aandeelhouersgeweegde indeks van alle aandele (capped Swix, oftewel die J433-indeks), wat die “de facto-maatstaf vir plaaslike aandelefondse in Suid-Afrika geword het”. Dié indeks beperk die gewig van ’n enkele maatskappy in die indeks op 10% om uitermate blootstelling daaraan te voorkom.

“Aangesien Naspers en Prosus twee afsonderlike maatskappye is, word die perk afsonderlik toegepas en daarom is hul gekombineerde indeksgewig meer as die perk van 10%. Albei maatskappye trek egter ’n beduidende deel van hul waarde uit ’n onderliggende belang in Tencent, en sommige indeksgebruikers glo dit moet in ag geneem word wanneer hul indeksgewig beperk word,” luidens die JSE-dokument.

Die gekombineerde gewig in die beperkte indeks van alle aandele (die J303-indeks) was op 31 Oktober 11,14% en in die beperkte aandeelhouersgeweegde indeks van alle aandele (die J433) 12,02%.

“Baie markdeelnemers sou die bekendstelling van die [J433]-indeks gesien het as ’n manier om die gewig van Naspers in die indeks van alle aandele tot 10% te beperk, en sou redelikerwys bevraagteken waarom hulle nou ’n hoër gewig het, bo dié perk.”

Die JSE sê Naspers se 31,1%-belang in Tencent was einde Maart (dus voor die Prosus-ontknoping) nagenoeg R2 027 miljard werd en 79% van Naspers se inkomste het van Tencent gekom.

Naspers se beherende belang in Prosus is sowat R1 264 miljard werd, wat meer is as Naspers se eie markwaarde van R965 miljard. Dit weerspieël die diskonto.

Dit ondersteun die siening dat Naspers effektiewelik ’n sintetiese belang in Prosus verskaf, en dat dit in berekening gebring moet word wanneer blootstelling aan ’n enkele instrument beperk word.
JSE-konsultasiedokument

“Dit weerspieël ook die mate waarin Naspers se waardasie oorheers word deur sy belang in Prosus. Dit ondersteun die siening dat Naspers effektiewelik ’n sintetiese belang in Prosus verskaf, en dat dit in berekening gebring moet word wanneer blootstelling aan ’n enkele instrument beperk word. Die algemene beginsel hier oorweeg ’n beleggingsbeheerfirma waarvan die waardasie amper eksklusief oorheers word deur sy belang in ’n genoteerde filiaal.”

Wat die JSE oorweeg

Die JSE se voorstel is dat Naspers en Prosus in beperkte indekse as een entiteit behartig word, aangesien dit die risiko van ’n enkele groot blootstelling aan Tencent sal beperk.

In onbeperkte indekse, soos die indeks van alle aandele, sal die twee maatskappye steeds as afsonderlike maatskappye behartig word.

Daar is vandag geen nuwe, wesentlike inligting wat ’n hersiening regverdig nie. Buitendien skep ’n hersiening binne so ’n kort tyd die persepsie dat indeksering en beleidsekerheid in Suid-Afrika nie gewaarborg is nie.
Eoin Ryan van Naspers

Die afsnydatum vir kommentaar op die dokument is Vrydag 22 November en voorleggings sal in Desember deur die JSE oorweeg word. Geen indeksverandering word in Desember verwag nie, wat beteken enige verandering sal waarskynlik eers met die kwartaallikse veranderinge einde Maart in werking gestel word.

Dis op dié voorstelle dat Naspers en Prosus Woensdagaand laat vuriglik gereageer het.

Ryan doen ’n beroep op die JSE om sy besluit oor die onderwerp wat in Julie geneem is, te handhaaf.

Ryan sê Naspers het “uitgebreide konsultasie” met die JSE oor ’n tydperk van agt maande voor die Prosus-ontknoping gehou, juis om die beste manier te vind om die ontknoping “in die belang van alle belanghebbendes en beleggers, met die doelwit om waarde vir beleggers te ontsluit”, te doen.

Hy wys daarop dat markdeelnemers se insette toe reeds gevra is.

“Daar is vandag geen nuwe, wesentlike inligting wat ’n hersiening regverdig nie. Buitendien skep ’n hersiening binne so ’n kort tyd ná die inwerkingstelling van die indeksbehandeling wat in Julie 2019 aangekondig is, die persepsie dat indeksering en beleidsekerheid in Suid-Afrika nie gewaarborg is nie.

“So ’n persepsie kan ’n negatiewe uitwerking hê op hoe internasionale beleggers Suid-Afrika en die JSE as ’n beleggingsbestemming sien en kan ’n wesentlik negatiewe uitwerking op regstreekse buitelandse beleggings in Suid-Afrika hê.”

Volgens Naspers en Prosus sal dit “ontoepaslik en suboptimaal” wees om Naspers en Prosus as een maatskappy te behartig in beperkte indekse.

“’n Verandering in die huidige beleid sal waarskynlik tot die voordeel van ’n paar wees ten koste van talle.”

Ryan sê ook markonstabiliteit kan volg “as beleggers hul beleggingsbesluite voortydig moet omkeer en hul beleggings moet ontknoop.”

Ryan sê Naspers en Prosus het wel heeltemal verskillende eienskappe en lok verskillende beleggers.

Só vaar aandeelpryse

Die aandeelprys van sowel Naspers as Prosus is onder druk. Sedert 11 September, toe Prosus genoteer is, het dit as volg gevaar:

  • Naspers: Daal met nagenoeg 11,5% tot R2 182,79
  • Prosus: Daal met 16,9% tot R998,99
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.