Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Tegnuus
Naspers: Prosus koop $5 miljard se aandele

Prosus gaan $5 miljard gebruik om van sy eie aandele terug te koop en van Naspers se aandele te koop.

Die enorme belegging is die groep se derde groot stap om sy aandeelprys ’n hupstoot te gee.

Bob van Dijk, uitvoerende hoof van Naspers en Prosus en Naspers. Foto: Getty Images

Prosus koop $1,37 miljard van sy eie gewone aandele terug en $3,63 miljard van Naspers se gewone aandele.

Die transaksie sal gedoen word ná die uitreiking van Naspers en Prosus se resultate vir die halfjaar tot einde September, na verwagting op 23 November. Dit gaan nie alles gelyktydig gedoen word nie, maar na gelang van marktoestande.

Prosus is die maatskappy waarin Naspers sy internasionale internetbelange verlede jaar ontknoop het en wat sy primêre notering op die Euronext-beurs in Amsterdam het. Naspers besit 72,5% van Prosus, wat ook die persentasie van die $5 miljard is wat vir Naspers-aandele gebruik word.

In die Sens-verklaring verwys Naspers daarna dat die aandeelprys steeds ’n “aansienlike afslag” op die groep se netto batewaarde verteenwoordig. Dié sogenaamde diskonto is nou al jare lank vir aandeelhouers ’n steen des aanstoots.

Die aandele wat teruggekoop of gekoop word, sal as tesourie-aandele gehou word en sal dus uitgesluit word van die aandele wat getel word vir finansiële verslagdoening van onder meer die kernwesensverdienste per aandeel. Dit behoort Naspers en Prosus se syfers dus vanaf volgende jaar se voljaarresultate ook ’n hupstoot te gee. Sien ook kassie hieronder.

Die ontknoping van MultiChoice en die afsonderlike notering van Prosus was die vorige twee stappe wat Naspers gedoen het om die diskonto op sy netto batewaarde te probeer verklein.

In ’n mediaverklaring sê Bob van Dijk, uitvoerende hoof van sowel Naspers as Prosus, die transaksies word as goeie gebruik van kapitaal beskou, gegewe dat daar nie op die oomblik goeie verkrygingsgeleenthede in die mark is nie.

Die gebruik van ons kontant om meer van ons bestaande portefeulje te besit deur die koop van ons eie aandele wanneer die afslag op die netto batewaarde groot is, is ’n sinvolle gebruik van kapitaal.
Bob van Dijk, uitvoerende hoof van Naspers en Prosus

“Ons het bevind verskeie geleenthede vir verkrygings en samesmeltings in ons sektor is volprys en ons het gedissiplineerd gebly. Die gebruik van ons kontant om meer van ons bestaande portefeulje te besit deur die koop van ons eie aandele wanneer die afslag op die netto batewaarde groot is, is ’n sinvolle gebruik van kapitaal.”

Basil Sgourdos, finansiële hoof, sê die groep het heelwat finansiële buigsaamheid. “Dit het ’n portefeulje e-handelbates opgebou met ’n beduidende vermoë om kontantvloei te skep. Die groep is nou in die posisie om in sy eie portefeulje bates te belê en sy eie aandele te koop wanneer dit sin maak vanuit die oogpunt van opbrengs.”

Sgourdos sê sowel die bestuur as direksie van die twee maatskappye is daartoe verbind om langtermynopbrengste vir aandeelhouers op te lewer. “Ons sal ook voortgaan met ’n reeks inisiatiewe om die gekonsolideerde diskonto op die netto batewaarde verder te takel.”

Die maatskappy gebruik sy eie kontant vir die transaksies.

Aandeelprys

Naspers se aandeelprys op die JSE het die afgelope jaar wel met meer as 44% gestyg en Prosus s’n met meer as 53%. Die twee maatskappye het Donderdag op onderskeidelik R3 040,46 en R1 580 gesluit.

Prosus het die afgelope jaar twee keer ’n bloutjie met voorgenome verkrygings geloop.

In Januarie het sy poging om die Britse kosafleweringsfirma Just Eat in ’n vyandige oorname te bekom, misluk. Die maatskappy is deur die Nederlandse firma Takeaway.com gekoop en het een van die wêreld se grootste kosafleweringsfirmas geskep wat in Europa regstreeks meeding met maatskappye waarin Prosus belange het, soos Delivery Hero.

Prosus beskou kosaflewering as een van die grootste groeigebiede wêreldwyd en het onder meer belange in iFood in Latyns-Amerika, Swiggy in Indië en Mr D in Suid-Afrika.

In Julie het Prosus misluk in sy poging om eBay se geklassifiseerde advertensies te koop. Die Noorweegse firma Adevinta het dié stryd gewen.

Geklassifiseerde advertensies is ’n groot fokus van Prosus, wat onder meer OLX besit, asook Letgo in die VSA. Met die uitsondering van Letgo het geklassifiseerde advertensies verlede jaar begin wins maak.

Prosus se derde groeigebied is vir aanlyn betalingsdienste.

  • Netwerk24 is ’n publikasie van Media24, ’n filiaal van Naspers.
Wat is waarde van die terugkoop van aandele?

Investopedia verduidelik dat die terugkoop van aandele die aantal aandele op die mark verminder. ’n Laer aanbod van aandele beteken die vraag word in verhouding hoër, wat die aandeelprys kan opdruk.

Dis goeie nuus vir aandeelhouers.

Aandeelhouers wen ook deurdat die dividend per aandeel gewoonlik styg as daar minder aandele is.

Dit verbeter ook die maatskappy se finansiële resultate omdat belangrik syfers as ’n waarde per aandeel aangegee word en daar minder aandele is. Verdienste en kernwesensverdienste word byvoorbeeld deur die aantal aandele verdeel vir die verdienste en kernwesensverdienste per aandeel.

Ontleders hou aandele-terugkooptransaksies gewoonlik fyn dop om seker te maak daar is nie pogings om syfers kunsmatig beter te laat lyk daardeur nie.

Maatskappye wêreldwyd oorweeg die terugkoop van aandele gewoonlik wanneer hulle voel die maatskappy word ondergewaardeer of wanneer aandelebeurse aan die styg is.

Meer oor:  Prosus  |  Naspers  |  Bob Van Dijk  |  Basil Sgourdos  |  E-Handel  |  Beleggings  |  Tegnologie  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.