Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Tegnuus
Raaisel om $145 m. se vermiste kriptogeld verdiep
Bitcoin is reeds tien jaar oud. Foto: Getty Images

Die raaisel oor die miljoene dollar in kriptogeld wat oënskynlik saam met die stigter van die Kanadese verhandelingsplatform Quadriga na sy graf is, het pas verdiep.

Dit is nié op die hardeskyf van sy rekenaar, soos aanvanklik vermoed is nie.

Quadriga het aanvanklik gesê Gerald Cotten (30), stigter en uitvoerende hoof, was die enigste persoon met toegang tot gebruikers se gestoorde digitale geld.

Cotten het minstens VSA$145 miljoen in digitale munte van lyn af op sy rekenaar se hardeskyf gestoor, glo om dit teen kuberkrakers se lang vingers te beskerm.

Ná sy skielike dood in Desember 2018 kon niemand toegang tot sy rekenaar kry nie omdat dit met ’n wagwoord beskerm was wat nie eens sy vrou geken het nie.

Hy is in Indië dood weens komplikasies wat met Crohn se siekte verband hou.

Tegnici is ingeroep en ná maande se gespook is uiteindelik toegang tot Cotten se rekenaar verkry, berig die BBC.

Net om te ontdek dit bevat geen van die beloofde kriptogeld nie.

Die hoop van meer as 115 000 deposante om hul geld terug te kry het soos mis voor die son verdwyn.

Quadriga is reeds verlede maand in sakeredding geplaas omdat dit prakties bankrot is.

Die ouditfirma EY is destyds aangestel om te probeer uitvind waar die geld is.

Sy ondersoekspan het toegang tot die rekenaar verkry en ses digitale “beursies” gevind waarin kriptogeld in die verlede gestoor was. Dit is alles egter nou leeg.

Luidens ’n verslag wat EY Dinsdag uitgereik het, weet hy nog nie wat van die geld geword het nie.

Die ondersoek word verder gekompliseer deurdat Cotten blykbaar 14 afsonderlike rekeninge geskep het waarmee hy kriptogeld rondgeskuif of verkoop het.

EY beskryf dié betalings as “buite die normale proses” en sê hy gaan probeer om na te gaan waarheen Cotten die geld voor sy dood kon oorgeplaas het.

Een van die beursies op sy rekenaar het in ’n stadium meer as 2 700 bitcoins bevat, wys EY se verslag.

Intussen is ’n beloning van VSA$100 000 uitgeloof vir enigiemand wat inligting kan verskaf oor wat moontlik van die digitale geld kon geword het.

Buiten vir die beleggers wat bakhand staan om hul geld terug te kry, eis Cotten se weduwee nou ook dat die koste wat sy namens die maatskappy aangegaan het, terugbetaal word.

Jennifer Robertson, Cotten se vrou, het in Januarie K$300 000 uit haar eie sak betaal sodat Quadriga om sakeredding kon aansoek doen.

Die maatskappy word vir tyd en wyl deur Robertson en haar stiefpa, Tom Beazley, bestuur.

Robertson het reeds ’n kontantvloei-verslag van Quadriga onderteken, waarvolgens hy in die week van 2 tot 8 Maart K$1,1 miljoen van sy regskuld sal delg, waaronder die K$300 000 aan haarself en K$200 000 aan EY.

Dié stap bekommer die regsfirma wat namens Quadriga se beleggers optree. Hulle meen dit is onvanpas dat Robertson haar geld kry terwyl die beleggers meer as $145 miljoen geskuld word, berig Bloomberg.

Meer oor:  Quadriga  |  Tegnologie  |  Digitale Geld  |  Kriptogeld
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.